Купованя мелаю в 1919-ом годѣ

Антимонархична револуция в Мадярщинѣ принесла Русинам Народный Закон ч. Х. из дня 21.  децембра 1918, котрым ся установила автономия русинського края, Руской Крайны. Але тота автономия пробыла лем до 21.  марця 1919, бо уже 22–23.  марця туй побѣдила пролетарска револуция, на что уже в конци ап­рѣ­ля край зачало занимати з двох боков чешское и румынское войско. О по­ряд­ках або радше безпорядках того бурного часу повѣдают вспоминкы Ивана Му­ра­ния. 

(Из вспоминок)

Зачатком новембра 1918-го года дойшли вѣсти о концю войны и до Марамороша. Скоро зачали вертати ся дому и воякы из всѣх фронтов свѣта. Як зобрало ся их достаточное число, сей час зачали ся тайны порады о том, як збавити ся панов, Жидов, а головно: якым способом мож бы отобрати землю от тых, у котрых ей много и подѣлити ся нев. Зачим една часть вернувших ся вояков принесла з собов и свои пушкы з мунициев, положеня стало опасным, в якыхсь селах зачали проганяти нелюбимых духовников, нотарев, рабовати Жидов и убивати их. Мѣстна жандармерия бояла ся енергично выступити против анархии, една часть жандармов, и то найбольше енергичны из них, утѣкла, а котры остали ся, не смѣли ани указати ся. Жиды и заможны газды на се вытворили якусь милицию и особенно в ночи з пушками и револверами в руках сокотили себе и свой маеток. Револуцийна анархия не тримала довго. Причина была недостаток хлѣба. Мелай находил ся в руках Жидов и за­мож­нѣйших газдов, слѣдовательно бѣднѣйшы н найбольше револуцийны елементы примушены были помирити ся з ними, и сяк в короткый час цѣлое ре­во­лу­ций­ное движеня перейшло в рукы заможнѣйших елементов и Жидов.

Сяк у селѣ Б. в середнем Марамороши уже зачатком весны 1919. года появили ся молоды жидовскы большевицкы агитаторы, котры зачали орга­ни­зо­ва­ти Русинов в большевицкы клѣткы. Агитация была зовсѣм умѣрена, была обернена выключно в напрям забраня и подѣленя великопанского и ерар­ного маетку, о дѣленю земель заможнѣйших газдов або Жидов зовсѣм не говорило ся. Отношеня уже под правительством Каролия* стали больше-менше нор­маль­ны­ми, и даже большевицка револуция, под панованем котрой середный Ма­ра­мо­рош находил ся всего еден мѣсяць, особенну заколоту не причинила знов изза той причины, же хлѣба уже и у заможнѣйшых газдов тай Жидов не было. Народ инстинктивно чувствовал, же анархия може довести до голодной смерти и зато желал возстановленя порядку, обы мог закупити и довезти собѣ хлѣба. Изза сей причины мараморощане вообще не были против оккупации Ма­ра­мо­ро­ша Румынами, наоборот — велика часть населеня Марамороша радовала ся, бо надѣяла ся на то, же в  Румынии може дешево и легко закупити хлѣба. Жиды — розумѣе ся — были констернованы,* бо Румыны от  зачатку поступали з ни­ми ду­же круто и обдирали их  всякыми можливыми способами, чим  сдѣлали для них  торговлю майже неможнов. Концем  апрѣля 1919-го года недостаток мелаю став дуже чувствительным. Мелай дуже подорожав, бо Жиды не смѣли изза здерок румынского войска достарчати его, але и Русины дуже тяжко могли довезти або донести (дуже много людей пѣшком ходило на низину и на своих плечах тягло 1–2 вѣка мелаю на 100–200 километрову отдаленость), бо часто ставало ся, же на дорозѣ были обдераны румынскыми военными постами, або просто вырабованы.

