Дымнянкы уже скоро будуть принадлежати истории, кедь история вобще ся занимать дымнянками. И зато, же на страницях истории Подкарпатьской Руси нич не найдете о дымнянках, роздумав ся я написати вам даколько слов о них.
Што вто дымнянка, тяжко собѣ представити, кедь есьте не были на Верьховинѣ и не видѣли сьте внутро верьховинськых хыж. Окрем того, мали бы сьте владѣти фест жывов фантазіёв, обы ся не запутати у блудилищах мого приказованя и дыма, котрый буде ёго предметом.
Найти дымнянку днесь, хоть бы и на Верьховинѣ, уже помѣрно тяжко, а щи такому, што мало хожовав там, и зато дозвольте ми завести вас у село, повѣжме К. Оно лежить при самом подножу нашых прадѣдных Карпат, в очаровной долинѣ, котров переходять лем туристы, агенты-продавачѣ, а даколи и секвестратор там заблудить, но такой и одыйде, бо нѣт што там секвестровати. Село обступлено нерушанов зеленёв иглистых и листнатых дерев, а под самыма хмарами стоить вершина голой скалистой полонины, з котрой ся розлѣгать голос трумбеты полонинського овчаря. Тот голос из еднозвучным черкотанём быстро текучой рѣчкы гибы приковуе ид мѣстови каждого, ко ищи нигда не быв у таком верьховинськом селови. Аж бы исе трафило ся быти надвечур, при западѣ сонця, та хоть-нехоть умовкаете, марите о дачом, и вашое позрѣня ся оберне на полонину, одкудь ся доносить жалостный протяглый голос трумбеты, переливаючый ся куртыма трелями.
Айбо перепрошую, забыв ем, ож вы хотѣли бы ся дознати, што тото дымнянка. Но, та не будеме стояти и розмарити, ай пойдеме горѣ током рѣчушкы и увидиме: при дорозѣ майже не е хыж, поставлены они зболша по грунках. Домы выбудованы из дерева, стѣны звонка не бѣлены, не мащены, крыты болшов частёв соломов. Видите два типы домов: еднѣ старѣ, а другѣ новѣ. Розниця у слѣдуючум: хыжи старого типа будовали ся без либелы и винкела и зато ѣх стѣны стоять скосо и суть низкѣ, наоборот, новый тип хыж будованый уже по нѣмецькы, щи ай рогы хыж звязують ся (ссиляють ся) по нѣмецькы так, обы рогы тоты были гладкѣ, як на мурованых домах. На хыжах старого типа "вѣкна" из листвов. На домах нового типа вмѣсто окон - "облокы", отворяючѣ ся на завѣсы. Айбо идѣм дале. Анде перед таков хыжов старого типа стоить газда Иван, видав, лем што прийшов из поля. Мае ищи мотыку у руках. Он нас истямив и думкуе собѣ: свои ци чужѣ сесѣ паны. Кедь есьте ся му поклонили, то значить: свои. Вѣдь знаеме по нашых селах обычай, ож поклонити ся довжен тот, ко иде дорогов, хоть бы и старшый быв. Та правда, ож поклонили сьме ся:
– Слава Исусу Христу!
– Слава навѣкы!- одвѣчать он и такой додавать,- А куды вы, панове?
Мы одповѣдаеме ёму:
– Та, просиме вас, ци не годны бы сьте нам указати дымнянку у вашом селѣ?
– Дымнянку-у?... Та што они задумали, та на нюй нѣт што позерати!
– Но, мы ищи не видѣли, та любили бы сьме увидѣти,- одвѣчаеме.
– Но, та кедьбы паны уже так любили видѣти, та мусять, прошу за ласку, идти онь у вышный конець села, бо туйкы, у нижнюм конци вшыткы побудовали пецы из кошами. Та лем най идуть там, им пак повѣдять, де е дымнянка.
