11–20. фебруар в истории
14.02.869 в Римі умер Константин (у монашестві Кирил; *827), бізантійськый філозоф, місіонер, ширитель христіанства, языкознатель, товмач и составитель первой славянськой азбукы, глаголицї; сесь день Католицька Церьков сяткує як день сятых Кирила и Методія.
14.02.1573 умер Ян Сілван (*1493), словацькый ренесансный поет.
15.02.1574 у Львові Иван Федоров выдав Апостол, перву печатну книгу на украинськых землях.
17.02.1673 в Паріжу пуд час представы «Мнимый хворый» умер на сценї Жан Баптіста Мольєр (правдиво Jean-Baptiste Poquelin; *1622), славный комедійный актер и писатель; по довгых вандровках из театром по Франції од року 1658 играє у Паріжу, де го прияв у ласку король Лудвик XІV. наперек неволи двора.
15.02.1764 родив ся Єнс Іммануел Баґґесен (†1826), данськый писатель и поет добы романтізма; у комичных и сатіричных повідках слїдовав Волтеру; ёго главный твур – Лабірінт; имня Іммануел прибрав на честь Канта.
13.02.1769 (02.02 Юл.кал.) у Москві, у фаміліі поручника Андрія Крылова, родив ся сын Иван, будучый майбулшый руськый байкарь.
15.02.1781 умер у віку 52 рокув Ґоттголд Ефраім Лессінґ (Gotthold Ephraim Lessing; *1728), нїмецькый поет, драматик, літературный крітик и теоретик умілства.
19.02.1792 Антон Бернолак основав в Тернаві Словацькоє Ученоє Товаришство, котроє мало за цїль зліквідовати народну роздробеность посредством нового літературного языка, росширёвати в тум языку писані книгы, ширити просвіту, учити о новых методах у земледїлстві и проглубляти набоженськый живот.
18.02.1825 у Комарнї родив ся Мовріц Йовкай (†1904), мадярськый писатель, котрого товмачили и выдавали на Пудкарпатю по русинськы; учив ся у Комарнї, Пожоню и Папу; по успіху первого романа Каждоднёвость (1846) лишив карьєру правника и цїлком оддав ся літературї; умер року 1904 на запаленя плюц.
18.02.1827 в Арадачу, Войводина, родив ся Леополд Браніслав Абафі (Abafi; псевда: Бранко Ровинов, Л.Б.Ровинов; †1883), священик, народовець, словацькый прозаик, поет и драматик.
11.02.1829 у Тегерану умер амбасадор Росії Александр Серґеєвич Грибоєдов (*1795), руськый писатель, автор пєсы Горе из розуму; погребеный зостав у Тбілісі.
16.02.1831 (04.02 Юл.кал.) в Горохові Орловськой ґубернії родив ся Николай Семенович Лєсков (†1895), руськый писатель.
12.02.1835 у Чабинах родив ся Анатолій Кралицькый (†1894), священик, русинськый писатель, етноґраф.
12.02.1841 (31.01 Юл.кал.) у Ковылю, Бачка, родив ся Лаза Костич (†1910), сербськый поет, публиціста и філозоф, силна и оріґінална творча особность, котрый внюс до поезії новы формы и збогатив язык.
14.02.1843 у Пожоню (Братіславі) Людовіт Штур, Ян Францісці, Ян Калинчак и їх сторонникы зобрали ся и узаконили діалект Середной Словакії за літературный словацькый язык; дотогды хосновала ся біблійна чешчина и западнословацька кодіфікація Бернолака; фебруаровоє рішеня потвердили на стрітнутю Людовіта Штура, Йозефа Милослава Гурбана, Міхала Мілослава Годжі з Яном Голлым 11–16.07.1843 на фарї на Добруй Водї.
11.02.1852 Николай Ґоґоль спалив рукопис другого тома Мертвых Душ.
20.02.1852 (08.02 Юл.кал) в Санкт-Петербурґу родив ся Николай Гарин-Михайловськый (†1906), інженер, руськый прозаик, автор реалістичных повістей, повідань, и путёвых записок з Далекого Востока.
