2013 Русинськый язык в Украинѣ и дале зостане мимо закона?

3. юлия 2012 сойм Украины одобрив проект закона «О засадах державной языковой политикы», а 8. августа 2012 тот закон  (5029-VI) зостав подписаный Президентом Украины. Закон мав додаток, де серед иншых, 18 недержавных «регионалных» языков жителюв Украины быв признаный и русинськый язык. Под пресиёв украинськых шовинистов президент искликав «робочу групу» експертов, обы выпрацовала поправкы до приятого закона.

Сими днями могли сьме ся дознати, же по довгой роботѣ «робоча група» рекомендуе драстично ограничити хоснованя 17 иншых языков, а русинськый зовсѣм вылучити. А то з причины, же подля их гадкы,  русинськый е диалектом украинського. 8. апрѣля 2013 7 русинськых организаций ЗША и Канады подали державному секретарю ЗША меморандум, в котром зазначают, же аналогично, в Болгарії доднесь сут такы, што щи все затято твердят, же македонськый язык, язык державы Македония, е лем диалектом болгарського, и напоминают Украинцям, же в ХІХ. столѣтию в Росийськой империи украинськый язык быв преслѣдованый и ограничованый властями якраз на основѣ пересвѣдчень урядников и шовинистичных научников, же «малороссійское наречие» не е нич иншое, як диалект великоруського языка.

Протест еднозначно поддержуют и европейськы Русины и Русины Украины. Непризнаня Русинам Украины права на властный язык и самоидентификацию е вопиючым нарушенём Европейськой Харты о людськых правах, котру подписала, но не додержуе Украина.