Атлас

Фламандскый географ Гергардус Меркатор (Gerhardus Mercator, *1512, †1594) уже року 1538 нарисовал мапу вшыткого свѣта, року 1540 мапу своей отцюзнины, Фландрии, а року 1541 зготовил глобус. Уже тогды добыл собѣ свѣтовой славы. Но продолжал дале робити в Дуйсбургу, Нѣмещина, и там од року 1569 выхосновал таку проекцию, яка дозволят правилно перенести географичны пропорции на плоскость. Проекцию Меркатора и нынѣ хоснуют картографы.  По смерти географа сыны выдали его мапову зберьку под назвов «Atlas» (Дуйсбург, 1595), а тоту зберьку отворяв образ титана Атласа, котрый держит на своих плечах земну кулю.

Одтогды такы зберькы мап называют атласами. Позднѣйше тота стямка ся росшырила, и теперь так называют всяку зберьку карт, таблиць, диаграмм: анатомичный атлас (атлас анатомии чоловѣка), народописный атлас, языковый атлас (атлас народов, языков).  Подля грецькой митологии Аtlas (Аtlantos) въедно з другыма титанами збунтовал ся против олимпийськых богов, за што му было покладено за кару держати Землю на своих плечох.

   З другого варианта того имени одводят ся назвы Антлантичный океан, Атлантида.