21–30. апрѣль в истории
23.04.1564 у Стредфорду на Ейвону родив ся Віліам Шекспір (†1616), майбулшый анґлійськый драматик, котрый написав 36 траґедій, історій и комедій, булше як 150 сонетув.
25.04.1595 в Римі умер Торквато Тассо (Torquato Tasso; *1544), таліанськый ренесансный поет; ёго главный твур Выслобоженый Єрусалим (1575) о первуй крестоноснуй войнї.
23.04.1616 в Мадріду умер Міґуел де Сервантес (*1547), еспанськый писатель, автор Дон Кіхота.
23.04.1616 на свої 52. уродины умер Віліам Шекспір (*1564), майбулшый анґлійськый драматик, котрый написав 36 траґедій, історій и комедій, булше як 150 сонетув.
21.04.1699 у Паріжу умер Жан Баптіст Расін (Racine, *1639), французськый драматик класичного театра.
24.04.1731 умер Даніел Дефо (*1660), анґлійськый писатель и новинарь (Робинзон Крузо).
22.04.1766 в Паріжу родила ся Анна де Стал (правд. Анна-Луиза Жермена Неккер, Anne-Louise Germaine baronne de Staёl-Holstein; †1817), позната як мадам де Стал, французська романтична писателька наполеоновськой добы.
28.04.1794 у Тордї, жупа Аранёш-Торда, родив ся барон Міклош Йовшіка (†1865), мадярськый писатель, автор популарных історичных романув.
24.04.1803 у Тополи, округ Снина, Пряшовщина, родив ся Александер Духнович (†1865), будитель Русинув.
21.04.1816 родила ся Шарлота Бронте (Charlotte Brontё, †1855), анґлійська писателька, авторка романув Джейн Ейр (1847), Шерли (1849) и др.
24.04.1822 у Ліптовском Мікулашу родив ся Янко Краль (†1876), словацькый поет и радікалный револуціонер штуровськой ґенерації.
27.04.1822 в Раковуй, округ Чадца, родив ся Ян Паларик (†1870), словацькый драматик, публиціста, автор учебникув, орґанізатор літературного и народностного живота, священник.
24.04.1829 у Банськуй Быстрици родив ся Антал Бартал (†1909), класичный філолоґ, академик, ґімназіалный професор у Відню, Унґвару (в роках 1856–1858 учив ґрекчину и латину) и Пешту; в роках 1871–1890 діректор Будапештського педінстітута; автор многых учебникув, читанок и словникув из латины; майцїннїйша ёго робота – студії середновічной латины у Мадярщинї; од року 1873 дописный, а 1898 – повный член Академії Наук.
22.04.1838 Тараса Шевченка выкупили из панського пудданства.
24.04.1845 родив ся Карл Фрідріх Шпіттелер (Carl Spitteler; літературный псевдоним Карл Фелікс Тандем; †1924), швайцарськый поет, Нобелув лавреат (1919) за епос Олімпійська ярь.
26.04.1846 у селї Більче, Тернопольщина, родив ся Иван Григорович Верхратськый (†1919), украинськый філолоґ, природознатель, писатель, изглядователь языка пудкарпатськых Русинув, автор словника Знадоби до словаря южноруського (1877).
23.04.1850 у ґрофству Камберленд у віку 80 рокув умер Вілліам Вордсворт (William Wordsworth, *1770), анґлійськый поет, зачинатель анґлійського романтізму.
26.04.1872 в Бзинцях под Яворинов ся родила Людмила Подъяворинська (правд. Різнерова; †1951), словацька писателька, закладателька модерной дїточой літературы.
28.04.1881 в Банськуй Быстрици у віку 52 рокув умер Ян Ботто (*1829), словацькый романтичный поет, автор баллад и поем на темы народной поезії.
25.04.1883 в Словенськуй Люпчи родив ся Само Цамбел (Cambel; †1935), словацькый писатель и товмач, стрыйчаник языкознателя Само Цамбела (Czambel).
30.04.1883 у Празї у фамілії помочного учителя родив ся Ярослав Гашек (†1923), автор Пригод Доброго Вояка Швейка За Світовой Войны, потовмаченых на 54 языкы; у Празї быв познатов фіґуров богемного світа; року 1911 створив провокативну Партію Уміреного Поступу, яка «борола ся» за обновеня рабства, націоналізацію хыжмайструв, реабілітацію звірины и скотув и т. п.; року 1915 мобілізованый до войська, и щи того року перейшов на бук Русув, де служив у чешськуй Леґії, а року 1918 перейшов до Черленой Армії; за голову Гашека естонська волода обіцяла 5000 марок, а в Омську на Гашека была выдана назнака до арешту.
