Людям не могла угодити мати ани пѣше, ани на осляти

Павлович не часто брал ся до такого любеного не лем у Русинов жанра як притча. Едным такым твором е и притча «Лю­­­дям не могла угодити мати ани пѣше, ани на осляти», што мае вшиткы характерны знакы жанра. Як и многы дал­шы творы поета, входит он до числа лѣпшых досягнень нашой ли­те­ратуры. Пряшовскый литературознатель Юрий Бача реторично звѣ­дат ся:  «Чи та література не була б краще виконала свою місію, коли б була пі­шла за зразком ″Вручанія″ Олександра Духновича та його віршиків з ″Кни­жи­ці читальної..,″ за ″Кумовою вечерею″ та поемою ″Стан бідного селя­ни­на...″ Олександра Павловича та такими його  прекрасними творами, як ″Лю­дям не могла угодити мати ані піше, ані на осляти″, (яких в автора було десятки)…»

Трудно на том свѣтѣ жити.
Не мож людям угодити;
Ещи такый ся не зродил,
Обы каждому выгодил.

Бѣдна вдова з малым сыном
Гев-там по свѣтѣ ходила,
Мала осла, так на него
Свое хлопя посадила.

Идут через едно село,
Там стояла людей купа,
Тоты гласно говорили:
– «О, яка то мати глупа!
Хлопець молодый, здоровый, –
Не могол бы осла вести?
А старая слаба мати
Могла бы ся сама нести!»

Засмучена бѣдна вдова
З плачом далей одходила,
Знявши з осла свое сыня,
Уже теперь сама сѣла.
Сидит мати на осляти,
Хлопенятко идет пѣше,
Но теперь на бѣдну вдову
Десять разы еще горше!
Люди з каждой страны кричат.
— «То немилосердна мати!
Несе ся старуля сама,
А сыня должно бѣжати!»

Што же мае учинити
Псотна, стара, бѣдна мати?
Мала з осла долов зыйти
Або хлопця к собѣ взяти?
— «Подь-ле, сыну, и обое
Будеме ся далей нести,
Ачей, так не будут люде
Урывати нашой чести!»
Но всѣ там переходящы
Сомара уже жалуют,
Бѣдну вдову и ей сына
Зневажают, потупуют.

– «Постой осле, йдеме долов,
А будеме пѣше идти,
Ачей, так нам подарит ся
Людской воли угодити.»
Мама и сын идут пѣше,
А сомара провадили, –
Вера, злостной людской воли
Тым они не угодили.
Высмѣвовал, приплювовал
Каждый, кто ся з ними встрѣчал.
Еден безумный мудерець
З воза так на бабу кричал:
– «О, ты, глупа, спроста бабо,
Чому з сыном пѣше ходиш,
А сомара, так, як пана,
На проходку гев-там водиш?»

Заплакала бѣдна вдова,
Не знаючи, што чинити?
Хотѣла бы, но не може
Людской воли угодити.

– «Ах, Боже мой, як я маю
Людской воли угодити?
Мам-ли осла далей вести
Ци его тут оставити?
Ба як, дораз!… лишу осла?
Раз бы то робота была,
Обы-м про людску бесѣду
Себе осла позбавила!

Подь, сомаре, заткай уха,
Не дбай нич на людску гвару,
Най языки острямбают,
А най дуют пусту пару!
Кедь бы тя але мерзило,
Же нас люди огваряют,
Заграй твою красну ноту,
Люди рады тя слухают!»

Старай ся честно на том свѣтѣ жити,
А по крайней мѣрѣ честным угодити.

Жерело: Александр Павлович. Избранные произведения.
 Под общ. ред. И. С. Шлепецкого. Пряшев 1955. 402–404.