1–10. марець в истории
06.03.1475 в Капрезе уродив ся Міхаел Анджело Буонарроті (†1564), таліанськый ренесансный малярь, скулптор, архітект и поет.
07.03.1573 Иван Федоров обновив печатаня книг у Львові.
06.03.1619 в Паріжу родив ся Сірано де Бержерак (Hercule Savinien Cyrano de Bergerac; †1655), французськый драматик, поет, памфлетіста, зачинатель научной фантастикы.
05.03.1755 в Предмеру родив ся Йозеф Іґнац Байза (†1836), католицькый фарарь, писатель; пудпоровав реформы Йозефа ІІ. и просвітенськый абсолутізм; став ся автором первого словацького романа Rene mladenca prihody a skusenosti, котрый быв первов пробов выхоснованя літературного словацького языка у краснум писемстві.
10.03.1772 в Ганноверу, Нижна Саксонія, родив ся Фрідріх фон Шлеґел (†1829), нїмецькый писатель, крітик, лінґвіста, теоретик нїмецького романтізма.
00.03.1783 в Золотарёві Хустського округа родив ся Василь Довгович (†1849), член Мадярськой Академії Наук, русинськый поет, якый писав по латинськы и по русинськы.
07.03.1785 в Мілану родив ся Алессандро Манцоні (Alessandro Francesco Tommaso Manzoni; †1873), таліанськый писатель-романтик.
07.03.1811 в Омпіталу (дн. Доляны) Братіславського края у віку 60 рокув умер Юрай Фандли (*1750), словацькый просвітный писатель, священик, пчоларь.
09.03.1814 у Моринцях Кієвськой ґубернії родив ся Тарас Шевченко (†1861), украинськый поет-будитель.
05.03.1815 (21.02 Юл.кал.) у Ставнум родив ся Иоанн (Иванув) Раковськый (†1885), священник, редактор, новинарь, автор учебникув, пропаґатор великоруського языка як литературного про Русинув.
02.03.1817 родив ся Янош Арань (†1882), мадярськый поет, приятель Шандора Петевфія; року 1846 написав поему Толді, котра принесла му знатости; своима творами значно збогатив язык.
02.03.1821 у Балашшадярмату родив ся Кароль Берці (†1867), писатель, публіціста, товмач, дописный член МАН (1859), котрый заложив первый ловецькый журнал у Мадярщинї, Листы из круга вадаскы и ловецтва (1857); товмачив Дікенса и Пушкина.
04.03.1824 в Банськуй Быстрици родив ся Ґустав Казімір Зехентер-Ласкомерськый (Zechenter-Laskomersky; †1908), словацькый прозаик и публиціста.
04.03.1827 (21.02 Юл.кал.) на Полтавщинї родив ся Леонід Глїбов (†1893), украинськый байкарь; в рр. 1861–1863 выдавав новинку Черниговский Листок.
04.03.1832 у Паріжу у віку 41 рокув умер Жан Франсуа Шампольон (*1790), французськый языкознатель и еґіптолоґ, котрый року 1822 вынайшов, як прочитати еґіпетські гіероґліфы; року 1798 жадный славы ґенерал Наполеон Бонапарте взяв из собов до Еґіпту ґрупу зглядователюв и писателюв, обы зачали сістематично штудіровати еґіпетську културу; року 1799 у делтї Нілу найшли камінь, на якум быв росказ Птолемея V., короля еґіпетського, написаный окрем гіероґліфув щи у двох языках, так отворила ся возможность научити ся читати гіероґліфы.
04.03.1837 руськый поет Михайло Лермонтов трафив до арешту за верш Смерть Поета, написаный на смерть Александра Пушкина.
04.03.1852 (21.02.1852 Юл.кал.) у віку 42 рокув у Москві умер Николай Василієвич Ґоґоль (*1809), руськый писатель.
10.03.1856 (26.02 Юл.кал.) у Вршци, Темеш, умер Йован Стерія Попович (*1806), сербськый писатель, первый сербськый комедіоґраф.
02.03.1859 у Переяславу Полтавськой ґуб. родив ся Шолом-Алейхем (Соломон Рабинович; †1916), вызначный жидувськый писатель Украины; писав ідішом, гебрейчинов и по руськы; року 1905 еміґровав на Запад.
