Фраирцѣ

В повѣтрю черяючых ся думок,
Тихонѣцко,
Мое сердце Тя збачило,
Твою красу
Собѣ лѣтаючи пило.

Смѣхом милодарным ся обзрѣла-сь,
Шептаючи
Мыслёв есь ми проходила,
Своим чутём
Во мнѣ ...мене-сь погладила.

Днесь блаженна радость
Свѣту ся яла.
Я дыхав ем Твою доброту
Горстями...
... тоту душѣ чистоту.

Ишла-сь кроком танця
Як моделка,
Граючи ся свѣтлом ночи,
Легѣценько
Влѣтала-сь до моих очей.

Як непереставаюче сонце
Роздаваш тугу...
Кров ми моцнѣйше пулзуе...
... лагодненько
Тебе як ангела чуе.

Притулям ся к Тобѣ,
Твою
Цѣлую душу,
Но Ты ся од мене одверташ
Помаленькы,
Бо уж якбач когось маш.

Не втѣкай, Моя... моя любов,
Почекай ня!
...мое сердце Тя стратило,
В жалю своём
В Исусови ся молило.

Забылась ся як сон той ночи,
Незабытный!
Любити Тя не престану,
Навсе и лем
Тебе, мою миловану.

Жерело: https://www.holosy.sk/frajirci (заниклый сайт)