Сповѣдь едного пензисты. Проблемы новоспеченого приватного подузятника
Дня 11. новембра, на 17. сходѣ економистов у Опатии, другый президент Републикы Горватской Степан Месич гварил, же через велику кризу и незанятость у Горватии худобнѣйшы люде примушены кутати по баках на смѣтя, а ку вшыткому тому такых людей ищи проголошуют за якыхсь «приватных подузятников».
Но та лем тото требало! Про малу пензию и я остатны два рокы стал до шоров тых «приватных подузятников», циже вчас рано (док люде сплят) и поздно вечер (жебы мня никто не видѣл) рыю ся по баках и контейнерох на смѣтя у нашом блоку у надѣи, же найду даедну вышмарену пластичну або скляну фляшку. Потом их умывам на дворѣ, сортирую и одкладам на беспечное мѣсто, жебы ми дакто, не дай Боже такое дашто, не украл. Пришли такы часы, же не мож никому вѣрити! Пак рано тоты назбераны и сортированы фляшкы ношу до «Конзуму» або «Унии» и за кажду фляшку красно достану 50 лѣп (копѣек). Потом за достатый пѣнязь у едного приватного торговця куплю хлѣб и молоко, а кедь у том «бизнису» з фляшками был успѣшнѣйшый день як звычайно, та «упаде» и даяка лакотка, як то кава, мала палиночка або свѣжы новинкы.
И так ишли дни и мѣсяци, а я порядно «оперовал» по блоку и не мѣшал ем ся до такой роботы другым пензистам, циже «приватным подузятникам» у другых блоках. Якась дѣлова солидарность мусит быти, ци так?! А пак ми ся нечекано и наглѣ розвалила цѣла тота добрѣ навыкнута и выробена система роботы! Винный был еден «парашутиста» зо сосѣдства! Иде о то, же ся до роботы з фляшками поночи надумал пустити и мой первый сосѣд, котрый однедавна тоже у пензии! Чоловѣк молодшый од мене, могл бы копати кендерицю, обберати яблока, робити даяку трету або стоту роботу, але нѣт! Надумал и он зберати фляшкы! Фляшкы и нич иншое, и то правѣ на моей територии! Та зачал вставати ищи скорше од мене и, док ся не розвиднѣло, «обробил» вшыткы бакы и контейнеры у блоку! Една пословиця рече, же «куды войско перейде, там трава не росте», а я бы повѣл «куды мой сосѣд перейде, нѣт ани едной фляшочкы»! Я му гварил за тоту нелоялну конкуренцию, а он ми повѣл так:
– Борол ем ся у Отцюзной войнѣ, жебы ем мал горватску державу, демократию и слободу, та ачей теперь, на миру Божом, у державѣ Горватской, демократии и слободѣ можу гребсти ся по баках!
Добрѣ, чоловѣк ся борол, та мае якысь права, але што з моима правами?! Загроженое ми право на роботу, на слободу рушаня и гражданску можность тратити пѣнязи, а вѣроятно ищи даякы другы права, лем ся такой не можу здогадати, якы, а попри тому у приватного торговця, де ем донедавна фурт куповал, теперь упал оборот, зато же мня там нѣт ани близко. Через такы новонасталы обстояня найбаржей терплю я особнѣ, але и Министерство торговли (кедь вообще е такое министерство!), а то значит и наша держава вцѣлови! Так дале не йде, и я ся бизовно буду дакому поносовати, або напишу даякое отвореное письмо и пошлю го до даякых денных новинок!
Пензиста Янко
(выслухал и записал
Яким Пушкаш)
Жерело: Нова Думка №154 8/2009. 34