Перед 10 роками, 9. новембра 2005 русинска наука дознала тяжкой утраты: пе­ред­часно невылѣчима хворота забрала Ишт­вана Удвари, мадярского сла­висту, ве­ли­ка часть робот котрого была о Русинах, их истории, языку и литературѣ. Дяку­ю­чи ему достали другое житя многы исто­рич­ны документы и памятникы лите­ра­ту­ры и языка Русинов. Хоть, природно, же его научны статьѣ написаны так, як то по­жадуе уста­новена практика публикаций, але многы з них написаны так живо, же читаются, як интересное повѣданя, кедь вылишиме з увагы безконечны одкликаня на жерела. Ту на споминку подаме покуртано фрагменты зо статьѣ «Марияповч, даколишный набоженскый и културный центер Русинов», розумѣе ся без науч­ного аппарата.

Марияповч, даколишна Мекка Русинов

Вѣсть за слезящий святый образ Марии переносит нас до далекого 1675‑го года и вѣстит она за сына тогдышного сельского бирова Ласлова Чиг­рия. Исе он быв 1675‑года помѣнив ся, же на радость выслобоженя од турецкой поробы даст вымальовати образ Марии. Помѣнок свой и додержав…

Сесь образ святый слезив упервѣ 4‑го новембра 1696‑го года, исе недѣля была. Пак дале  из перерывами до 4‑го децем­бра 17 дни было такых, коли  «пла­кав». Ягерскый римокатолицкый владыка дав провести ослѣд, перебѣгом котрого выслухали 53‑ох людей, межи нима и цѣсарьского генерала Кор­бе­лия, майвысшого команданта затисянскых войск. Случай сесь учинив незначное нѣрское селочко жупы Заповч вѣстным и славным не лем по Мадярской краи­нѣ, но й гет за границями. Знае ся, ож у тых такой часах ай из Клокочова вѣсти­ли за слезящий образ Марии. Ослѣд ся закончив выказаньом факта слезѣня. Тогды пак слезящий святый образ на жаданя цѣсарьской родины, а май цѣса­рьо­в­нино, жоны Леополда І., допроводили до Вѣдня, умѣстили го у свято­сте­фан­­ской катедралѣ, де и донынѣ ся находит.  Повчан­ска икона Марии всту­пила и до великой державной политикы. Цѣсарь Леополд І. приписовав повчан­ской Марии помочь у побѣдѣ над Турками при Зентѣ, котру добыв 1697‑го года. Князь Ференц Раковций ІІ. межи стома пунктами свого вызваня из года 1704 называт и таку шкоду, же повчанскый святый образ Марии однесли до Вѣдня и там го дер­жат. На мѣсто однесеного образа поклали копию, что дав зготовити ягерскый владыка Ишт­ван Телекеший.

Не минат и два десятилѣтия, а в августѣ 1715‑го года теперь уже и новый образ зачинат слезити! На основѣ знова выряденого ослѣда ягерскый епископ Габор Антал Ердевдий еще тот год выголосив Повч за мариянское святое мѣс­то, сяк одтогды ся поселище зачало называти Марияповч. Что про Французов Лурд, про Пор­тугалцьов Фатима, про Поляков Ченстохова, про Мексичанов Гва­да­лупе, про Австрияков Марияцел — тым ся учинив про Русинов и Мадяров сѣверо-восточной Мадярщины Марияповч.

