Баллада о керпцях

Давно, давно,

за горами, за лѣсами

жили собѣ барз спокойно

керпци громадами.

Керпци были родом старым—

покрыты были дѣрками,

доказ то, же ествовали

были щи пред топанками.

Керпця,

                   хоть был кутый
на вшыткы штыри ногы,
зачали выперати з дорогы
вты топанкы поступовы.
 

И ту зачала ся битва
правѣ на смерть и на житя.
 

Керпци раз ся скрыто взяли
узброили ся добрѣ

и топанкам битву дали.
 

Довго, барз довго ся тягла битва,
аж керпци проиграли:
едны на поли битвы упали,
иншы до неволи ся достали,
а у нас, на Лемковинѣ
лем тоты ся остали,
што ся раз-два — пилно
з поля битвы выцофали
и в Карпатах сут понынѣ.

(1955)
Жерело: Лем. Лемковина 1991. 87