Найцѣннѣйшый дар

Осиф Кудзей не лем байкарь. Байкы, то лем една сторона его творчости, но первыма его умѣлецкыма пробами были робо­ты над церковныма текстами. Въедно з отцем Франтишком Крайняком робили над старославянскыма церковныма текстами, а сам написав коло 50 текстов церковных спѣванок. Его постой ку жывоту и крѣпка вѣра ся одбивать и в его творах.

Хотїв раз Господь пресвятый
Трёх ангелів выпробовати –
Мали принести через ніч
Зо землї найцїннїйшу річ.

Поросходили ся ангелы...
Два уж ся вертають веселы,
Скоро рано понад хмары
Несуть Богу свои дары.

Першый обчекуе одміну,
Ёго дар мать велику цїну –
Він приніс Господу новы
Пацеркы златы ружанцёвы.

Як дар указав ангел другый,
Аж зблїдли фарбы радугы –
Він приніс ку Божому трону
Красно намалёвану ікону.

Господь повів: «Дары немалы,
Суть справды достойны хвалы,
Тїшу ся з них, то правда свята,
Но чекам и вашого брата.»

Уж третій ангел свой дар несе,
Радость наповнюе небеса –
В ёго руках блищить велика
Слыза каючого ся грішника.

А Господь дав одміну ёму,
Тому ангелови третёму,
Бо він хоть пришов найпозднїйше,
Принес тото найцїннїйше.

Кедь щиро жалуеме гріхы,
Мы маме хосен, Бог потїху,
Бо слызы доконалого жалю
Ангелы Господу зберають.

Жерело: Народны Новинкы 2006 №44–46;
Поздравлїня Русинів на 2006 рік, №4

Мальба: Катя Медведева, 2006