29.04.1885 у Празї родив ся Еґон Ервин Кіш (Egon Erwin Kisch; †1948), чешсько-нїмецькый писатель и новинарь.
28.04.1886 в Ужгородї умер Николай Гомичко (*1833), педаґоґ, публиціста, редактор новинкы «Карпат» (1873–1886), актівіста русофілського стрему.
22.04.1889 в Дрездї родив ся Лудвиґ Ренн (правд. Арнолд Фрідріх Фіт фон Голсенау; †1979), нїмецькый писатель, автор антівоєнных, антіфашістичных и дїтськых творув.
28.04.1890 у Брацлаві, Украина, родив ся Петро Різнич (†1966), якый по еміґрації до Войводины (1919) выступив у русинськуй културї як драматик и публиціста, режісер и актер, закладатель театралного умілства межи бачванськыма Русинами; в актерськых кругах мав прозывку Дядя; в ёго память держат каждорочный театралный фестівал Драматичный Меморіал Петра Різнича Дядї, на ёго честь назвали Русинськый Народный Театер «Дядя».
29.04.1892 в Беоґраду заложили Србску Кнїжевну Задруґу, літературное общество, первым предсїдником котрого быв Стоян Новакович, а пудпредсїдником Йован Йованович Змай.
23.04.1897 у Воловум родив ся Василь Степанув Ґренджа-Донськый (†1974), пудкарпатськый поет и фолклоріста проукраинського стрема, котрый первый перейшов на фонетичный правопис и первый быв выданый на Украинї (Тернові квіти полонин, Харьков, 1928).
22.04.1899 (10.04 Юл.кал.) в Санкт-Петербурґу родив ся Владимир Владимирович Набоков (†1977), руського роду америцькый писатель, есеїста и крітик.
22.04.1900 (09.04 Юл.кал.) в Беоґраду умер Йован Джорджевич (*1826), сербськый писатель, історик и орґанізатор театра.
27.04.1904 (14.04 Юл.кал.) в Кієві умер Михайло Старицькый (*1840), украинськый поет, прозаик, драматурґ, актер, режісер, товмач.
24.04.1905 родив ся Роберт Пенн Воррен (Robert Penn Warren; †1989), америцькый поет, романіста и літературный крітик.
25.04.1907 (12.04 Юл.кал.) в Олшанцї на Подолії родив ся Микола Трублаїнї (†1941), єден из майлїпшых украинськых писателюв повістий и повідань про дїти и молодеж.
21.04.1910 Реддінґу, Коннектікут, ЗША, у віку 74 рокув умер Марк Твен (Самуел Ланґгорн Клеменс; *1835), америцькый писатель (Пригоды Тома Соєра).
26.04.1910 у Тузлї, Босна и Герцеґовина, родив ся Меша Селимович (†1982), вызначный модерный романіста сербсько-горватськой літературы: Дервіш и смерть (1966).
26.04.1910 у віку 77 рокув умер Бєрнстєрне Бєрнсон (*1832), норвежськый писатель, Нобелув лавреат (1903).
30.04.1910 у Требушанах (дн. Дїлове) родив ся Марко Бараболя (правд Иван Федорович Рознїйчук, †1945), пудкарпатськый писатель-сатірик.
25.04.1913 у Чернїгові на 49 року живота умер Михайло Михайлович Коцюбинськый (*1864), вызначный украинськый класичный писатель (Тїнї забытых предкув).
24.04.1917 у Сеґеду умер Іштван Темеркень (правд. Steingassner; *1866), мадярськый писатель, од котрого ся учив Александер Маркуш и другі наші лїпші писателї.
23.04.1920 у Шиловцї на Полтавщинї родив ся Григорій (Михайлович) Тютюнник (†1961), вызначный украинськый писатель, посмертный Шевченкув лавреат (1963).
25.04.1920 в Банськуй Быстрици родив ся Петер Карваш (†1999), словацькый прозаик, драматик, театролоґ.
24.04.1921 в Бачськум Петровци родив ся Пальо Богуш (†1997), словацькый дольноземськый поет и есеіста.
28.04.1922 у Червеной Скалї Бансько-Быстрицького края родила ся Клара Ярункова (†2005), словацька прозаичка, авторка переважно молодежно-дїточой літературы.
