2011 На благо Либийской Джамахирии
В куртом повѣданю автор переносить нас у нашу цѣлком недалеку минулость, а въедно з тым до краины, котра уже не егзистуе. В той цѣлком недалекой минулости тота процвѣтаюча, нафтов и газом богата егзотична краина зачинала розвивати широкы економичны и гуманитарны односины з Украинов и Россиев. В тот час герой нашого повѣданя, хирург, нашов собѣ там свой хлѣб каждоденный, як и многы иншы нашы дохторове. Але многообѣцяючым меджиштатным односинам быв нечекано покладеный край револуциев, котра, як знаеме, усе робить ся на благо и во имя народа.
Ци не ирония судьбы: з дипломов о высоком образованю, з багажом навыков у своем фаху молодый специалиста мусить лишити родный край, свою державу и ѣхати за девять земель и три моря заробляти на житя! Така доля постигла у нас миллионы фахманов и простых тружеников, котрых рукы и мозгы оказали ся невыжаданными, а кедь и залучены до роботы, та лем за мизерну платню. А люде хочуть жити по людскы, за стандардами цивилизованных краин. И розлѣзли ся они, як мышатка по свѣту глядати лѣпшу долю.
Повѣдать дохтор Мирослав.
Мы з подругов житя в тяжкых думах обговоревали нашы фамилны проблемы. Подростають два хлопчикы, – их треба вышколовати, вывести в люде. Стара дѣдова хыжа потребуе реконструкцию. Обыстя просить благоустроеня. И вообще, хоче ся жити адекватно свому социалному статусови.
Довго сьме сушили голову над вопросом пережитя. Не удовольняв нас модел «дохтор плус», якый завладѣв умами низкоплаченых медиков. Якось несовмѣстны такы словозлукы: дохтор плус комерсант, … плус бизнисмен, … плус негоциант, бо тоты плусы все лем обертають ся минусами дѣля благородной професии дохтора.
И коли сьме прочитали в новинцѣ, же Либия по договору из правительством Украины позывать до себе нашых медиков, – сесе сьме восприяли як якорь спасения. У Киевѣ успѣшно пройшов ем сполубесѣду з представителями Либийской Джамахирии и всѣ папѣря на выѣзд достав ем на рукы.
Либия – то середземноморска исламска держава в сѣверной Африцѣ, зъединююча двѣ историчны провинции – Триполитанию (столиця Триполи) и Киринайку (столиця Бенгази). Мой лѣтак щастливо приземлив ся в городѣ мого призначеня: Бенгази. Стрѣчали тепло, душевно. Первым дѣлом воздали хвалу Аллахови за щастливый прилет: «Гамдул – Алла салама!» Указали операцийный блок у болници неодкладной помочи Ал-Джалла госпитал, познакомили з аппаратуров. Она у них – найновѣйшое слово техникы. Повели у безплатное житло и безплатну ѣдалню. И зачало ся мое либийское лѣточисленя!
Лежу на диванѣ и розбераю свои упечаткы дня. Файну фиглю утяла з нами фортуна! Розсѣяла нас по цѣлому свѣту. Жона Таня в Голубином на Подкарпатю, сыны Игорь и Мирчик у Киевѣ на универзитетѣ, а я в далекой Африцѣ. Но, не бай! Мине час, и, дасть Бог, мы знова збереме ся въедно. Маю удоволеня з того, ож из мѣстным персоналом можу общати ся по английскы. В школѣ нигда-м не думав, ож сесь язык даколи придасть ся менѣ в житю. Дякую вам, Василю Ивановичу, и вам, Олго Ивановна! Подяка и вам, Игорю Евгеновичу, же сьте в Свалявской реанимации щедро дѣлили ся своим опытом из молодыми колегами, и я теперь, в условиях повышеной одповѣдалности, увѣрено и без страха приступаю до операцийного стола.
Мѣстны колегы по роботѣ – люде доброжелателны и щиры. Обертають ся до мене не на прозвище Молнар, а на крестное имя: дохтор Мирослав.
Нашое общеня не ограничовало ся конзултациями у вопросах хирургичной операции. Часто при меншом напруженю дискутовали сьме на тему вѣросповѣданя. Мои оппоненты исламисты толерантно односили ся до мого товкованя Святого письма, и дуже им импоновало, же у Старом Завѣтѣ мы майже тотожны у своих вѣрованях. Лем персонажи тых книг мы называеме розлично. Елог (у нашой Библии стоить множина Елогим) у них Аллах, Абрагам – Ибрагим, Мойсей – Муса, Йосиф – Юсуф, Сатан(а) – Шайтан и т.д.
Довгов чередов тягли ся днѣ мого контракта. Стало кортно ми самому в чужинѣ. Забав и утѣх – ниякых, окрем моря и парка. Та й жоночка сиротка пише, телефонуе, же скучае сама и боить ся вночи. Кончило ся тым, же перемогла всѣ страхы перед далеков дорогов и еден прекрасный день явила ся у моей обители у Бенгази. И нараз у домѣ запахли поливочкы, голубкы, кейзликы и другы смачны стравы нашой подкарпатской cuisine – кухни. Была паска на Великдень и Святый вечор из смереков на Роздво. Благо, сесѣ нашы праздникы з дозвола администрации болницѣ были одпочивными днями дѣля христианскых сотрудников.
Увы! Мила домашность и комфорт, якы творила моя Танюша, скоро минули. Не хосновала ей пекелна жара, ани пѣскова буря «гибли». Некомфортно ся чула европейка христианка в исламском окруженю…
И зась я сам у чужинѣ до скончания контракта.
Така драматична моя епопея пережитя. Ци не аморално се – одгейкати восѣм роков на хосен чужой державы? Позирайме на резултат. Родинно-господарскы проблемы розошли ся «як роса на сонцю». Значить, поступив ем морално. Бо што то благобытна родина? Се тота клѣточка, из котрой мае взникнути наша благобытна нация. А што то благоустроеное обшаря? Се искравый мазок пензлика на панорамном пейзажи нашой краины. Выходить, там, у исламской Джамахирии я рѣшав не лем свои личны и родинны проблемы, но и проблемы нашой отчизны…
А заглавие нашого повѣданя – се горька ирония. Се укор высокым чиновникам, котры ведуть Русь-Украину у пропасть.
Жерело: Потятка гнізда Голубиного. Ужгород, 2011. 97–99.