Учителѣ и фалшивы пророкы

Сперед двадцять роками, як на чудо, вшиткы трагичны проблемы и по­явы днешной Украины уже было видко и мож было предвидѣти, бо спочивают они в манкуртствѣ, в утратѣ твердых моралных норм и христианской традиции предков. Зато сесь невеликый начерк не стратил на ак­ту­ал­ности ани по два­дцять роках. Чорное зостават чорным, а бѣлое бѣ­лым, хоть бы як модерны успѣхы психологии, методы и техно­ло­гии громадного вплыву на лю­дей не дозволяли навѣяти противное.

На широкой площи коло пошты, у самом центрѣ города добрѣ-м не скамянѣл. Навстрѣч ми пышновитов и маестатнов хожов з верхных терас зоступовал... есесак, цѣлый закукленый до чорного едностроя. Старшы люде дискретно ся обзерали, моложава безрозлично жвала гуму. Найвеце ся ми за­рыло до памяти, же быв то цѣлком молодый хлопчина. Тот мог знати войну лем из кина и книжок. Писал ся рок 1994, 11. марець. Наш стародавный Ужгород собѣ облюбили московскы, одесскы и иншы филмарѣ, бо своев довоеннов архитектуров припоминат типовый кутик Европы.

Така ми пришла перва думка. Но теперь, в тых голодных и каламутных часах уже давно ся нич не филмуе. Аж по даяком часѣ похопил ем, што тото ся робит. Схожовали ся на свой злет украинскы националисты, жебы перед вшыт­кым свѣтом голосно ославили 55-роча фашистичной Карпатской Украины, баб­ко­вой державкы, выголошеной под веденем галицкых военскых емиссаров в еден час з тисовсков републиков. Тота бутафорна державка пережыла лем пару дни, пак была вычищена од галицкых привандровалцев гортиевскым войськом. Силнѣйшый звѣрь пожер слабшого. Дахто бы на то лем стиск плечами: то ми чудо, де ся не найде днесь еден-другый збѣснѣлый неофашиста. И тото правда. Перед пару роками видѣл ем у Кошицях у тихой музеалной уличцѣ недалеко од центра на стѣнах написы: CYGANOV DO PLYNU! Не так давно з почестями погребли в мадярской землѣ позостаткы Гортия. Не хочу спорити и выважовати мѣру заслуг Тиса, Гортия ци Волошина перед своима народами. Но знаю таку универзалну мѣру, яка не мѣнят ся на каждом историчном поворотѣ. Тов мѣров суть людскы нормы сполужытя, вы­робены в глубокых давностях, и вы­кар­бо­ваны  в нормах христианскых при­ка­зань. Тоты нормы говорят о ровности вшит­кых людей, а значит категорично одмѣтуют фашизм. Наколько знаю, в Слова­кии, ся 14.-15. марець официално не славит, а Йозеф Тисо не ставит ся на по­диум творця словацкой державности, не сходят ся Словакы зо вшыткого свѣта, жебы вымогати одкрытя его памятников, фундаций итп. Погреб Миклоша Гортия тоже мав приватный характер, а было бы ганьбов про каждого державного функционера мати з тым дашто заедно.

Иншак то е в днешнюй Украинѣ. На нынѣшном историчном поворотѣ но­вы владарѣ дают порозумѣти, же не сут против тому, жебы ся переписала на­ново история, а може и моралны нормы. Президент Кравчук заслав до Ужго­роду поздравну телеграму до великого святку 15. марца. Пак не чудо, же такой нашли ся учены, якы суть готовы тото новое державное завданя выповнити. Зато зась 11.-12. марца до Ужгороду ся зыйшли «300 учасників міжнародного форуму з 8 країн світу», жебы выслѣдком своих новых глубоконаучных выгля­довань рекомендовали:

- президенту Кравчуку выголосити 15. марца державным святком;

- владѣ Украины найти позостаткы президента А. Волошина и погребсти на отцюзнинѣ;

- веденю ужгородского универзитета назвати тото всеучилище именем А. Волошина, фундовати волошинску стипендию;

- владѣ Пудкарпатя поставити памятник А. Волошину «як найвидатнішій постаті Закарпаття XX ст.»;

- (безадресно) «засудити всі антиукраїнські випади сучасних русинських ідеологів і політичне русинство взагалі як безпідставні та науково безпомічні, бо вони завдають шкоду загальноукраїнській ідеї».

