По дорозѣ з Босны

В едной каплици пропала золота коруна з головы Пречистой Дѣвы. Зачали глядати и нашли коруну в торнистрѣ* едного вояка. Просять ся го, де взяв, а он одповѣдать таке чудо:

— Коли я молив ся в каплици, Матка Божа зняла собѣ коруну з головы и дала ми на памятку...

Войсковы судьове зглупѣли цѣлком, бо ся уж рихтовали засудити бѣдного воячиска на даколько лѣт гарнизону,* а ту не могли, бо кедь бы го засудили, то выходило бы, же Матерь Божа не може робити чуда, а никто не видѣв, як вояк брав.

Оддали го под суд войсковых капеланох, але тоты тыж не знали, як го судити. Аж в конци вынесли таке рѣшенье, же ани од святых воякови не вольно нич принимати...

Але воякови ся упекло!*

-----------

Гарнизон (ту) — служба в гарнизонѣ за покараня

Зглупѣти — збаламутити ся, сконфудовати ся

Торнистер — вояцка або ученича плоска торба наплечна

Упекло ся кому — щастливо походив

Жерело: Лемко, 1913, число 33, ст. 5. Автор не зазначеный.