К идеалу

Я повный весь тобою, мила,
Я всягды вижу образ твой,
З тобов блестят ночны свѣтила,
И вдень стрѣчаю ся з тобов!

Пахнячый корч, рыбник, дубравы,
Цвѣтками стелены поля
И баршоновых лук муравы
Всѣ лиш за тебе гомонят;
Во снѣ глубоком пробѣгаеш,
Фаребно пишеш мои сны,
И мои чувства роспаляеш,
И мрѣи запаляешь ты;
Коли ’м в жалю нѣмый, нещастный,
В неволи, скорби и бѣдах,
Ты свѣтиш ми з душою ясно,
И в твоих легше ми слызах!

Коли ж заблужу в тмѣ глубокой,
Ты моя судничка, звѣзда;
Твойой душѣ крыла высоко
Мене подносят в небеса!

Ты вѣрна, скромна, непорочна, …
В селѣ родивши ся на свѣт,
Ни свѣта модного лукавства,
Кокеток майстерный привѣт,
Ни ходы речи таинственны,
Ни в усмѣх закрывати жаль,
Ни лляти слызы принужденны,
Ни лицемѣрно брати тварь
Ты не учила ся; — но гений
Уже в колысцѣ осѣнив
Тебе красов и наслаждений
Невинных ройом наповнив.

Жерело: (Свѣть 1867. Ч.8.)