Треба нам на заход

Онда Де Щицца, майже мѣстный аристократ, котрого предкы приселили ся колись то з украин­ского Про­ванса и пензиста Мишо Небай, мѣстный прос­так, бесѣдовали собѣ мир­но за пивом.

– Честно вам повѣм, Ондику, доднесь ем не пересвѣдченый, же у нас вой­на. Но, десь там, у Киевѣ, матери городов рускых, перебачте, украинскых, штось палят, роз­бивают, памятникы обаляют, стрѣляют, рѣжут. Пак тото мир­ны про­тесту­ючы. То вам каждый прогрессивный челядник повѣст. Ушиткы про­грессивны ра­дия з цѣлой прогрессивной Европы, Америкы и прилеглой вселеной на еден голос тото гойкают. Не мож тых людей рушати. То щи дѣти. Най собѣ палят, розбивают, обаляют, стрѣляют, рѣжут. А на перепочинок най ся молят за Украину. Пак, кедь мирны дѣти бавлят ся, та не може то быти вой­на.

  Аристократ Де Щицца дипломатично прикывнул.

– О, yes! Правда, була у мене дещиця сумнѣву, що мабуць, декаму не спа­до­баецьця кали ёго паляць, раз­биваюць, валяць, стрѣляюць и рѣжуць. Ничога падѣбнага, ниц такова. День по дневи, мѣсяць по мѣсяцеви стаяць, и стаяць, и терпляць. Падобаецьця им. Проста мазахизм якийсь. Видаць та зара­за ад нас, зи Львова прийшла. Все прагресивне ад нас иде, а як же, то ж вѣдома.

– Гей, гей, – соглашае ся Мишо. – Пак, и ту у нас на прогрессивном ка­на­лѣ Тиса, една до невозможности розумна новинарька Таця из европейскым ма­дяр­скым прозвищом фурт нам припоминат, же там, у Львовѣ, центер кедь не свѣтовой, та хоть лем украинской културы. Вшак она лѣпше знае, она одты приван­дро­вала, и теперь туй у зачуханом Ужгородѣ мусит носталговати и ве­ґе­товати.

Ондикови ся засвѣтили очи. И никус не бизовно, же лем од выпитого пи­ва. Увидѣл ся миссионером културы, министром за­гранича прогрессивного Прованса. О, yes! Там, у центру кедь не свѣтовой, та хоть лем украинской културы, понаставляли сьме всякы прогрессивны памятникы истинно про­грес­сивным героям. А межи нима панови Бандерѣ и геррови Мазохови. А туристы ходят там и того европейского бронцо­вого Мазоха за перст мацают, онь му го вы­чухали, же ся свѣтит, як щирое золото. Европейскы цѣнностѣ.

– Напевна ата зараза ад нас пѣ­шла па всѣй нашѣй пра­гресивнѣй неньцѣ. И ось нава забава у нас настала. Аднѣ из Тризуба имени Бандеры паляць, раз­биваюць, валяць, стрѣляюць и рѣжуць, а другѣ из Беркута имени Мазоха стаяць и упиваюцьця ся, разкашуюць сабѣ в оццѣй на­са­ло­дзѣ.  

– Я чоловѣк старый, простый, непрогрессивный. Може дашто не ро­зу­мѣю, – правит Мишо. – Нас так учили, же дѣти мают ходити до школы, учити ся, честовати старшых. Повнолѣтны мают честно робити, сокотити родинны цѣнностѣ. А вшиткы въедно мают честовати  и сосѣдов, и чужых, не красти, не бити ся, не робити шкоду чужому маетку и здоровлю.

– О, та то ви гець застарѣли, пане Мишелю! О, yes! Sicherlich застарѣли! Не смѣшѣць мене. – Онда затряс ся цѣлым брюхом и утер слызы. – Наши дзѣтки павиннѣ буць сучаснѣ, еврапейськѣ. З аднова боку, вани павиннѣ спѣваць, и танцюваць. Спѣваць гимн и танцюваць пѣд прагресивну европейську дудку. З другова боку – скакаць. Хто не скаче, той маскаль. А вани ж не маскалѣ. А решта – то пережитки. Вани, тобта пережитки, проста ще не вмерли.

Мишови у головѣ вшитко ся поплело и ани только уже не розумѣл, як до­кы не засѣли были за пиво. Але при тых послѣдных словах штось му закапчало.  Гей, «ще не вмерла», «то пережитки», «згынут наши вороженькы». И он ся вернул до старой те­мы:

– Реку вам, Ондику, доднесь не можу повѣровати, же у нас война. Же на нас Рос­сия напала. То правда, же интернет и телевизия онь розпалены. Лаплют ся шпионы, на граници ся коплют ровы, концентруе ся танкова сила, авиация. То вам не фигля. Айбо люде украинскы штось даякы непатриотичны, ходят собѣ по роботѣ, на Великдень – по обливачках, святят паску.  А днесь иду пиля стадиона, а там дѣтвакы, што до войська наруковали, учат ся стрѣляти из воздушных пушок. Из такых и я даколи стрѣлял дѣтваком, при Совѣтах, коли то мня няньо водили у стрѣ­лище. Айбо тому уже даз шѣстьдесять рокы, ани война тогды у нас не была. А што, коль одтогды Москалѣ завели даякы мо­дернѣйшы пушкы? Та, видав, не буде доста лем скакати, спѣвати и танцевати?    

– От тепер бачу, що и ви патриот, пане Мишелю. Спѣваць, танцюваць и скакаць – то для себе. А для варагѣв – палиць, раз­биваць, валяць, стрѣляць и рѣзаць. Маскалѣв на ножѣ! И вражаю злою кровю волю акрапиць! Слава Украинѣ! Захѣд нам дапаможе! Треба нам на захѣд!

И при тых прогрессивных словах простак Небай, а за ним и аристократ Де Щицца, обое нараз якось усвѣдомили собѣ, же поправдѣ пилно треба им на заход. Не тот европейскый, а лем тот, перебачте, де щит ся, такой ту при пиварни. И так ся тота дискуссия о высокых и патриотичных дѣлах закончила на взаимну контет­ность. Наш подкарпатскый чоловѣк знае ся догваряти.