Бренды про Европу

Колбасы, солонины, шункы и другы нашы бла­го­да­ти – што же ту мае быти нездоровое?

Было то ищи у тамтой великой державѣ, коли ем из шовгором Ми­колом путовал до Словении. Погубил ся ми трактор, а шовгорови комбайн на кендерицю, та сьме йшли добыти части. Запчасти, як нашы люде гва­рят.

И коли желѣзниця рушила, а мы зголоднѣли, та сьме повыберали тайстрочкы. Я перед себе положил куфер и поскладал на него тото, што ми Ганя порихтовала: ципов хлѣба, солонину, цибулю, фалат шункы и пол­груды сыра. Знае она, же не великый з мене ѣдак, але зато жебы ем не был ани голодный, та положила ми фалат буженого свинского шойта, двѣ пары кол­бас, даколько вареных яиць, ищи и печеное пульчое стегно, такое дас три ферталѣ киловое, а ку тому два цѣлы баникы. Шовгор Микола тоже розпростер хлѣбовку на колѣна. Его Мелана му запаковала даколькы наповняны колачѣ, печены ребра, фаширы як долонѣ, богачѣ зо шквар­ками мѣсто хлѣба, закрутила и печеное курча, кромплѣ у лупинѣ – дас пол­сакайтова, цѣлу бабовку и два кыслены баникы – зо сыром и з маком. Тадь бо мусиме одыйти на два-три днѣ з дому.

Розложили сьме ся так, краеме собѣ и запиваеме. Крадком од Ганѣ штурил ем до куфра и плетену фляшу того вина, што го панотець носит з Карловець на причастя. А и шовгор Микола взял корчажку вина, што му го сват зо Сриму дал под сѣдало, як был у них на Кирбай.

При нас у купе были якысь двое, пан и панѣ, десь такы, як нашы ровесникы. Штоська собѣ шептали, позирали на нас, хлоп одхылевал облак, а жена обмаховала ся з хусточков. Правѣ собѣ думам, же може быти люде не зносят запах цибули и колбасы, як оно – аккурат тото!

Гварит хлоп: "То нездраво тельо ѣсти. Тяжкое, мастное. То хворота, сикнис!"

Шовгор и я спустили сьме бичакы и перестали жвати.

"A-a, де же то путуете?" – звѣдам ся за хвильку, гибы хочу скрятати бесѣду на иншое.

Гварят нам, же были у старом краю увидѣти своих, а теперь ся вер­тают до Голландии, де жиют и роблят уже вецей як двадцять рокы. Люб­лят собѣ прийти ту, гварят, красна природа, добра клима, здрава вода, приемны люде, вшитко шором, лем – недобрѣ ся костуеме.

"А што же вы там ѣсте?" – звѣдаеме ся.

"Та, лем диетное", – гварит панѣ. – "Што вецей шалаты, макро­биотикы, витамины." А пан додават: "Солонину, шунку, колбасу – ани случайно нѣт! То отрова! Куртае живот. Мортус, шлус, капут!"

Но, ту ся маеш. Шовгор и я позираеме на себе, дакус нам несвойо. Позираеме на тоты благодатѣ перед нами – та, што же ту мае быти не­здо­ровое? Або, не дай Боже, отровное? А што же бы нам похыбило? Правда, ми стават до крижы одтогды, як ем спаднул з коча, коли конѣ зо мнов понесли, а шовгор уже тяжкый на ногы, але на жолудок сьме ани еден не хворы.

О хвильку сом ся насмѣлил. Одрѣзал ем фалат шункы, так натонко а наокругло, та гварю ганьбливо: "Плиз, най ся любит, покушайте."

Пан утихнул, никат раз на фалат шункы, раз на свою панѣ, почер­венѣл, як парадичка, – и взял. А кедь загрызл, гварит: "Гм-м, то файн! Де-ли-ка-тес!"