Велика сила одпустовых, котры ся горнули ид святому образу, учинила до­конечным збудованя намѣсто давной деревляной церковцѣ едного вы­ла­же­но­го, примѣреной величины храма. У тых часах, коли святый образ слезив, [буду­чий епископ] Бизан­ций быв парохом у Надь­ка­ло­вѣ  и архидиаконом жупы За­повч. Он и его наступ­никы не знаючи сфарадлованя робили на том, жебы у Ма­рия­повчи поставити достойный святого мѣста храм и монастырь. И так зачаток став­ляня  вяже ся ид имени мукачовского епископа Геннадия Бизанция. Се он 8‑го септембра 1731‑го года серед святочной обстановкы поклав закладовый камѣнь святого храма. По смер­ти епископа, что настала 1733‑го года, ставляня продовжовали епископы Симеон Ольшавскый и Гаврило Блажовскый, а за­вер­шив го Мануел Ольшавскый. Поколь не збудовали храм и монастырь, епископ Мануел Ольшавскый майболше у Повчи здержовав ся, сесе досвѣдчат и его роз­сягла переписка. Епископ Мануел Ольшавскый свои послѣдны годы ту, у Марияповчи хотѣв перебыти, такой же и ту погребеный, як просив. Од зачатку, что ту ся перенюс быв, и библиотеку свою дав до монастыря, най у послѣдны годы живота мае под руков творы святых отцьов.  Важив биб­лио­теку монас­ты­рю вѣновати, но пак тестамент перемѣнив, як видѣв, ож у Мукачовѣ годен збу­до­вати епископску резиденцию и семинарию.

У монастыри, что од закладеня помалы вырос на центер русинского и мадярского грекокатолицкого школованя и културы, за два столѣтия поназбе­рала ся середной величины библиотека и архив, котра фунговала до 1950‑го го­да, коли дѣятельство чина василиянов на территории Мадярщины заказали. Материалы библиотекы и архива формовали ся под вплывом двох културных стремов, восточного и западного. Годом 1780 монастырь мав уже 191 книгу. Марияповчскы василиянскы школы навщивляли у первум рядѣ из Заповча, Сукмара, но ай з Берега, Шариша, Спѣша и Земплина приходила моложава, что ся рвала за науков. До 30‑х годов XX. столѣтия монастырскы гумены догде­ед­но­го, а монахы зболша, Русины были, айбо межи сима послѣдныма не хыбили ани Мадяре.

У Повчи через годишны 10-15 одпустов троновала ярминкова атмосфера, каждое майменшое мѣсточко заятое было из шатрами, людми. На улицях ся пекла живанска печеня, образ села дотворьовали продавачѣ дробничковых красоток, забавок, медовников, свѣчок, святых образов, середновѣчна ларма, вищаня, бучаня быдла. Шатры набиты до пукнутя, вся­гды челядь. На вшитку гор­танку гулюкат безногый, вискат слѣпый ковдош, еднорукый верклияш вы­ста­вив калап. У людском мори плавлют церковны павѣсы, что несут людей ид стѣнам храма. Одпустовым дотоль не годен быти спочивок,  доколь не прийдут под святы стѣны. Котры майревнѣйшы, на колѣнках обходят довкола храм, мор­конячи Отченаш и Богородицю Дѣву. Обход храма, подля бабоны, мае чаро­дѣйну силу. Котры дуже лачнят за дачим, тоты знают ходити ид святому образу Марии и ему ся покланяти. Никаючи на великы глоты, извон храма по­ставлены олтарѣ, и так несчислимый народ годен быти участный у святой литургии. Рушное подъятя — обход храма, сесе майтяжка завданка порядникам од­пуста. Неисперяемов силов валит глота слѣдом за поповством, жебы зайти на главны ворота во двор храма и учути могучо роззвучаны евангелия, при­клю­чити ся ид спѣваню мариянскых гимнов, церковных спѣвов. Сякы были од­пус­ты на зачатку столѣтия, такы з части и нынѣ сут. Днесь, прав­да, вѣрникы тай интересанты приходят желѣзницьов, автобусом, автом. Бо число их усе великое было. Одпусты зато не лем набоженскы подъятя, ходило ся там и про гляданя собѣ пары, новых приятельов, триманя  родинскых и общественных взаи­мин. 15‑го августа, 8‑го а з части и 12‑го септембра на так называных рускых (русинскых) одпустах у Марияповчи, русинской Меццѣ, зберали ся процессии, что поприхожовали из премайрозных русинскых вѣдиков. Межи южныма, бач­ван­скыма Русинами жие обычай ту ся стрѣчати из своима верховинскыма ро­да­ка­ми, приятелями. Сесь даколи забытый обычай, на котрый ся май потом вернули, потвержуют и давны писаны документы. Из русинского языкового ареала ай з так далека, ги на 4–5 дни пѣшого хода, прихожовали на повчанскы одпусты, из котрых межи Русинами май любены были августовы и сеп­тем­бро­вы. Доколь сякы одпустовы походы держали, а то было до закрытя границь 1920‑го года, вадь пѣшым ходом, вадь из возами збывали ся. Попоедны села ма­ли свой обычай. У болшинѣ сел поп не ишов из одпустовыма лем до конця се­ла. Майболшераз у чолѣ процессии ишов често­ва­нѣй­шый, побожнѣй­шый сель­скый хлоп, май рѣдко жона, а кресты несли дѣвкы. Дорогов идучи мо­ли­ли ся коло припутных крестов, заходили и до церков. Походуючы путьом спѣвали, а по селах, як стямили ближащу ся процессию, красно привѣтали поход звонами. Поп одпустовым перед рушаньом до Повчи и коли ся вернули, докончив од­пра­ву. Переважно забештеловали собѣ на складку и святу службу у Марияповчи. Служили ся одправы и за покой душ уснулых членов родины. На великы од­пусты схожовали ся монахы зо вшиткых монастыри  Мадяр­ской краины, жебы так мож было лѣпше успокоити духовны пожады множества туды схожых вѣр­ников, одпустовых. Повчанскый святый образ Богородицѣ, тамошны одпусты трафили и до русинского фолклора. Марияповч, повчанска слезяща икона Пре­чис­той Дѣвы Марии споминают ся у многочисленых побожных народных спѣвах. Такой закономѣрно назву славотного русинского святого мѣста из жу­пы Заповч стрѣчаеме и у народных присловках. За недойдавого, незаживотного чоловѣка так кажут Русины: «Тот и до Повчи путь не найде.»

