Свѣт любит клопоты, все иде до псоты
Минули ся златы рокы,
И стрѣберны сполу,
Так тыж и мѣдяны часы
Упали до долу.
Теперь желѣзны пануют,
Облѣпены з глинов.
О, кебы ся могли стати
Лем еднов годинов!
Не змѣшат ся до едности
Зо желѣзом глина,
Еден другого не терпит,
Бо каждый подлина.
Не есть любви у народов,
Каждый иде – бочит,
Видно, же ся цѣлый свѣт тот
До загубы точит.
Самохтяч чловек чловека
Приводит во псоту,
В краю, в мѣстѣ, в селѣ, в домѣ,
Не найдеш едноту.
В цѣлом свѣтѣ неправости
Лем суть в облюблѣню,
Грѣшный есть свѣт, в неправости
Летит к загублѣню.