Што же маеме робити. Мусиме идти у вышный конець села. Там, у вышнум конци, отвориме дверѣ хыжи старого типа. На дверёх желѣза не е: дверѣ, замкы, завѣсы - вшытко из дерева, вытвор самого газды Петра, котрый и не просив патент на свои вынаходкы. Кедь хочете видѣти дымнянку своима очима, та отворѣть дверѣ спомянутого газды надвечур ци рано, коли варить ся обѣд ци вечеря. Ай де, мушу ся признати, схыбив ем. Дверѣ туй будуть отворены, гибы чекали милого гостя. Лем отворены из другой причины. Заходите через сѣни просто до комнаты, дверѣ котрой тоже отворены, щи и "вѣкно" россунуто на листвах, як бы были провѣтрёвали хыжу. Заходите без поклопканя на дверѣ. Сякое туй не обычай. Поклоните ся и нараз самѣ не знаете, де вже то есьте. Не знаете, ци не трафили сьте до курячого ся комина, як пражська шовдрина перед Роздвом, ци просто до клублячого ся оркану дыма. Лем нич не майте страх. Не заблудили сьте, исе вы есьте у так назывануй дымнянцѣ, то значить у хыжи, у котрой над пецом не е коша. Из той простой причины дым из пеца выйде такой у комнату и не е принученый ся крутити по всякым дымоходам, слушно и достойно, но мае возможность вольно ся росходити цѣлым простором комнаты, называемой дымнянков.
Ба як там годны жыти люде, подумаете собѣ, тадь у дымѣ и скотина не годна пробыти довже дакулькох минут! Тото правда, лем не забывайте, ож у дымнянках ся кладе огень два раз на день, рано и навечур, а при отвореных дверёх, што в зимѣ, то и в лѣтѣ. Позад того, як обѣд ци вечеря ся зварять, а дым из дымнянкы выйде, окна заперають ся, а "вѣкно", прорѣзаное у повалѣ дѣля прохода дыма, як и над дверьми, герметично ся затыкать, од чого теплота у такуй дымнянцѣ удержить ся до вечора ци од вечора до рана. Треба вам ищи знати и то, ож дым у дымнянках не наповнять комнату од повалы до самого подомента ци землѣ, но наповнять лем од повалы до высоты отвореных окон, так, ож кедь есьте ростом под 150 центов, та спокойно можете стояти у такой комнатѣ-дымнянцѣ. Кедь же сьте обдарены ростом над 150 центов, тогды при осмотрѣ дымнянкы мусите сидѣти и так спозерати за выходячим из пеца клублячим ся дымом.
Наконець, ищи еден вопрос. Опросите ся, як тото годно быти, ож днесь, у добѣ културных и техничных досягнень, люде жыють ищи сяк примитивно, удѣлом горше властного скота. Одвѣт у ня готовый. Сесѣ люде, жыючѣ у подножу Карпат, были вшыткым свѣтом забыты, ай они тоже не интересовали ся свѣтом. Им свѣтом была их хыжа и село, а красоты околичной природы ани не збачали. Дорог ид ним не было покладеных, и нико не желав ид ним идти, нико ся не интересовав их судьбов, не было туристов, не было руськой интелигенции, не было ни гуманитарных працовников, ни институций, котрѣ бы за тым позирали и старали ся их жывотом. И так остали они жыти по своим первобытным привычкам. Зато, кедь зайдете до такой дымнянкы, вас там приймуть щиро, бо знають, ож не лем из самой любопытливости прийшли сьте до их хыжи, ай сочуствуете из нима и хотѣли бы сьте помочи им. Кедь зась увойдете у дом модернизованый, деська на ровнинѣ, там вас так уже не приймуть. У вашум лици там уже видять чоловѣка, жыючого у лѣпшых условиях и недоброжелателно наставленого ид ним. Так заведено у Верьховинцёв. Такый обычай у руськых горах.
