Комарова смерть

Народна спѣванка Угорской Руси в запису Александра Духновича.

Гукнуло, пукнуло в лѣсѣ:
Комар з дуба повалив ся,
Розбив собѣ головище
На дубовый корѣнище.

Вылетѣла муха з хаты
Комарушка жаловати:
Ой комару, мой комару,
То ми тя жаль, не помалу!

Де ся велиш поховати,
Твое тѣло честовати? –

Поховайте мене въ лѣсѣ,
При дубовом конарисѣ.
Насадьте ми петрушонькы,
Зеленой марунонькы,*
Тоту будут дѣвкы рвати,
Комарушка шановати.

Ай тут его лежит тѣло,
Не едного оно ѣло;
А тут лежит его сало,
Не едного смаровало.

А тут лежит его труба,
Котора упала з дуба.
Ой-ду, ду-ду, ду-ду, ду-ду,
Комарушка не забуду!

Текст: (Народныя пѣсни Галицкой и Угорской Руси,
собранныя Я.Ф.Головацким. Часть II. 564–565)
Анимация: https://img6.joyreactor.cc/pics/...

----
*Asperula odorata – Ясменник пахучий – Маренка запашна.