Годованик

Рѣдко ся стане, обы у фамилии нашого руського челядника земледѣлця было лем едно дѣтя, а то щи на Верховинѣ. Еднакож, трафлять ся, Бог знати, яков причинов. Аж бы у браковѣнчаных по рокови не было прибытку сѣмей­ства, та тото ся уже числить каров Божов.

Иван Д. ся держав за великого грѣшника. Другый рок жив у сопру­жест­вѣ, а дѣтей все не было у сѣмействѣ. Уже и до монастыря ходив, а й тото не помогло. Раз лем на третий рок сопружества прийшла на свѣт дѣвочка, котрой ся дуже радовали так молодѣ сопругы, як и их старѣ родичѣ. Дѣвочку по­крестили позад старого обычая. Аж ю несли до церькви крестити, поклали ид нюй чеснок, свячену воду и дору. Вернувши ся из покрещеным дѣтятьом, дали дѣтвача на окно до рук хлопчикови, обы на слѣдуючий раз ся уродив хлопчик. Пак приклали ид столови, ид припѣчку, ид пецови, дали самуй матери-шѣсть­тыждньовцѣ. Тай не забыли при уроженю выкласти и черлену пантличку на хыжу од путя.

Не смотрячи на тото, ож вшитко было изроблено, як ся тото робило од­давна, уже перейшло пять лѣт, а другого дѣтвака не было. Так и стала ся Мария единачков. Отець Марии задумав ся над судьбов своей дѣвкы. Землѣ, слава Богу, доста было, лем робити не было кому. «Чужа челядь — то все не своя» — говорив и лем зато, легко, и роздумав ся взяти ку своей Марии годованика. Знав он добрѣ вшиткы сѣмейства у родном селѣ, зато не довго роздумовав ся, од кого бы взяти хлопчика у выхову, котрый у свой час и став бы ся сопругом его Марии. Та так он узяв тринадцятьрочного Митра Г. из небогатой фамилии, айбо здорового и красного легѣника.

Дѣти жили, бавили ся в'едно, пак и школу в'едно навщивляли. На десятом роцѣ свого живота дознала ся Мария, ож Митро сесе не брат юй, ай годованик. Еднакож, нич обы ся тым была даяк переяла, вѣдь же годованик быв не лем у них, а было их у селови еще двое.

Ледвы что Марии выповнив ся четыринадцятый рок живота, як отець уже дале не годен быв чекати. Хотѣв видѣти свою дѣвку щастливу и зачав выхожовати дозвол, обы повѣнчати ю з Митром. Дяковати Богу, ож дрѣчной поставы была Мария, та подарило му ся вымогти дозвол. Мария зо школной лавицѣ пошла под шлаер, а рок на то уже и крестили дѣвочку Мариину, а пак и другу, и третю. За шѣсть лѣт донька Марии указала ся у школѣ, и так ми пощастило учити и дѣтвака моей бывшой ученицѣ.

Вы легко ся ужаснете и подумаете, як сякое возможно? Де туй сво­бодна воля мужчины и жоны? Де туй любовь? А дѣло зовсѣм простое: они жиють, дѣти ростуть и помогають им на газдовствѣ. Дѣдо и баба тоже щастливѣ, бо неодовга будуть мати и правнуков. А молодым и позадумати ся не е коли, что то любовь и ци треба дачто сякое дѣля сѣмейного щастя...

Але такы вам таинства живота зо зворов нашых Карпат.