Хотѣл потому и колбасы, кушал и свинского шойту, попросил од шов­гора и наповняного колача, реберка, вшитко шором. Перешла го диета и хворота. А як лыгнул з корчажкы, аж подскочил. – Шак то, гварит, "Лакрима Кристи!" И панѣ ся прилучила, окреме хвалила пульчое стегно, рейтешы и тоты кыслены баникы. Такой просила и рецепты, але мы гва­ри­ли, же то у нас лем жены знают.

И так скоро спорожнѣли нашы тайстры. Коли сьме вышли з же­лѣз­ници, Даны (так ся кличут Голандийце) нам ищи долго махали. Гварили, же нанарок прийдут до нас на одпочинок, дали сьме им адрес.

Шак най прийдут – гварю шовгрови – пак вецей дни як колбас! Буде то наш принос валалскому туризму и приближованю до Европы, та нѣт? Кедь треба, забиеме и даедного шудова, най ся люде дакус подживлят. Видиш, якы сут блѣды и худы, зато ся и боят од хвороты. А здравля на уста заходит! Маеме и мы нашы выробны значкы, бренды – як ся то по модерному гуторит, кельо хочеш...

Буде то нас коштовати! – гварит Микола.

Та не хыба! Не буде то первый раз, же мы, селяне, платиме. Дай лем, шовгоре, зостало там ищи з того свяченого? Видиш, же нич без нас не е. На здравля!

Бачи Дюра з Керестура

Ей, бул то кедиш красни час

Валалски дожица. Нови Сад. 2010. Ст.6.

Сон

Року 1990, а могло быти
 и перед тым и по тому

Ищи навечер перед тым, як ем мал вывезти свинѣ до кооперации, скупал ем ся, побрытвал, розказал Гани най ми на рано порихтат бѣлу кошулю и лайбик и накрутил годинку на пол четвертой.

Радовал ем ся же пойду до валалу, межи културный свѣт, до ко­опе­рации, же продам свинѣ, што ем их скоро рок кормил, та достану красну громадку пѣнязи. Правѣ ми их треба, жебы-м закрыл шопу, а Гани ем надумал купити нову райбачку, бо сосѣда уж третю перемѣнила за остатны два рокы. З тым ем и заспал.

У кооперации мня красно прияли. Свиням не доганяли. Щи мня директор и особно похвалил, же якый ем добрый газда, та мня закликал на кавель и паленку до своего кабинету. И доколь сьме были коло кавелю и «Боже, дай здравля», секретарька ся уже вертѣла коло мене, пораховала ми пѣнязѣ и гварит:  «Вшитко шором, бачику, лем ми ся ту подпиште».

И я задоволени, гибы мня маслом помастили, такой ем через дорогу купил райбачку з найновшыма програмами, ищи ем до ней штурил и гадвабну хусточку, порфин и велику чоколаду, та собѣ фитькаючи вертам ся домов, вшиток щастливый, же мам таку добру жену ай кооперацию.

Ганя аж звисковала од радости. Ищи под ганком мня пообнимала и постискала, лѣпше як перву ноч по свадьбѣ, коли ем ся з нев оженил.

Пробудил ем ся вшиток, як побитый. Ледвы мня Ганя вытягла спод перины:

– Вставай, Дюро! Пришол ти шовгор Микола та гварит, же вецей не приимают свинѣ до кооперации, ани не знати, коли будут, але одказали, жебы-сь духом пошол выплатити долг за концентрат и проценты, бо тя дают до суду! А за гевтого буяка, што есь го перед мѣсяцем вывезл, та ищи есь и должный, бо гварят, же пошол по четвертой класи...

Ей, Миколо, Миколо, свѣт тя побил, та што-сь ми перервал такый крас­ный сон! Кебы-сь лем знал, якый ем был щастливый и задоволеный! Чом же вшитко тото, што красное, мусит ся минути?

Бачи Дюра з Керестура

Ей, бул то кедиш красни час

Валалски дожица. Нови Сад. 2010. Ст.53.

Читати цѣлу книжку (в языку бачванскых Русинов):

issuu.com/rusnak/docs/baci_djura_z_kerestuta_1