17.02.1856 в Паріжу у віку 58 рокув умер Гайнріх Гайне (*1797), нїмецькый поет и писатель; межи нїмецькыма авторами потовмаченый на майбулше языкув; в часї націзма книгы Гайне спалили.
12.02.1866 у Березничцї Стропковського округа родив ся Иван Поливка (†1930), педаґоґ, інспектор школ Унґськой жупы, автор многых учебникув, збератель співанок, казок, леґенд.
12.02.1866 в Долнум Кубинї родив ся Ладіслав Йеґе (правд. Надаші; †1940), дохтор, словацькый прозаик, што писав на історичні темы.
17.02.1871 в Требінях, дн. Република Сербська, тогды Османська бировань, родив ся Йован Дучич (†1943), сербськый поет, есеіста и автор подорожных записок.
16.02.1873 (4.02 Юл.кал.) в Овсищах Шумадійського округа, Сербія, родив ся Радоє Доманович (†1908), сербськый писатель-сатірик, чиї творі днесь сут повинным читанём у школах.
19.02.1875 у Новум Саду умер Коста Тріфкович (*1843), сербськый писатель, успішный комедіоґраф свого часу.
16.02.1877 у Мошорину, Войводина, родила ся Ісідора Секулич (†1958), сербська писателька, товмачка, членка Академії Наук и Умілств.
18.02.1885 у ЗША первый раз опубликованы Пригоды Геклберрі Фінна, роман котрый зробив Самуела Клеменса світознатым писателём Марком Твеном.
19.02.1885 у Станіславові (дн. Ивано-Франковськ) умер Євґен Єронимович Желеховськый (*1844), украинськый лексикоґраф и фолклоріста, автор двохтомного малорусько-нїмецького словника на 64 тысячі слов (1886).
12.02.1887 у Суботицї родив ся Ґейза Чат (Csáth, правдиво: Йожеф Бреннер: †1919), вызначный мадярськый писатель новеліста (5 томув повідань), музикалный крітик (2 томы статей), дохтор и автор научных статей.
11.02.1894 (30.01 Юл.кал.) у Мукачові умер Анатолій Кралицькый (*1835), священик, русинськый писатель, етноґраф.
14.02.1894 у Вапеннум, Лемковина родив ся Сімеон Пыж (†1957), русинськый новинарь, публиціста, културный активіста, од року 1922 на еміґрації в Америцї.
19.02.1894 в Хіноранах родив ся Валентин Беняк (†1973), словацькый поет и товмач.
19.02.1896 в Теншебре, Франція, родив ся Андре Бретон (†1966), французськый прозаик и поет, закладатель надреалізма.
14.02.1897 (02.02 Юл.кал) на хуторї Мотроновка Черниговськой ґубернії умер Пантелеймон Кулїш (†1819), украинськый писатель, етноґраф, товмач, крітик; на одлику од Шевченка не любовав ся, ай ужасав ся гайдамачинов, козачинов як деструктивнов силов, носителями поступу держав монархув и шляхту.
13.02.1903 родив ся Жорж Сіменон (Simenon, Georges Joseph Christian, †1989), славный франко-белґійськый писатель, выгадавшый комісара Меґре.
13.02.1904 в Новум Давыдкові умер Иван Сілвай (псевдо: Уриіл Метеор; *1838), сященик, русинськый писатель, етноґраф и културный активіста.
15.02.1906 родив ся Муса Джаліл (†1944), совєтськый татарськый поет, товмач; од року 1941 мобілізованый до войська; рук по тому чажко раненый трафив до нїмецького заятя; у концентраційнум лаґру писав свої патріотичні и слободолюбні верші; орґанізовав ґрупу, обы втїкати из лаґра, за тото быв фашістами стятый; посмертно, року 1956 достав тітулу Героя Совєтського Союза.