Тото «прийнято одноголосно на підсумковому пленарному засіданні конференції 12 березня 1994 року», што само собов е уникатным научным резултатом и дуже припоминат нам тоту едноголосость, котру так брилиантно вымалевал Орвелл. Первый раз таку едноголосность досяг у Подкарпатской Руси якраз Августин Волошин, коли заказал вшиткы политичны партии окрем УНО (Украинское Националное Объеднаня) и настановил еднопартийный ре­жим украинскых националистов, про иншакмыслячых и неукраинцюв отворил концентрацийны таборы, не допустил русинскых кандидатов до выбера­нок 12. фебруара 1939, сфалшовал резултаты тых выберанок, чим выдатно посилнил «загальноукраїнську идею». У переддень выберанок посланцѣ парламента чехословацькой републикы Петер Жыдовскый и Иван Пиещак в протестѣ А. Во­лошину писали: «При такых условиях выбор не буде слободным выявом волѣ народа, а буде то лем резултат грубого насилства». О вшыткых такых фак­тах днесь голосно говорити не яло, айбо тым выкричнѣйше ся дае вшыткым на знамость о успѣшной роботѣ конференции, яка «научно» доказала «що ідею загальноукраїнської єдності принесли на Закарпаття не воїни Радянської Армії восени 1944 року,... що процес українського національного самоусвідомлення на Закарпатті має глибоке коріння».

У нас на стѣнах щи не пишут то, што-м видѣл у Кошицях. Но слоган «Русинів геть з Закарпаття!», кедь вѣрити новинкам, уже появлял ся на митингах. Передвыборна агитация у марцу 1994 на стѣнах Львова имжила гаковыма крестами, як двѣ капкы воды подобныма до тых, сперед полстороча. Мож бы ся лем порадовати, же тристо фахманув з 8 держав прийшли до такой едностайности. Мож бы, кебы ся занимали науков, а не политиканством. Бо наладити нормалный людскый живот е кус складнѣше, як выдумовати научны обоснованя фалшивых политичных доктрин, а проблема неедностайности Украины тяжко бы ся рѣшила и так, кебы зась отворити концентрачны таборы и на каждум розѣ покласти есесака. Тым вецей, же национал-шовинистичну политику поддержуе менше як еден процент людей, што ясно указала перва рунда голосованя до парламенту 27. марца. Може бы тоты грошы, што кош­то­вала така и подобны конференции лѣпше схосновати на проведеня анонимного списованя людей, жебы ся дознати колько их и напрѣк непрестанному застра­шо­ваню поважат ся Русинами?

Жебы-м тоту чорну мару розвѣял сперед оч, хотѣл бы-м закончити на веселшуй нотѣ. Окрем родных русинськых спѣванок найвеце люблю и до бесконечна бы-м слухал грецькы. Ци спѣваков и спѣвачок грецького родоводу. Може зато, же дае ся у них одчути божзьку искру той едной з найбла­го­род­нѣй­шых и найвысшых култур, выробеных людством. Перед выше тысяч роками при­шли до нас Учителѣ. Были лем з едного невеликого грецкого варошика Солуня. А были лем двоме. Но того было доста! Бо несли семенко правды и лю­бо­ви, котрое у нас пустило корѣня и дало добры плоды. И зато теперь годны сьме ся всокотити перед россѣвачами неправды и ненависти, жебы не дати им спу­стошити нашы душы, выортовати з них тото нашое, што сьме достали од предков.

Бо незабытны слова едной зо спѣванок дуета Марты и Тены варуют нас, «же душа пуста стават ся пустынев, котра нич не родит».

Жерело: Русин (Пряшово) № 2/1994. Ст.19–20.