10.03.1861 у Санкт-Петербурґу умер Тарас Шевченко (*1814), украинськый будитель, и быв погребеный на Смоленськум теметові, но неодовго перезахороненый у Канєві.
10.03.1868 у Малуй Бережници, Земплин, родив ся Михайло А. Поливка (†1944), педаґоґ, автор читанок и букваря про школы войводянськых Русинув; погребеный в Р.Керестурї, автор первого учебника про югославськых Русинув (Читанка за ІІІ. класу южно-руских основних школох, Сримски Карловци, юлій 1920).
01.03.1874 в Бачськум Петровци умер Міхал Ґодра (*1801), учитель, словацькый поет, языкознатель, публиціста.
07.03.1875 у Шелестові, Береґ, родив ся Гіадор (Миколаюв) Стрипськый (†1946), русинськый лінґвіста, етноґраф, бібліоґраф, товмач.
10.03.1875 (26.02 Юл.кал.) в Трієсту, Австро-Мадярщина, у віку 28 рокув умер Светозар Маркович (*1846), сербськый новинарь, публиціста, літературный крітик, філозоф и політик.
02.03.1881 у Любинцях, Галичина, уродив ся Володимир Бирчак (†1952), галичськый писатель, педаґоґ-украинизатор Пудкарпатськой Руси, автор моноґрафії «Літературні стремління Підкарпатської Руси» (1921).
03.03.1881 у Мартинї Жілінського края у віку 55 рокув умер Мікулаш Штефан Феріенчик (*1825), словацькый писатель, новинарь, редактор Пештбудинскых Відомостей, потовмачив Ґоґолевого Ревизора.
09.03.1881 у Туряреметах уродив ся Иван Муранїй (псевдо: Иван Бростяник; †1945), математик, дописный член МАН, русинськый літератор, товмач Віліама Шекспіра, Чарлза Дікенса, Едґара По.
01.03.1883 в Сеняві, Лемковина, родив ся Григорій Гануляк (†1945), властник выдавательства, лемковськый писатель, новинарь и редактор.
10.03.1888 в Ліптовськом Микулашу родив ся Иван Стодола (†1977), дохтор, словацькый драматик и автор мемоаровых книг.
01.03.1891 в Шабацу, Сербия родив ся Станіслав Вінавер (†1955), сербськый діпломат, поет, есеіста и товмач.
07.03.1891 у Відню умер Франц Миклошич (Franz Xaver Ritter von Miklosich; *1813), вызначный австрійськый и словенськый славіста, лінґвіста, педаґоґ.
07.03.1893 у Ракові Жілінського края родив ся Тідо Ґашпар (правд. Йозеф Ґашпар; †1972), моряк, діпломат и културный дїятель, плодный словацькый прозаик и публиціста.
05.03.1895 (21.02 Юл.кал.) в Санкт-Петербурґу у віку 64 рокув умер Николай Семенович Лєсков (*1831), руськый писатель.
08.03.1896 у Вербовом Тернавського края родив ся Ело Шандор (†1952), фінансовый урядник, прозаик, публиціста, автор тритомного гуморістичного романа Сватко Раґан з Брезовой и многых повідань, репортажи з СССР в роках 1936, 1937.
03.03.1898 у Беоґраду родив ся Растко Петрович (†1949), сербськый діпломат, писатель, есеіста, автор популарных подорожных записок.
03.03.1899 (19.02 Юл.кал.) в Єлісаветґраду (дн. Кіровоґрад) родив ся Юрій Олеша (†1960), руськый писатель, драматик,сатірик.
01.03.1901 в Имстичові родив ся Петро Світлик (†1973), русинськый педаґоґ, етноґраф, текстарь и композітор-самоук, фолклоріста.
05.03.1903 у Санкт-Петербурґу родила ся Наталія Забіла (†1985), украинська дїточа поетка, повістярька, драматичка, перекладчиця, авторка булше як 200 книжок.
07.03.1903 в Бреддок, Пенсілванія, ЗША, родив ся Томас Белл (правд. Adalbert Thomas Belejcak; †1961), америцькый романіста русинського рода, сын Михала Белейчака з Нижного Тварожця, автор шістёх романув, з котрых бестселлером став ся роман «З того пеца» (1941, 1976) о трёх ґенераціях русинськых вывандрованикув.