17.02.1906 у Москві родила ся Аґнія Львовна Барто (у дїв. Волова; †1981), руська дїточа поетка и писателька; поезія: «Стихы дїтём» (1949), «За цвітами до зимушного лїсу» (1970); прозові творы: Найти чоловіка (1968), Запискы дїточой поеткы (1976); на єї честь названа єдна мала планета (2279 Barto), межи Марсом и Юпітером.
19.02.1906 родив ся Авенір Коломыєць (†1946), украинськый поет, драматик и новинарь, якый творив у лаґру у Залцбурґу по 2. Світовуй войнї и на еміґрації.
16.02.1907 в Болоньї умер 71-рочный Джозуе Кардуччі (*1835), таліанськый поет, Нобелув лавреат (1906).
16.02.1907 у Гыбах Жілінського края родив ся Доброслав Хробак (†1951), словацькый прозаик, літературознатель и товмач руськой літературы.
11.02.1908 у Великых Комятах, Уґоча, родив ся Михаил (Дмитрув) Попович (†1956), русинськый поет проруського стрему.
16.02.1908 у Ліптовськум Мікулашу родив ся Мілан Пішут (†1984), словацькый крітик и історик літературы.
20.02.1908 в Беоґраду умер Сімо Матавуль (*1852), сербськый писатель реаліста, класик сербськой літературы.
20.02.1912 родив ся Пєр Бул (Pierre Boulle), французськый писатель; ёго майуспішнїйші романы, Муст На Ріцї Квай и Планета Малф, были и нафілмованы.
13.02.1914 во Вічапох-Опатовцях родила ся Катарина Лазарова (†1995), словацька писателька селського живота.
20.02.1914 у Страбічові родив ся Иван-Юрій (Юрув) Керча, (псевдонимы: Таня Верховинка, Ваня Горемыка, Горькоуст, Ю.Попадюк, ГИК; †1951), пудкарпатськый поет, новинарь и културный актівіста проруського стрему.
15.02.1916 в Бачськум Петровци, Войводина, родив ся Самуел Малях-Петровськый (†1944), словацькый дольноземськый поет.
13.02.1918 у Будапешту у віку 65 рокув умер Калман Демко (*1852), педаґоґ, історик, член Мадярськой Академії Наук, діректор ґімназії в Левчи, первый редактор русинськой новинкы Недїля, што была про селян и писала ся народным языком.
14.02.1919 родив ся Мирослав Зікмунд, чешськый новинарь, писатель и подорожник, котрый вєдно из Їржі Ганзелком обыйшов цїлый світ на автах значкы Татра, накрутивши множество філмув и написавши книгы о своюй подорозї.
19.02.1919 в Бачськум Петровци родив ся Юрай Мучаї (†1945), словацькый поет Войводины; умер на тіфус пуд Харьковом яко гонвейд в лаґру про воєнны заятцї.
20.02.1920 у Радванцї родив ся Йосиф (Иванув) Архій (†1996), русинськый поет и писатель (псевд. Иосиф Иванов), абсолвент гуманітарного факултета у Будапешту (1943), автор зборникув С полётом дней (1941), Чуття вогненне молоде (2005).
17.02.1921 на югу Украины уродив ся Дзендзелївськый Йосип Олексїёвич (†2008), по войнї доучує ся в Одеськум універзітетї, приходит до Ужгороду (1951), де на матеріалї русинськых діалектув робит блискачу карьєру вызначного украинського лінґвісты; автор словника діалектизмув Закарпатя, котрі мусїли были быти замінены «правилныма» украинськыма словами (1958); автор тритомного лінґвістичного атласа русинськых гвар Пудкарпатя (1958–1993); за довгый час тоты атласы и тот словник, были єдні из немногых леґално доступных книг, што помогали Русинам сохраняти свуй язык.
12.02.1922 родив ся Василь Молнар (†2017), писатель, філолоґ, соавтор ґраматикы Материньскый Язык; публиковати зачав ищи в ґімназії в алманаху Живая Струя; в повіданях Поклик Отчого Края дав поетичні описы родных міст.
