Кровавый Великдень в Карпатах

В конци марца 1915 российскы войска зачали послѣдну пробу взяти Карпаты, котра ся не удала, и зачатком апрѣля зачали ся стяговати назад. Горское село Рунина (мад. Juhászlak) в апрѣлю року 1915 стало ся епицентром горячой биткы рос­сийско­го и австро-мадярского войска. Од зачатку рока в Карпатах российскы войска стратили еден миллион вояков, а коалиция  их противников – 800 тысяч.

Было то в свѣтовой войнѣ. Правѣ 24 роки то­му, як на самый великий чет­верь в вышном Земп­линѣ, по упадку Перемышля, наше войско зачало стягованя на юг. Наш фронт из Галичины вернув ся на линию: Гостовиця — Зва­ла* – По­ля­на* – То­поля – Збой – Ужок. На лѣвом крылѣ высше Гумен­ного хоробро воевали нѣмецкѣ сол­даты а на правом крылѣ при Ужоку само­от­вер­жен­но вое­вали гонведы генерала Сурмая. Страшно было видѣти в ночи го­рящѣ села. К сему еще приходив шум канонов и троскотаня машингверов. Чер­венѣ дымянѣ хмары с ужа­сом и трепотом наповнили нашѣ сердця.

Найбольше пострадали обывателѣ кар­пат­ско­го села Рунины, де из 44 хиж лиш 2 остали ся цѣлы­ми. На самый Великдень рано о. Юлий Фирцак, то­полян­ский при­­ходник благословив паскы, но на полудне уже в Рунинѣ были рос­сий­скѣ войска. Че­рез непереходимѣ пѣш­ники переступили Бескиды и роз­ло­жили ся в селѣ, заложили там розличнѣ магазины, болницѣ и иншѣ во­енскѣ инсти­ту­циѣ. План рос­сийской ко­манды: из Рунины зарвати ся через Настаз до Мадяр­щины, — запечатовав осуд села. 5-го ап­рѣля, от Руського Потока, из Малого Буковця зача­ла ся канонизада. Но малѣ каноны не много шко­дили. 7‑го ап­рѣля на самое Благовѣщеня тяжкѣ ка­ноны запалили село. Перший гранат уда­­рив до хи­жѣ Ива­­на Оринича и цѣла семя, мати с 5 дѣтьми были уби­тѣ. Отець военноплѣнный быв в России. На полудне уже цѣлое село горѣло. Обы­ва­тельство, что могло, рато­вало и с худобою стягло ся под Вели­ким Буковцом до ед­ного глубо­кого потока.

Перестрашена русска пѣхота зобрала ся в де­ре­вяной церковци и голосно молила ся к Богу. Пять гра­натов ударило до церкви, турня и верх упали, но цер­ков не запалила ся. Воины на куски порѣзали цер­ковнѣ оде­жѣ и як амулеты держали в ру­ках и спѣвали. Також по­рѣзали и позостатки просфоры и еден дру­гого с част­инками причащали. Дакотрѣ се­ля­не вернули ся до села спа­с­ти ху­до­бу, из сих многѣ были гранатами убитѣ. Так про­пали: Василий Ган­чак 65‑роч­ный, Георгий Станко 65 р., Анна Товдак 110 р., Мария Сисак 6 р., Олена Мащак 35 р., Василий Чернега 14 р., Бобенич Васильова 35 р., Олекса Бобенич 6 р., Иван Чернега 6 р., Георгий То­да 65 р., земледѣльцѣ. Русска военска болниця сов­сѣм унич­тожила ся. Страшно было видѣти хворых и раненых, коли хотѣли спасти ся из огненного пекла. Но не удало ся им. Из села до лѣса лиш едным путем мож было ити и сей путь, лежав в районѣ неприятельских канонов. Кто не згорѣв в селѣ, того убили шрапнелы и гранаты. На не­щастя настав такий хаос, что и русскѣ каноны стрѣляли до села. От русского шрап­не­ла были убитѣ: Василий Ло­вич 75 р., Регула Георгиева 33 рочна, Петро Гачко 31 р. и Соколович Иванова  47 р., земледѣльцѣ. Многѣ со­вер­ше­н­но утратили ро­зум. Русскѣ воины с байо­нетом про­били Ивана Чернегу и жену Петра Товды, на что селяне с то­порами на куски порѣзали воинов. Из сего живого пек­ла ледва кто высвободив ся. На вечер уже лиш попель ука­зовав на мѣсто, де рано еще веселое село лежало. И су­сѣднѣ села много терпѣли. Звала, Поляна, Ново­селиця, Збой были гранатами запаленѣ и цѣлый Збой мусѣв выселити ся на уличскѣ луки, де от великих дождьов и от зимы многѣ перестудили ся и поумирали. Уличский отець на­мѣстник каждый день похороняв их по луках. Страш­нѣ то были часы. Вмѣсто радостного воскресения под Бески­дами плач и рыданя и смерть царствовали. Теперѣшнѣ Русины перекрестять ся, если гово­рять о том страшном кровавом Великодни.

Од глада, огня и войны сохрани нас, Господи.

-------
Звала и Велика Поляна – днесь несуществуючы села, зачатком 1980‑х были одселены при будовѣ клавзуры Старина.

Нова Недѣля, 9. апр. 1939, с. 6.