09.03.1903 у Бартону, OH, USA , родив ся Франьо Краль (†1955), словацькый учитель, прозаик, поет и драматик, писатель молодежной и дїточой літературы.
09.03.1903 в Ліптовськум Мікулашу родив ся Даніел Окалі (†1987), лївицёвый політик, поет и літературный крітик, основатель часописа DAV (1924–1937, вєдно з Андреём Сірацькым и Владом Клементісом).
06.03.1905 в Опаві, Моравія, родив ся Ярослав Затлоукал (†1958), педаґоґ, чешськый поет, літературознатель. публиціста, котрый много писав о Пудкарпатськуй Руси и інспіровав ся нев у своюй поезії.
07.03.1905 в Мартіну Жілінського края у віку 82 рокув умер Ян Францісці-Рімавськый (*1822), словацькый прозаик, поет, публиціста и товмач.
01.03.1906 у Санкт-Петербурґу умер Мігай Зічі (Zichy; *1827), малярь и ґрафик, піонер мадярського рисунка, котрый быв придворным малярём у Санкт-Петербурґу, майзначнїйші роботы лишив у ґрафицї, особено ілустраціях (Лермонтов, Ґоґоль, Пушкин, Арань, Петевфі, Модач).
06.03.1909 в Лемберґу (дн. Львов) родив ся Станїслав Єжі Лєц (†1966), вызначный польскый писатель, філозоф, што добыв собі великой знатости афорізмами, які роками печатали ся у варшавськых новинках, были товмачені в заграничу и публиковані фантастичныма накладами.
06.03.1911 у Врутках Жілінського края родив ся Ян Боденек (†1985), словацькый писатель, автор книг про дїти и молодеж.
03.03.1912 у Сірмі, Уґоча, родив ся Юрій (Юрув) Костюк (правд. Костьо, †1998), фолклоріста, компоніста, музикознатель.
04.03.1915 в Скалици родив ся Павел Бунчак (†2000), словацькый поет, літературознатель, публиціста и товмач.
01.03.1917 Мігай Бабич поставеный перед суд за антівоєнный верш Fortissimo, и конфісковали число журнала Nyugat из тым вершом.
07.03.1924 родив ся Кобо Абе (правдиво Абе Кіміфуса; †1993), вызначный японськый писатель, драматик и сценаріста (Піскова жона, 1962); учив ся од Кафкы, Рілке и Чапека.
06.03.1925 у Дубровцї родив ся Юрій (Юрув) Качій (пседонімы: Г.Дубровськый, Г.Дикый, Ю.К.; †1966), русинськый поет и товмач, етноґраф, фолклоріста, музейник; писав по руськы, а пак по украинськы.
02.03.1926 у Буштинї родив ся Василь Комендар (†2015), ученик Миколы Грицака, академик, защитник флоры Карпат, літератор, лексикоґраф русинськых назв ростин.
06.03.1927 в Аракатацї, Колумбія, уродив ся колумбійськый писатель Ґабріел Ґарсія Маркез (Garcia Marquez, Gabriel; †2014), приятель Фідела Кастра, Нобелув лавреат (1982) за творы, де переплетена фантастика и реалность; роман Сто рокув самотности выданый многоміліонныма накладами на 30 языках.
02.03.1930 у віку 44 рокув умер на гертику Девид Герберт Лоренс (David Herbert Lawrence; *1885), анґлійськый писатель, представитель духовной опозіції сопротив сухопарности вікторіанськой епохы, чиї творы бывали часто заказаны яко неморалны.
03.03.1931 америцькый Конґрес прияв поезію Френсіса Скотта Кі (F. S. Key, 1779–1843) Звіздато-партичкастый Прапор (1814) за текст гімны.
03.03.1932 в Білянцї на Лемковинї родив ся Павел Стефановськый, русинськый писатель, новинарь, етноґраф и културный дїятель.
01.03.1936 в Дебелячи, Югославія, родила ся Анна Дудашова, сербська и словацька писателька и товмачка.
06.03.1939 у Кієві отворили помяник Тарасови Шевченку.
