Карпатскый медвѣдь

Одного разу встрѣтил волк лишку

И на приемность взял ей собѣ за товаришку.

Разом собѣ гуляли в Карпатах по лѣсѣ,

Аж смотрят, а там медвѣдь лежит на брѣсѣ!

Волк ся облизал и слина му потекла,

Та и хытра лишка тыж бы ся неодрекла.

Бо преця ж обое завсе голодны,

Пазураты, драпежны и крови жадны…

И так обое стали розсуждати,

Як бы сильного медвѣдя на жер взяти:

—Даме сой рады, — гварит дурный волчиско.—

Таж то не лев, а старый медвѣдиско!

Я узброеный в кловакы, а и ты не слаба,

И что ж нам може зробити медвѣжа лаба?

Ты хапний за перед, а я за хвост,

Розорвеме, и часть свою кажде собѣ зъѣст...

—Идь же, не будь дурак, — гварит лишка хытрѣйша
И от дурного волка завсе мудрѣйша, —
Не силов, а взяти го легше на штуку
И так затуманити через нашу науку!

А як уж го добрѣ отуманиме,

То и сам можеш знати, же го легше задусиме!

И не буде нам под носом заважати,

А тогды будеме в Карпатах пановати…

А медвѣдь, хоть старый, мал добры уха
И, хоть спал, то вшытко добрѣ выслухал:
—Та ж я звѣрь славный на горы Карпаты,
Кто ж то хоче мои кости обгрызати? —
Тай хап в лабы желѣзны лишку и волчиска!
Кости им стрѣщали и наверх вышли очиска.
—Вы прокляты! Як вас морит голодом,
Глядайте сой поживы межи своим родом!
Вы ту? Ту мои лѣсы и горы Карпаты!
Я сой ту потрафлю и без вас пановати!
 

Така то штука быват не лем межи звѣрями,
Але быват также межи цивилизованыма народами…

Залѣсян