Рок теперь одыйшов од нас Иван Петровций. Споминайме за него лем то доброе. Най му буде земля осойска пухом.

Як жив я, цимборе, не звѣдай —
В житю я знав едны лем бѣды.

Йшов, ги по гвоздю, по роках
Всьый у довгах и в болячках.

И — раз! — житя мое минуло,
Хоть вы за вто лем днесь учули.

Я вмер.

И вмерли на вѣкы
Мои довгы и болячкы.

Роздѣлно вшытко в сьому свѣтѣ —
Твое житя и моя смерть:
Менѣ тогды прийшло ся жити,
Ты на земли живеш теперь.

Ходити по земли — вто файно,
Лежати в гробѣ — вто гнитя.
Лем смерть безсмертну мае тайну,
Яку не мае всьо житя.

Хоть тот, тко завтра ся уродить,
За нас не вповѣсть ни словця,
Бо як житя, так смерть не годен
Порозумѣти до конця.

Я вмер. У землю вергли тѣло,
И там — гние.
Душа у небо полетѣла,
И там — жие.

Ушитко вто, што здрѣли очи
Туй, дотеперь,
Я больше видѣти не хочу.
Я сплю. Я вмер.

Я пережив ушиткы бѣды,
Фурт — бетежный...
А одсель я уже лем иду
На Суд Страшный.

Послїднї спüванкы. Ужгород, 2004. Сс. 22–24.