Битанга

Битангом [g] называеме ничомника, пустыню, непотрѣбного чоловѣка, або дѣт­ва­ка, котрый е збыточник, балахрест, воятник, лингарь. Тото слово мают и Ма­дяре, и Сербы, и Словакы, и Горваты.  Мадяре и Словакы мают го во формѣ bitang, зато часто думают, же е оно позыченое з мадярского (прото, же словац­кый язык ся розвил позднѣйше). В давном мадярском языцѣ тото слово мало форму bütung и означало 'трофей, луп', и про то мадярскы етимологы одводят го од подобного значеня нѣмецкого Beute, в диалектѣ bütungе. В днешном часѣ оно означат скотину, што заблукала од стада, або недозираного дѣтвака, або копыла, а зо старого значеня трансформовало ся в том смыслѣ, же в обох припадах иде о потенциалну жертву чужых люди: скотина може быти заята, а дѣтвак зведеный.

Но подля дакотрых днешных словацкых етимологов цѣлком вѣроятно, же е то омного давнѣйшое слово: у санскритѣ сут butta 'спростый, нерозумный, невалушный' и anga 'тѣло, рѣч'.