Сяк стояло дѣло, коли в Б. 3–4 добры газды, видячи, же народ находит ся у великой бѣдѣ и в надѣи на добрый заробок, рѣшили, будь что будь, довезти из  низины хоть еден вагон мелаю. Приготовили ся на дорогу, склали грошѣ и пустили ся в далекый путь. В Хустѣ посѣдалп на огняник (поѣзд) и поѣхали в напрямѣ Сукмара* и Великого Варадина.* На окнах  вагонов не было ни едного цѣлого скла, все было запаскужено, вагоны полны блощицямн и вошми. Поѣзд не ѣздил, а лиш лѣз, часто ставал, бо не было ни угля, ни дров. За Галмином* на каждой третей стации влѣз у вагон якыйсь кондуктор ци контролер, котрый на первый погляд установил, же билеты недобры, треба доплатити 10-20 корон, иначе повымѣтуе их из поѣзда. Что было робиги? Токмили ся и платили. Сяк доѣхали до едного села на дорозѣ межи Сукмаром и Великым Варадином. Найшли едно великое газдовство, в котром закупили еден вагон мелаю з довозом до стации, але без мѣхов, бо мѣхов в том часѣ уже не было.

Теперь зачала ся правдива калвария для них. На стации о вагонѣ, а осо­бен­но о крытом вагонѣ, так як  мелай мал без мѣхов сыпати ся у вагон, никто ани чути не хотѣл. «Не е — тай готово». Смутно ходили около стации, докы якыйсь желѣзничный служачый не надоумил их выразным жестом. «Треба пла­ти­ти!» Подплатили настоятеля стации, нашол ся вагон, привезли мелай, на­сы­па­ли, и самѣ посѣдали у вагон, обы сокотити мелай. Чекают еден день. Нигде нич. Чекают другый день. Нигде нич. Сидят на едном мѣстѣ. Идут ин­те­ре­со­ва­ти ся, чому их не прицѣпляют до котрогось поѣзда. Якыйсь валюх пояснил им, же ось у вагона не е в порядку. Первѣй треба ось намастити. Намастили долонь ва­люха — все в порядку. Знова сидят еден день. Нигде нич. Правѣ приѣзжае по­ѣзд на стацию, просят, обы их вагон прицѣпили. «Як же, сей час!» Але ма­ши­нист изъявляе, же вагон  прицѣпити не мож , бо машина не мае доста силы. 200 ко­рон  машинистови — у машины прибыло силы. Прицѣпили — ѣдут. Слава Бо­гу — радуют ся. На третей стации прителембае до их вагона якыйсь валюх с кле­пачом. Ковтае в колеса, потом дае росказ: «Вагон отцѣпити, бо колеса не в  по­рядку!» Нашѣ Русины уже змудрѣли и 200 коронами привели в порядок  и ко­леса. Ѣдут. На слѣдуючой третей стации то самое. На слѣдуючой знов  ма­ши­нѣ треба было додати силы 100 коронами. Сяк ишло то аж до Хуста. Довоз ме­лаю стоял им больше, як колько заплатили за мелай. Всеж не утратили, даже кра­с­но заробили. Але не на мелаю. Заробили на том , же попри мелаю закупили дас 200 килограммов  мадярского догану, укрыли под мелаем и дома з великым зыс­ком, яко был великый недостаток догану, роспродали. Помогли и людям, и са­мым собѣ, але другый раз мелаю куповати не ишли. Доста было раз. Слава Бо­гу, же з цѣлов шкуров вернули ся.

-----------------------------------
Великый Варадин – Oradea
Галмин – Halmeu, перва стация за румынсков границев од Королева
Кароли Мигай – президент Народной републикы з новембра 1918 по марець 1919
констернованы лат. – настрашены, обезпокоены
Сукмар – Satu Mare

Жерело: Иванъ Муранїй, Оповѣданя и байки. Унгваръ, 1941, ст. 37–41
Фото: архив Fortepan, №3653