Шѣстьпрудовов автострадов ся за селечком Красный Брод розбѣгам сто­пять­десятков в свойом електромобилу в смерѣ на Малу Поляну и з пожитком уга­ням коло густых лѣсов. Погода з драгы ся ми мѣшать з преквапѣньом зо змѣн в краи. Магистрала о хвилю вылетить на широкий виадукт, якый ся еле­гант­ным облуком наднесе над березову долину. Ани зосереженость за во­лан­том и передбѣгаючы авта ми не заборонять спомалити, жебы ми погляд з выш­кы моста мог залетѣти на дно знамой долины. Перед многыма роками ся че­рез до­лину тягала на копець прикра штеркова драга, закривена многыма кри­ву­ля­ми. Тоты закруты в давных часох вытворили фурманы на древяных во­зах, за­со­бу­ючых русинске жительство. За дѣтинскых роков ем о том чула цѣ­лы ле­ген­ды з рос­повѣданя дѣдка, бабкы. При социализмѣ драгу за­ас­фал­то­ва­ли, бо бы­ла не­бес­печна, але позднѣйше зробили нову, ровнѣйшу.

Колишны серпентины давно заросли в природѣ. З вышкы виадукта ся ми од­разу отворять поземска мозаика, а скусене око исто отворять в теренѣ стару кри­вуляту драгу. Точно так, як тоты образкы на великых просторах в Южной Аме­рицѣ, котры мож позоровати лем з аероплана. Потѣшить ня тото интимне по­гладканя властнов минулостьов, але позорность мам уж замѣряну инде. Транс­порт на автострадѣ видителнѣ густне. То цѣлком не од­по­вѣ­дать колись на тых мѣстцях  так облюбеной фразѣ о забытом краи. Русинскый забытый край. Кым забытый? Познать дакто дакого, кто бы о ньом забыв? Не вертати ся ту, е да­что инше, але жебы забыти? То ани Варгол... Навигачна система в автѣ ми од­разу напомяне приближуюче ся одбочѣня до Малой Поляны и на далшы смеры. Не стигам собѣ усвѣдомити, же уж здалека вижу малополянску церковь, як велика зелена табла прикаже зыйти до валалу направо, а такой ся напротив бли­жить нове одбочѣня – смер Микова. У прудѣ авт ледва же скручу волант на авто­страдный выступ и, чудуй ся свѣте, множество авт одбочуе так само, як и я. Ко­леса подо мнов собѣ уживають драгу гладшу як джвередло, але мене что раз ве­це хапле неистота. Е то уж доправды довго, что я не была в тых русинскых кон­чинах и судьба ми надѣлила путованя по иншых частях Землѣ. У бѣгу жи­вота ани не было часу дознати ся, як ся мѣнить край предков и ци ся доправды мѣ­нить. И так не розумлю. Чтось ся ми ту не видить. Де суть ямы перед Малов По­лянов? Де е хоть бы едно лайно перед Миковов? Де ся коло мене жене то­лько авт? Инстинктивнѣ спомалюю и вхожу до послѣдньой мирной закруты, за кот­ров ся мать отворити старый знамый погляд на село мого дѣтства, котрый мам все врытый до памяти. В животѣ то бывать. Настане хвиля, кедь собѣ по­ду­мате: Тото бы-м хотѣв зажити еще раз, тото бым хотѣв собѣ звѣчнити, тото е хви­ля про богов! А преснѣ такый момент чекать теперь мене. Намѣсто бля­ша­ных табуль, скромнѣ ознамуючых валал Микова и ро­дис­ко родичов Анди Вар­го­ла, зазерать на ня огромный склобетоновый облук з неоновым написом – ЗА­БАВ­НЫЙ ПАРК ВАРГОЛЛАНД. Блик, блик, блик. Под фаребнѣ высвѣтленов на­звов весело бликать: Wellcome! Витайте! Vítajte! Ром в униформѣ шиковнѣ од­клонять авта доправа на зберне парковиско. Гамую перед обровскым бил­бор­дом, котрый виртуално презентуе голографичну ма­ке­ту забавного парку. По­зе­рам до