10.03.1940 у Москві умер Михаил Афанасьєвич Булґаков (*1891), руськый писатель и драматик (Майстер и Марґаріта); достав медицинськоє образованя и робив дохтором в рр. 1916–1919, тогды лишив ся и оддав ся літературї; року 1921 переселив ся до Москвы, де жив до смерти; главні ёго творы через недовіріє режіма не могли быти появены при живум авторї: Песёє сердце (1925) появено року 1987, Майстер и Марґаріта (1940) появеный року 1966–1967.
07.03.1945 в концлаґру Нацвайлер у Шімберґу, Нїмещина, умер Дмитрій Вакаров (*1920), русинськый поет, антіфашіста.
09.03.1946 у Будапешту у віку 71 рокув умер Гіадор Стрипськый (*1875), русинськый лінґвіста, етноґраф, бібліоґраф, товмач, родом из Шелестова.
06.03.1947 у Львові умер Філарет Михайлович Колесса (*1871), збератель музикалного фолклора Пудкарпатя.
04.03.1949 родив ся Володимир Ивасюк (†1979), украинськый поет и композітор; автор 107 співанок, 53 інструменталных творув; співанкы Ивасюка звучат и днесь.
02.03.1951 в в Новум Містї над Вагом умерла Людмила Подъяворинська (правд. Різнерова; *1872), словацька писателька, закладателька модерной дїточой літературы.
05.03.1955 у Руськум Керестурї родив ся Янко Хома, русинськый новинарь, фолклоріста.
02.03.1956 родила ся Марія Якым, русинська дольноземська поетка.
03.03.1958 у Братіславі умер Иван Краско (правд. Ян Ботто; *1876), словацькый прозаик и поет модерны.
01.03.1960 в Мартинї умер Франтїшек Гечко (*1905), словацькый соцреалістичный писатель поезій и проз о селянстві: Деревляна весь, Черленой вино.
05.03.1966 у Домодєдову умерла Анна Андр. Ахматова (правд. Гуренко; *1889), славна руська поетка; погребена в Ленинґрадї.
04.03.1967 в Заґребу умер Владан Десница (*1905), сербськый и горватськый писатель, вызначный стіліста и псіхолоґ.
06.03.1973 у Денбі, Вермонт, умерла Перл Бак (рож. Сайденстрікер, Pearl Sydenstricker Buck; *1892), америцька романістка, авторка майже 20 романув, інспірованых дожитями з дїтства и молодости, стравеных у Хінї, де єй отець служив місіонером; Нобелова лавреатка (1938).
03.03.1975 у Будапешту умер Ласлов Неймет (*1901), спозначный представитель мадярськой прозы ХХ. ст.
07.03.1975 у Міддлтавн, Ню-Йорк, умерла Кейт Середі (Kate Seredy; *1899), писателька, ілустраторка, яка достала Медаль Нюбері як ліпша дїточа писателька (1938); у своих книгах пропаґує про Америчанув історію Мадярщины.
07.03.1976 у Братиславі у віку 72 рокув умер Йожеф Нижнанськый (Jozo Niznansky, *1903), словацькый писатель, публиціста и товмач, автор авантурных и историчных романув (Пригоды Морица Бенёвского).
06.03.1980 у Кієві вчинив самогубство Григір (Михайлович) Тютюнник (*1931), вызначный украинськый писатель, посмертный Шевченкув лавреат (1989).
10.03.1982 в Братіславі у віку 77 рокув умер Міло Урбан (*1904), словацькый прозаик, найбулше познатый саоим романом «Живый бич» (1927) о первой світовой войнї и повойновум вывою.
07.03.1985 в Пущикові Великополського воєводства умер 90-рочный Аркадий Фідлер (*1894), полськый писатель, автор книг о довгых подорогах, котры подъяв в роках 1927–1982.
06.03.1998 умерла Жужа Раб (*1926), мадярська писателька и поетка, мадярсько-руська філолоґічка, прекрасна товмачка Анны Ахматовой, Михаила Булґакова и Чінґіза Айтматова.
05.03.2001 в Братіславі умер Карол Розенбаум (*1920), словацькый літературознатель и крітик.
02.03.2003 в Сримськуй Каменици, Войводина, у віку 71 рокув умер Мирослав Кривак (*1931), новинарь , редактор, словацькый прозаик и товмач.
03.03.2010 у Беоґраду умер Момчило (Момо) Капор (*1937), сербськый писатель, есеіста и малярь.