Выявиме множество молитов, обернутых ид повчанской Пречистой Ма­те­ри, молебньов, спѣвов, гимнов и в напечатаных русинскых молитвениках и спѣв­­никах. Ту не годны сьме их перечислити. Укажеме единствено на со­ста­ве­ный Александром Духновичом молитвеник Хлѣб душѣ, что быв барз лю­бе­ный у народѣ,  и од 1847‑го года мав 15 выдань.

Послѣдныма лѣтами ту в одпустах участковало по 150-180 тысяч людей, межи нима по 15-20 тысяч из загранича, у главном, из восточной Словакии. Лем что отворили совѣтско-мадярску границю 1989‑го года, у великом числѣ зачали ся появляти у Марияповчи и под­кар­патскы одпустовѣ. 1990‑го года в одпустѣ, держаном на день 15‑го августа, Успения Богоро­дицѣ, участковали подкарпатскы епископы и пряшовскый епископ, котрых ту допро­во­жовали мно­гы тысячы  подкарпатскых и восточнословацкых Русинов. При навщивѣ Мадяр­щины 1991‑го года папа римскый Иоан Павел ІІ. загостьовав 18‑го ав­гус­та и до Марияповчи, де хожовав и переже, коли еще краковскым деканом быв. Папа целебровав у Марияповчи грекокатолицку святу службу. Литургия ся то­чи­ла по мадярскы, айбо в ей рамках прозвучали молитвы по старославянскы, ру­мынскы, словацкы и английскы. У службѣ участковали 300 тысяч людей, ме­жи нима 40 тысяч были подкарпатскы вѣрникы, Русины и Мадяре.

История и роль Марияповчи в историчном розвиваню русинской културы у повности еще не роскрыта. Повчанскый монастырь мав великан­скых гуменов, як примѣром, именитый историк Иоан Базилович, писатель тай историк Ана­то­лий Кралицкый. Ту дѣятельствовали научникы братя Коцакы, Арсений и Ана­то­лий. Ту перебытый период их живота, тутешное их дѣя­тель­ство закрыват фатьол непознатости.