И души утѣха…

     Иде ярь... Перва нам за то весело повѣла верба, роспустивши свои баршоновы шуткы — вербовый цвѣт. В яри лѣс ожыват, пробужат ся к новому жывоту. Апрѣль называвут мѣсяцем лѣса. Лѣс щи раз стоит голый, али сям-там увидиме знакы пробуженя природы. И не треба много фантазии и представы прото, обы увидѣти, же скоро выпукнут липкачѣ и сочисты пупочкы, фришно пустит ся гоном зеленый лист, заповнит ся вшытко доокола веселым потячым щеботом: ярь прийшла!

     Вступиме тогды в лѣс, як у повный повзнесеной торжественности храм природы. Прислухайте ся: яка акустика! Як далеко даст ся чути кукованя зазулѣ и клепот дятла, спѣв дробного лѣсного потяча! Заглубѣм ся мало дале од транспортных тягов, де вже не чути гучаня моторов ци желѣзницѣ. Ляжме собѣ горѣлиць ци намѣстѣм ся ладно сѣсти, хребтом приперши ся до читавого ронкова. Запрѣм очи, навѣваючи собѣ почуваня степлѣлых и зобтяжѣлых клѣпок. Одстранѣм ся од неприемных думок, дайме ся ростопити и сплыти ся из тым безграничом торжествующой лѣсной литургии. Лѣс — балзам на душу, доступный всѣм и днесь, коли многое и многым учинило ся недоступным. Лѣсом ступат ярь. Лѣс радый чекат и на вас. Коли сьте там были напослѣд?

Жерело: Игорь Керча. Подкарпатська Русь, №8(28), 1993.04.22