нього... Поп-артова галерия. Варголова Virtual-Factory. Кинематичне cту­дио. Художня поп-арт майстерня. Музей 3D Вар­го­ло­вых образов. Арена ожи­веных целебрит зо 60. роков. Огромено вывалюю очи на бомбастичны на­звы. И напрѣк доконалой навигации тридимензионалного плакату ем де­зори­ен­то­вана. Мой погляд ся одразу посуне до рогу голо­гра­фичной макеты на бил­бордѣ. Сканзен Микова. Не вѣрю властным очам – на самом конци ареалу озна­чены дробны объекты в сканзенѣ а на них близко знамы назвы: родна хыжа Вар­головых родичов. Студня Варголовых родичов. Варголова грушка. Хыжѣ Вар­головых сусѣдов. Уж знам, что хочу. Кедьже вступ е доволеный и автом, а парк е дость великый, в кассѣ собѣ купую моторизованый листок за десять евр. Ку листку ми прямо до рук придавають и малый електроничный навигатор. З чуд­ныма чутями вхожу до ареалу. Широка асфалтова драга, лемована бе­рез­ками, ня веде попри чудесных поп-артовых студиях, аренах и галериях, об­сы­паных навщивниками. Но нич з них ня теперь не интересуе, притягуе ня лем една вец на свѣтѣ. Мой електромобил не може про ходцьов ити фришко, а так ся ми видить, же тото плазѣня тырвать неувѣрително довго. Конечнѣ ем на кон­ци. Навщивникы рострачены по забавнѣйшой и высоко атрактивнѣйшой час­ти парку, аж до того кута ся не на­ма­гають. Так ем сама, не обтяжована чу­жов притомностьов. Заставлю авто пе­ред деревяным плотом сканзену. Пере­хожу капурку и вижу дасколько на блѣ­до­синьо побѣленых хыж, деревяну студ­ню, стару наклонену грушку. Моя Ми­ко­ва! Очи ся ми заросять од наплыву по­чуть – не забыла ем тя. Але что то з то­бов зробили? Затяжена тярхов емоций, вы­берам собѣ за цѣль едну з хыж, кот­ра ня притягуе найвеце. Тисну на клян­ку... Сѣни ня вѣтають глинянов подлогов, выдутыма горбочками. Узка кух­ня перед ужаснутыма очами одкрые старый креденець, стол, три святы образ­кы на стѣнѣ и на зелено зафарбленый пец. Изба е ми тыж интимнѣ знама з не­ров­нов подлогов и накриво поставленым бу­тором. Единов змѣнов, что е ин­ша як спомин у памяти, е беспорошна чис­то­та, вычуханы стары ключкы, крас­нѣ постелены постели. Хотьлем о то ся ту ста­ра­ють. Не мам сил ани вшыт­ко дешифровати, як ту мою задумчивость пе­ре­ру­шить острый звук и ми­го­таве свѣтло. Подойму очи и намѣсто деревяной по­ва­лы увижу обровску пло­ху фаребной образовкы. Позерам на ню як до неба. Моя притомность на­истѣ активизовала фотоклѣтку, котра акурат спущать на об­ра­зов­цѣ даяке вир­туалне дѣйство. Вытрѣщеныма очами слѣдую, як ся на образѣ вы­норять з ми­ну­лости импровизованый миковскый амфитеатер на­трѣс­ка­ный пуб­ликов. Мои уха слухають якбы давно почуты слова модераторкы о молодых людях з де­сятьох краин, котры собѣ приправили поп-артовы моделы на фес­ти­ва­лове шоу мод... Помалы ся роспоминам. Як ем была сама на фестивалу в Ми­ко­вѣ перед двад­ця­ть­ма роками... Тот молодый муж под подийом... Шилтовка му закрывала тварь... Награвав собѣ цѣлу программу... Ани он, ани я, ани никто з участников не думав, як звѣчнить русинскый код.

штерковый =шутровый
преснѣ =точно
художный =артистичный, малярскый, умѣлецкый
вец =дѣло, предмет, рѣчь
тярха =терьх(а)
фотоклѣтка =фотобунька
 

Таня Рундесова, Братислава

Жерелa: InfoPyсин  ч.18–19/2010 сс.15–16.