Храньме мир на земли

Войнова тематика в творчости Штефана Смолея е доминантов, и хоть он опе­рать ся все на реалны факты и особ, переростать она рамкы хроникы и в его выкладѣ по­ста­вать умѣлецкым вытвором высокого сосполного звучаня. «Ще до днеська людям не змог никто высвѣтлити, чом мусѣли толькы жертвы люде приносити» – то не е про­сто реторичное звѣданя, над котрым ся задумуе. То е и мементо про днешны новы ге­не­рации, котры, на жаль, як видиме, нич ся не научили з истории и сут легко под­дай­ным объектом в руках политичных манипулантох.

На память Андрѣя Шанты из Рошковець,
котрый загынув в новембрѣ 1944 р. в селѣ Миновцѣ
в Стропковском окрузѣ, де есть и похованый.

Од послѣдной страшной войны

вельо рокы прошло,

много людей ся минуло,

вельо на свѣт пришло.

Фронт перешов нашы села.

Люде ся вертали

до своих сел из далека,

домов приходжали.

Андрѣй Шанта из Рошковець

домов ся понагляв,

як и другы, своих близкых,

жену, сына глядав.

У Миновцях ишов польом,

мина выстрѣлила,

одорвала едну ногу,

другу поранила.

Андрѣй лежав, не годен быв

з землѣ ся подняти,

кричав, плакав, став ку собѣ

помоч призывати.

Недалеко в селѣ люде

его плач слухали,

живот ему захранити

одвагы не мали.

Кто бы пошов до пропасти

исту смерть глядати?

Андрѣй мусѣв без помочи

На полю сконати.

Стихли слова, нарѣканя,

сонце западало,

из послѣдныма лучами

з ним ся розлучало.

Вѣтор задул, як бы хотѣв

раны загоити,

з Андрѣевой зимной твари

слызы высушыти.

Вмѣсто мамы земля-мати

зтиха зашептала:

«Спи солодко, милый сыну» –

и его обняла.

Вельо страсти, болю, жалю

люде проживали,

а про кого слызы и кровь

свою проливали?

Ще до днеська людям не змог

никто высвѣтлити,

чом мусѣли толькы жертвы

люде приносити.

Храньме мир на нашой земли,

в мирѣ добрѣ жити,

лем треба еден другого

любити, учтити.

Жерело: InfoРУСИН 5/2006. 6.