Добрый день!
Молоденька авторка являт читателеви зрѣлость психологии и быстрое око, якы не каждому властивы в ей вѣку. Добрый день и щастну дорогу в русинску литературу!
Правѣ думам, як ся мам поздравити. Класичнѣ Добрый день!? Ци Добрый день желаю, або ся не поздравлю нияк? Кедь ся нияк не поздравлю, буде то безочливе и може собѣ подумате, же-м цѣлком глупа. Так, же радшей зостану при том обычайном поздравѣ Добрый день. Кебы то и в школѣ з поздравом так фунговало. Але там то не фунгуе, а не лем з поздравом. Хлопцѣ – еднокласници исто будете зо мнов сугласити, кедь повѣм, же вашы родичѣ не мають ани шайну о том, якы глупости вы робите в школѣ. Ведь школскы лавкы вже хочут выбухнути од того, же суть такы пописаны фаребныма перами а исто нарѣкают, кедь до них рыеме вшелиякы глупы слова. Но лем ся не выгваряйте, же то не е правда. Ведь в нашой класѣ хлопцѣ скачут по лавках, як опицѣ, а дѣвчата ся по них тыж опичат.
Милы мои, вшыткы ми дате за правду, же кедь до класы прийде учитель, то никто собѣ го ани не замеркуе. Гейже, е то правда?
Важены учителѣ, котры ту сидите, исто ми то потвердите. Мене то барз мерзит, а даколи ся за нас ганьблю. Кто знат, ци ся то любит нашым лавкам – нѣмым свѣдкам нашого справованя. Але они не можут нич робити. Я бы рада тото змѣнила, але не е то таке легке. Власнѣ ж недавно ем собѣ то усвѣдомила, же кедь до класы прийде учитель а мы встанеме, же то е поздрав без слов. Ай поздрав без слов е поздрав, правда? Але я бы хотѣла кушицко инак. Хотѣла бы‑м, жебы дале ся при поздравѣ позерали до оч тому, кого здравкаме а може кебы сьме ся при том и усмѣхнули. Toто бы ся ми любило! Не смѣйте ся, камаратя. Ведь щирый поздрав може быти ключом до безконфликтного завтрашного. Можу то указати на прикладѣ. Кедь прийдете первый день до новой роботы а поздравите ся свому шефови «Но, сервус, хлопе!», ачей собѣ подумат (як то лем не повѣст), же сьте упали з вишнѣ. Або доконця може подумати, же сьте припад про психиатра, а ваша робота е огрожена. Я ся люблю поздравити. Добрый день, агой, чав, наздар. Здравиме ся лем зато, же ся то належит? Думам, же нѣт. В том е, подля мене, далеко веце. Ведь кедь ся дакому поздравлю, исто ся потѣшит. Нагнѣваный забуде на гнѣв, смутный повеселѣе, веселый буде щастливый, а щастливый буде щастливѣйшый. А зато на поздравы не ем гамѣшна. Роздавам их на улици, в обходѣ и в школѣ. И вам вшиткым желам добрый день!
Терезка Мандзакова, Гуменне
Жерело: InfoPyсин 6/2007, ст.8