Балта

     Слово балта обычно думаеме, же е лем нашое, а же е мадяризмом. То далеко не так. У Середной Европѣ чуеме го на тых землях, котры были под Османсков империов: у Болгаров, у Горватов, у Мадяров, у Сербов, у Словенцев. У Русии тоже знают го. Словник В. Даля зазначат го як оренбургское татарское слово з такым значенем: «вообще топор, особенно же узкий, азиатский топор, втрое уже плотничьего; секира, дровяник».  Знают се слово у том же значеню Казахы, Кыргызы, Туркы, Туркмены, а у значеню галебарды и Монголы. Слово одводит ся од туркского bal = колоти, рубати.

     Интересно, же у Славян на сѣверных сторонах Карпат тото слово уже стрѣчат ся из главным значенем «болото», а лем як застарѣлое значеня такое, як у нас. Се видиме из словников Б. Грин­чен­ка и Я. Янова.