18.02.1922 в Білцаревой, Лемковина, родив ся Семан Мадзелян (†2014), лемковськый писатель и поет, котрый зажив нїмецькы примусовы роботы, забраня до Червеной армії, утрату родины, переселеной тым часом на Украину, выселеня пуд Вроцлав в акції Вісла, а уже як пензіста еміґровав до ЗША, до старшого брата; богаты животовы скушеності сут основов ёго творчости.
20.02.1923 в Остружници родила ся Анна Галґашова (†1996), русинська народна писателька, авторка книжкы Стружницкыма Пішниками (1993), єї поетичні творы суть в зборнику русиньской народной поезії Тернёва ружа (2002) и в антолоґії русиньской поезії Русински/руски Писнї (1997).
18.02.1931 в Лорен, Огайо, родила ся Тоні Моррісон, америцька романістка, редакторка, профессорка; Нобелова лавреатка року 1993 за літературу.
19.02.1931 у Руськум Керестурї родив ся Мирон Будинськый (†02.06.2018), русинськый писатель, переважно дїточый.
13.02.1932 родив ся Ласлов Ґрейчі, мадярськый языкознатель, автор радіоедіції Наш солодкый материнськый язык.
20.02.1936 у Курові, округ Бардїёво, Восточна Словакія, уродив ся Микола Мушинка, етноґраф, новинарь и културник Пряшовщины, автор зборникув русинського фолклора, закладаючый редактор «Наукового Збірника Музея української культури у Свиднику»; в своих роботах все одмітат русинську націоналну окремішность, остро крітикує русинськоє возроженя; роботы ёго оцїнены докторатом од Кієвського державного універзітета (1992) и членством в Академії Наук Украины (1997); року 1964 як студент украинськой фолклорістикы Карлового всеучилища у Празї одыйшов до Кієва, через рук го имили на контрабандї заказаной літературы и выповіли го зо Совєтського Союза; по тому 5 рокув пас коровы у колгозі и 15 рокув робив яко топич; роботы свои муг печатати лем за границёв; в маю 1990 регабілітованый и робит у Пряшовськум всеучилищу.
12.02.1938 родила ся Джуді Блум (Blume, урож. Sussman), широко читана америцька дїточо-молодежна писателька, котра достала популарности тым, же в романах и повістях отворено говорит о актуалных проблемах днешности.
13.02.1938 у Беоґраду умер Момчило Настасиевич (*1894), вызначный модерный сербськый поет.
11.02.1939 в Мартіну Жілінського края умерла Елена Мароті-Шолтесова (*1855), словацька прозаичка, редакторка, публицістка.
17.02.1939 в Сіладицях, округ Глоговець, родив ся Ян Шімонович (†1994), словацькый поет, товмач и есеіста.
20.02.1940 в Габурї родив ся Василь Бенько Петровай, русинькый писатель, новинарь, автор романа "Русины".
11.02.1941 в Братіславі ся родив Владо Беднар (†1984), словацькый дїточый писатель.
20.02.1943 в Ґорондї родив ся Іґорь Керча, інженер, русинськый словникарь, писатель, публиціста, выдаватель.
19.02.1944 в Празї умер Антонін Гартл (*1885), чешськый літературознатель, новинарь и товмач, автор ряда книг о літературї Подкарпатськой Руси, первой антолоґії русинськой літературы, статий о языку и културї Русинув.
11.02.1947 у Коцурї родив ся Микола Каменицькый, русинськый поет, фолклоріста.
13.02.1948 в Руськум Керестурї родила ся Гелена Медєші, русинська лінґвістка, редакторка и лексикоґрафка Войводины.
17.02.1949 в Странянах, Пряшовщина, родила ся Анна Кузмякова, політична активістка Русинськой Оброды, пестователька фолклору, новинарька и редакторка.
19.02.1951 в Паріжу у віку 81 рокув умер Андре Жид ( Andre Paul Guillaume Gide; *1869), французськый писатель и крітик, Нобелув лавреат (1947).
19.02.1952 умер Кнут Гамсун (правд. Кнуд Педерсен; *1859), норвежськый писатель, Нобелув лавреат (1920) за роман Благословенство Утцюзнины; повіданя Гамсуна печатали ся зачатком 1940-х рокув по русинськы у Літературнуй Недїли.
