2014 Охрана языков меншин зрушена
Револуцийна Найвысша Рада Украины в сих днях гектично аннулуе за шором законы, котры были прияты в минулых роках. Еднов из первых жертв упал закон 5029-VI «О засадах державной языковой политикы», што 8. августа 2012 был подписаный Президентом Украины. Закон тот мал додаток, де серед иншых, 18 недержавных «регионалных» языков жителей Украины был признаный и русинскый язык. Шовинисты зачали кампань, жебы вылучити русинскый язык з того додатка, против чого запротестовали 8. апрѣля 2013 меморандумом державному секретарю ЗША 7 русинськых организаций ЗША и Канады, а тот протест еднозначно поддержали и европейскы Русины и Русины Украины, напоминаючи, же непризнаня Русинам Украины права на властный язык и самоидентификацию е вопиючым нарушенем Европейськой Харты о людськых правах, котру подписала, но не додержуе Украина.
Револуционеры, котры зачали свой сценарий обаленя законно выбраной власти под слоганами за зближеня з Европов и за европейскы цѣнности теперь ни на минуту не задумавши ся нищат вшыткы тяжко добыты в попередных роках меншиновы права. Под стѣнами Найвысшой Рады сут агресивно наставены 4000 боевкари, котры методами револуцийного террора добивают ся жаданых резултатов голосованя.
Зачим новый револуцийный спикер парламента е едночасно и самоназначеным Президентом Украины, процедура зрушеня закона 23. фебруара 2014 не потребовала вецей як пару минут, тогды як на его выпрацованя, согласованя в инстанциях, в том числѣ межинародных, як Венецианска Комиссия, треба было много роков.
Мадяры, Румыны и Русины Подкарпатя, котры уже устигли подагде послужити ся меншиновым законом, днесь сут обкрадены и з тых минималных прав, котры мали при «кровавом диктаторѣ» Януковичови.