1993 Як з канонов стрѣляли на вороблѣ
14.03.2013 13:24
Як з канонов стрѣляли на вороблѣ (або Як милитантны политикарѣ роблять тоталитну науку)
Сю уж 20 роков стару статю не были сьме бизовны, ци варта публиковати. Вѣдь политиков ся не заимаеме. Но ачей лем варта, понеже з ней можеме видѣти, якы были условия про розвиваня русинського языка в Подкарпатю зачатком 90. роков, и як ся днесь доправды посунуло на лѣпше, а тыж ту иде о науку, а щи и дотычну русинського языка. Правопис управеный.
Зачатком септембра 1993 зась, як перед двома роками, ся зышли до Ужгорода, як ся бомбастично дало до новинок, «выше двасто ученых з восьмох держав свѣта (Украина, Словенсько, Чесько, Мадярсько, Югославия, Нѣмецько, США, Канада)». Як ся уж стало звыком за тот куртый час, одколи зась голосно уж скорше заказане слово Русин, украинськы учены щи раз "еднозначно и доповна" доказали, же Русинов, в основѣ, нѣт, не може и не смѣе быти. Якыма способами? Многыма. Еден е такый,же ся до дискусии не закличуть, ци на ней ся не достануть ку слову тоты, што мають иншакы погляды. Наприклад, знамый америцькый украиниста професор Шевелев мать такый погляд, же однесѣня югославськых Русинов до украинськой народности – то абсурдность, а принайменшом, велике недорозумѣня. Але такых людей не закличуть, жебы не нарушыти тоту милу "еднозначность” ("однодумність"). Ку зачатку тогорочной конференции была выдрукована книжка з конференции сперед двох роков, и так ся мог каждый з той научной роботы много интересного дочитати и на властны очи ся пересвѣдчити о ей высокых научных цѣнностях. Наприклад, професорка О. Ганичова свою научну лекцию на тему екологии и здравя зачинать и кончить стишками В. Гренджи-Донського. Добрый аранжман, исто, вплынув на то, же недавно панѣ професорка достала титул академика.Перед тым ся знало, же ку доброй научной уровни ся жадать цитовати Маркса-Енгелса-Ленина, и тото, бизовно, помагало карьерѣ каждого научного фахмана.
Но кедь такы научны методы, як патетика, патос державотворѣня и "священо-недоткомы" емоции, кедь ани тоты бы пренияк не завчинковали на Русинов, суть щи и лѣпшы способы. Тоты переднес на конференции будучый украинський ученый, штудент ужгородськой универзиты, даякый Грабарь, котрый ледва едным обычайным копом ногы зломив ребра активистови Общества карпатських Русинов з Мукачова Л. Лецовичови. Так же, украинська наука ся може попышыти новыма славныма здобытками. Правдаже, десь иззаду ся все выпыхать едно паскудно гамишне позвѣданя: якый е коефициент хосенности той акции, кедь ся твердить, же Русинов на цѣлом Подкарпатю е ледва 50 челяди? Вѣдь то бы значило, же на пересвѣдчѣня каждого едного Русина (научно: неусвѣдоменого Украинця) требало позвожовати з толького свѣта аж по 4 украинськы професоры? Дашто ту не клапе: або професоры суть послабшы, або Русины дакус веце неусвѣдомены. А, може, ся зышли скорше про застрашѣня? Канон бехнув, вороблѣ ся розперьхли, лем ци ся доста настрашыли? Далша стрѣлянка з канона е напланована на 1995 рок; в межичасѣ, самособов, буде полошаня з меншого калибра.
Панове украинськы учены не могли ся розыйти з жебрачого и розкраденого Ужгорода до своих прекрасно забеспеченых домовств и катедер, жебы не были выдали даякы идеологичны поучѣня и политичны "рекомендации" не лем на пострашѣня розперьхнутым Русинам, але и на хосен украинськой влады и вшыткых владных штруктур Подкарпатя. Теперь, наконець, каждый буде знати, як дале. Одсужать ся робота наоколо кодификации русинського языка (аргумент: политична шкода про Украину!?). Украинська влада ся призывать за то, жебы не дозволила записовати народность Русин при зрахованю людей (аргумент: то понижать украинську народность!?). Также панове учены суть очевидно побурены над тым, же Русины собѣ розумлять з подкарпатськыма родаками Мадярами, Нѣмцями, Ромами, Румынами, Словаками и др., и же вшыткы в’едно ся домагають автономии про Подкарпатя. Подля нормалных европськых мѣр, християнських и, просто, здравых людських норм, бы ся тота едность мала лем привѣтати. Але тото бы было ненаучно, зато панове учены пожадують од вшыткых владных штруктур, жебы наконець перестали хосновати ненаучный термин «підкарпатський народ», а трактовали подля наукы кажду народность окреме, divide et impera! Зостало бы щи лем додати желаня, жебы кажда тота народность видимо проявляла горячу ласку к старшому украинському народу-газдови, понятя якого ся пропагуе на тых каноновых конференциях.
Што мож на тото повѣсти? Лем только, же тяжко и смутно ся робить чоловѣкови, бо такый способ думаня е тяжко порозумѣти, а не же прияти, каждому, хто мать корѣня, выроснуте з рѣнчоватой подкарпатськой земли. А жебы ся чудовати тым ученым, котры пришли з демократичного свѣта? Нѣт над чим. Люде суть вшелиякы, только же в демократичных краинах фашистичны моцованя ся не толерують. А дакого ту тягать носталгия за тоталитов, тужба переробити свѣт силнов пястев. З такыма людми днешня Украина кокетуе, вѣдь и одиозный Америчан Иван Демянюк достав одты назнакы, же бы ту быв приятый, як мало в котрой державѣ. Тяжко и смутно, лем треба вѣрити в лѣпше, бо тот лѣпший свѣт нигда и нигде не творили милитантны люде, а лем люде мирного и приязного характеру. Подобнѣ Русинам.
Жерело: Народны Новинкы (Пряшово). 1993, №48. 2.