Хочу быти Словаком!

Так бы-м рад быти Словаком
я нещастный Русначок!
Йдут ми нашы слова боком,
бо ми ганьбливо з них – чом?

На ярмарку у Мартинѣ
куплю собѣ фуяру
Будучность е в новой вѣрѣ,
выкашлю ся на стару.

Боже мой, як милозвучны
словенчины звукы суть!
Навчу ся их гварити зручнѣ
й до свѣта ми втворят путь.

Жыти из женов з Жилины
было бы ми акурат.
Одпишут ми одтам жены,
кедь си подам инзерат?

Бо кедь не я, хотьлем дѣти
будут горды Словакы,
з Руснакии гет бы идти...
Же думаш так, крещу й ты?

Заберьме ся из Бескыдов,
де все й теркы не роснут.
Я щи-м такого не видѣв,
бы ту нашов к щастю путь.

Так бы-м рад быти Словаком
я, дурный Руснак з выходу!
Вера, же то не еднако,
яку тримлеш, братку, моду.

На Словеньску – по словеньскы!
народный закон велит.
Нач будити Русначиска?
Най солодко – Медвѣдь – спит.

Чоловѣк есь, но без вагы!
К Словакам нам треба идти!
Але же не мам на драгу
мушу дома сидѣти.

Гварите, бы ем быв тихо,
но я не годен лем так.
Запхати ми рот устигне
лем правовѣрный Словак.

Жерело:  Народны Новинкы  5-8/2005. 2