23.04.1923 у Конюшовцї, Винничина, родив ся Василь Земляк (правд. Вацлав Вацік; †1977), украинськый писатель и кіносценаріста чешського роду, посмертный Шевченкув лавреат (1978).
23.04.1926 у Сеґеду родила ся Ева Яніковська (†2003), мадярська молодежна писателька, котрой творы потовмачили на 30 языкув.
25.04.1927 умер Марко Черемшина (правдиво: Иван Семанюк, *1874), украинськый писатель и публичный дїятель; абсолвовав Винницькоє всеучилище; писав из селянського міліє, дуже богатым народным языком.
22.04.1933 у Косовськуй Полянї родив ся Юрій Піпаш, словникарь, педаґоґ; автор словника гуцулськых говорув (2005).
22.04.1934 у Новум Садї выйшло первоє число новинкы «Заря» (од 20.09.1936 «Русска Заря», орґана Културно-просвітного союза югославськых Русинув.
21.04.1938 на поліґонї Комунарка пуд Москвов росстріляный 43-рочный Борис Андреєвич Пильняк (правд. Воґау; *1894), руськый прозаик, до 1937 рока много раз крітикованый, але и найбулше выдаваный, створившый цїлу школу в совєтськуй літературї.
23.04.1939 у Бачськум Петровци родила ся Вера Бенкова, словацька дольноземська писателька и товмачка.
25.04.1943 в Москві умер Владимир Иванович Немирович-Данченко (*1858), руськый театралный режісер, педаґоґ, драматик, теоретик и реформатор театра, Народный Артіста Совєтського Союза (1936); закладатель Московского Артістичного Академичного Театра (МХАТ, вєдно з К. Станіславськым, 1898).
21.04.1947 в Ню-Йорку, ЗША, умер Віктор Гладик (*1873), Лемко з Кунковой, новинарь, културник и політичный активіста русинськой діаспоры в ЗША, русофілського смера.
22.04.1949 у Кієві умерла Варвара Ивановна Чередниченко (*1896), украинська писателька, яка зачала из дїточой книжкы Дзелень-бом (1915), што выдержала 6 выдань; авторка історичных романув и дїточой прозы, членка літературной ґрупы Плуг.
30.04.1968 в Беровну на Чехах умер Франтїшек Тїхі (*1886), лінґвіста, педаґоґ, новинарь, вызначный изглядователь русинського языка Пудкарпатя, зазначившый близкость нашого языка из западнославянськыма.
21.04.1971 у транспортнум нещастю при Темешвару у віку 31 рокув умер Мирослав Стрібер (*1939), соціолоґ, русинськый поет и крітик.
28.04.1978 в Москві умер Роман Кармен (*1906), філмовый режісер, камераман, сценаріста, новинарь; достав знатости воєнныма репортажами в часї ІІ. Світовой войны (Сталинградська битва, концлаґер Майданек, заятя Берлина, акт капітулаціїї Нїмещины, Норінберґськый процес).
30.04.1979 у Ню-Йорку умер Юліан (Иванув) Ревай (*1899), педаґоґ, редактор журнала Учитель, соавтор єдного з лїпшых русинськых словникув (1928), посланик до чехословацького Сойму, міністер у володах Бровдія и Волошина; при Волошинї перейшов на проукраинську позіцію, на котруй обстав и дале; року 1949 еміґровав до ЗША.
23.04.1981 у Будапешту умер Золтан Зелк (*1906), мадярськый поет, писатель; сын худобного жидувського кантора; до школы ходив у Мішколцу, айбо не выходив; зачав писати; року 1937 арештовали го яко комуністу, но по протестах писателюв пустили го; у войнї быв у роботнум таборї на Украинї, но пережив здоровый; быв комуністичным писателём на службі режіма, доставав награды; в роках 1952–1956 робив дїточый часопис Малый бубнарь; пуддержав револуцію року 1956, за што року 1957 быв засуженый на три рокы (выйшов по пувдруга роках по амнестії).
30.04.2003 в Ужгородї умер Петро (Миколаюв) Скунць (*1942), майбулшый украинськый поет Пудкарпатя, Шевченкув лавреат (1997).
21.04.2017 в Братиславѣ, два тыжднѣ недоживши до 90-роча умер Василь Хома (*1927), дипломат, литературознатель, основатель Сполку русинскых писательох Словакии, Русинского литературного алманаху и Литературной награды Александра Павловича од Литературного фонда Словакии.