Кто сьте, Петро Азарий?
Мало что знати за него, не есть спомянутый ани в енциклопедиях М. Алмашия, П. Р. Магочия, И. Попа, ани в очерку П. Феерчака. Умер молодым и не устиг написати много. Е. Недзѣльскый пише, же в студентскых роках в Унгварской гимназии интересовав ся поезиев Лермонтова и Баратынского. Евмений Сабов (Очерк литературной дѣятельности и образованія Угро-русских) односит Петра Азария «к самым талантливым писателям, начавшим свое дѣйствованіе в “Свѣтѣ”». Дале пише:
От 1871. года до начала 1873. вмѣсто «Свѣта» стал издавати ся «Новый Свѣтъ»… Лучшими сотрудниками «Н. Свѣта» были А. Павлович, Петр Азарий (1846–1874), бывшый учитель русского языка при Унгварской гимназии, написавший нѣсколько удачныхъ стихотворений. Он писал и в «Свѣтѣ» под псевдонимом Боржавскый и Яворов; для «Нового Свѣта» перевел превосходное сочинение мадярского писателя б. Йосифа Етвеша Parenaisis. Боржавскый сдѣлал было большую услугу угро-русской литературѣ, но скорая смерть не допустила розвити ся его поетическому таланту.
За Павловича, без сомнѣвку, чув каждый. Але за Азария, чие имя удостоило ся стояти з Павловичом в едном ряду? Найширшы вѣдомости подае Листок, выдаваный Евгением Фенциком, в Очерку угро-русской письменности, котрый печатав ся на продовженя и в едной, правда невеликой, части цѣлком быв одданый Петру Азарию. Там читаеме:
Петр Азари еще в своих студенческих лѣтах обнаружил неповседневный поэтический талант. Стихотворения его отличают ся правильностью. Он даже в гласоударении, которое у нас, по причинѣ словенскаго и мадярскаго влияния, много потеряло в правильности, рѣдко ошибается. На предметы смотрит Петр Азари объективно и чужд всякой сентиментальности. Родился он 1846‑го года, гимназический курс кончил в Ужгородѣ, 1872‑го года был рукоположен в священники и опредѣлен учителем русского языка при Ужгородской гимназии. 1874‑го года нечаянно скончался. Смерть его произвела потрясающее впечатлѣние на всю Угорскую Русь.
А теперь прочитайме його стихы, обы сьме годны посудити справедливость тых слов и оцѣн. А чим же мог упасти в немилость у нашых енциклопедистов? Ачей, лем тым, же молодый, неопытный и нерозважный написав оду владыцѣ Стефану (Панковичу), котрый, подля сполоченского тренду, мав быти мальованый лем на чорно. Так походив не лем он сам, але й иншы, на шкоду русинству.