Електрика, електричность

Ищи зо школной лавкы каждый знае, же електрика, електричность была на зачатках объявена як притягованя або одпыханя ся предметов, а выявляла ся на дарабчику янтаря, котрый ся наелектризуе, кедь го кусчок почухати. Ачей каждый в дѣтствѣ забавляв ся такым доступным физичным експериментом.

Янтарь по латынски – electrum, по церковнославянскы, з грецького – електер. Так же в сем случаю етимология слова е цѣлком очевидна. Поважат ся, же первым ввел термин «електричный» Виллиам Джилберт (William Gilbert, 1544–1603) – английскый физик, дохтор при дворѣ Ержии I. и Якуба I. А же в тамтых часах природны наукы были лем в зачатках, межи научныма конарями не было такой диференциации, як днесь, о том свѣдчит и подобность межи physicist (физик) а physician (дохтор).