17.02.1955 у Пезінку Братіславського края умер Штефан Крчмері (*1892), словацькый писатель, крітик и орґанізатор літературного живота.
12.02.1960 в Ужгородї умер Федор (Михайлув) Потушняк (*1910), русинськый поет, писатель, філозоф, етноґраф, педаґоґ.
12.02.1961 в Заґребу умер Бранко Мількович (*1934), познатый сербськый поет, есеіста и товмач.
12.02.1966 у Вербасї, Войводина, умер Петро Різнич Дядя (*1890), білоеміґрант из Украины (1919), драматик и публиціста, режісер и актер, закладатель театралного умілства межи бачванськыма Русинами; в актерськых кругах мав прозывку Дядя; в ёго память держат каждорочный театралный фестівал Драматичный Меморіал Петра Різнича Дядї, на ёго честь назвали Русинськый Народный Театер «Дядя».
14.02.1966 у Руськум Керестурї родив ся Звонимир Няраді (†1993), русинськый поет и літературный крітик Войводины.
19.02.1968 на 72 року живота у Ню-Йорку умер Євґен Маланюк (*1897), украинськый поет Пражськой школы.
17.02.1970 в Кієві умер Андрій Малышко (*1912), украинськый поет, якый выдав майже 40 поетичных книг; публицістичні и крітичні творы, товмаченя; два раз достав Сталинську премію и двараз орден Ленина.
12.02.1974 заарештовали Александра Солженїцына, менше як два місяцї по тому, што в Паріжу напечатали ёго Архіпелаґ ҐУЛАҐ; неодовго быв выказаный з краины, взято му пудданство; поселив ся у ЗША и вернув ся дому вже Нобеловым лавреатом; у часї володы Горбачова достав предложеня привернути совєтськоє пудданство, єднак не прияв тото.
16.02.1977 у Суботици умер Йовґен Планчак (*1914), писатель.
11.02.1982 в Братіславі умер Рудолф Фабрі (*1915), словацькый поет и повідкарь.
12.02.1984 у Паріжу умер Хуліо Кортасар (*1914), арґентинськый прозаик и поет, якый выучив ся, жив и писав переважно у Паріжу.
15.02.1985 у Пряшові умерла мати Олены Рудловчак, Анна Микита (*1896) , бывша мукачовська учителька, авторка популарной Книгы варенія для селськых карпаторуськых женщин, што выйшла трёма выданями у 20-і рокы.
11.02.1993 у Беоґраду умерла Десанка Максимович (*1898), вызначна сербська поетка.
17.02.1998 во Флорідї умер Алберт Ваш (*1908), мадярськый писатель; од року 1944 жиє в Нїмещинї, од 1952 – в ЗША; при комуністах в Румынії ёго книгы были заказаны; в популарнум романї Сабля и коса описує мадярську історію од року 1050 до днесь.
16.02.2003 в Новум Саду, Войводина, умер Александр Тишма (*1924), сербськый поет, прозаик, драматик и товмач.
19.02.2004 умер Иван (Иванув) Губаль (*1931), честный обыватель Хуста, новинарь, писатель, автор повістий о пудкарпатськых вызначных людях: Стежкою до світла (1995, за Александра Маркуша), Дві долі (1996, за Александра Сливку и Миколу Рішка), З орлиної колиски (1998, за Дмитрія Вакарова и Василя Вовчка), Слід на землі (2000, за Василя Игната), Володар мудрості народної (2004, за Ивана Хланту).
19.02.2009 в Братиславђ во вђку 77 рокы умерла Мария Хомова (родж. Дупканич, *1932), педагогичка, языкознателька, публицистка, активна културна дђятелька русинскых организаций, сполуавторка и редакторка русинскых выдань.
19.02.2016 в Міланї у віку 84 рокув умер таліанськый прозаик світовой славы Умберто Еко (Umberto Eco, *1932), літературознатель, естетик и теоретик (Имя ружі, Кывало Фуко).