Лемкове у звѣданях и одповѣдях
Сей твор Ксенича Павла – его литературный дебют, е з року 1999 и был написаный и появеный по польскы. З увагы на его литературну вартость заслужит, жебы ся з ним ознакомила и шырша громада Русинов, ай не познаючых до тонкости польскый язык.
Лемковска проблема оддавна заимат науку. За тот вопрос ся берут як особы до того одповѣдно квалификованы, так и неоправнены, што вецей выражают властны чуства и почувы, а тоты небарз ся причиняют до выясненя высшеозначеной проблемы.
Туй нароком хоснуеме слово «проблема», бо студователь Лемков на каждом кроку ся наражат на загадкы и лапкы. Што то за едны тоты Лемкове?
Одкы ся взяли? – любил бы знати етнолог. Ци сут Лемкове окремым народом, ци групов етничнов? – звѣдуе ся социолог. А звѣданя ся множат. А з нима и одповѣдѣ. Лем небарз ся тото надае до публикации. Тот стан мат за причину незнатя дѣла, хыбное вниманя реалности, але и замылены представы о властной мудрости.
В нашом елаборату кладеме за цѣль дати лемковску проблему до цѣлком иншого свѣтла и пошорити дотеперѣшны научны резултаты. Автор, звѣстно, не мат амбиции одповѣсти на вшыткы звѣданя. Еднак чуе ся повинным подѣлити ся властныма замерькованями, опертыма на донынѣ не публикованых або игнорованых историчных документах.
1. ГЕНЕЗА. Нуж, зачало ся вшытко од основы. У XIV. вѣку на Балканѣ, в едной корчмѣ прийшло до перекы, же як далеко е одты до Горлиць. Едным из сперечников был Кшышько, што твердо стал на том, же недалеко. И ставил ся о свое бронцовое теля, же мат правду. Лем требало то даяк досвѣдчити…
На другый день пустил ся до Горлиць. А взял зо собов свою фраирку, брата Петрика, а щи далшу родину.
Ту буде на мѣстѣ выяснити вопрос волошского поведеня Лемков. Бо Кшышько тот мав прозвище Олас (з мадярского: Талиан). И так го звекша ай кликали. Лем из часом, бо дорога до Горлиць довго держала, зачали го кликати Олаг (з мадярского: Волох). Не знати пунктом, чом так ся стало. Може од змученя з дорогы, а може даяка фонетична пакость?
Доста того, же зачали за Кшышька и его родину думати, же Волохы. Так же треба знати, же волошскый елемент – ото досправды талианскый. А пастырство, што так часто вяжут ид Волохам, не мат нич до пасеня овець. Того Кшышька мали за патера духовного, што старав ся о свои овечкы и провадив их до Горлиць.
Звѣстно, же не сами Волохы (циже Талиане) формовали Лемков. У часѣ вандрованя долучили ся и другы, што ся злакомили на легкое жытя. Найменше 95 такых груп нараховал ем. Туй опишу лем дакотры, найважнѣйшы.
На самом зачатку вандровкы Кшышькова парта натрафила на Циганов. Тоты, правда, прямовали инде, но по усиловных нагварянях Кшышьковой фраиркы пристали на то, же на даякый час долучат ся и будут им играти на гуслёх. И так обстали ся. Нафурт. Од них Лемкы мают наданость до музикы и темны волосы.
Пару дни по встрѣчи з Циганами поход зостал зопертый збунтованыма селяками Румынами, што думали, же ту ся перевозят тунѣ шмукы. По довгых догварьках и твердом словѣ, же не иде о шмугель, Кшышьковы достали дозвол на переход. А такой многы одчаяны Румыны и Аромуны, котрым не было што стратити, прилучили ся ку походу. А же у едного з них была з навщивов родина з Албании, та и тота пошла за нима, од них в лемковскых жылах тече даякый процент и албанской кровли. Лемкове мают од них склонность до газарду.
Далшым елементом стали ся Шведы. Было то звѣдництво шведского войска, што рихтовало окупацию Польщи. Еднак з причины перемѣны у командованю войска забыли о них. И так зоставали они на своем посту без новых росказов. А туй трафила ся нагода змѣнити свою долю, та змѣнили. Повандровали з табором. Лемкове мают по них небовы очи и свѣтлы волосы.
Якусь ноч в допроводѣ свистаня, вытя и криков лололооо – лололооо принесли ся Индиане на бизонах. Понеже не мали они злых намѣров, та и они были прияты вдячно. Так и они пошли за Кшышьком. То были звекша Команчи, што пак заложили село Команча, ай пару Сосонов, што розышли ся по вшыткой будучой Лемковинѣ. По них мают Лемкове довгы волосы и шапку з пѣря.
Довго не знал ем, як пояснити притомность Ескымов у табору. По довгых студиях звѣзд бизовно ем ся пересвѣдчил, же упали з Мѣсяця. И так уже зостало. Лемкове мают по них кожухы.
Треба, звѣстно, спомянути и польскый елемент. Нуж, доставши ся до Горлиць, Кшышькова парта застала там польскых колонистов, котры там были од зачатку. И, наистѣ, были бы и дале, аж бы не порывный Сидяча Стрѣла. Тот их вшыткых повыганял. А што з того: вночи не росстановили стражу и векшина Поляков ся вернула. Кшышьковых хлопов из постелей повышмаряли и позанимали их мѣста. Жоны нич не стямили. И так ся зостало. Лемкове мают по них букву «п». И то не не мали бы забывати.
Ясное дѣло, нѣт што и думати, жебы описати вшыткы групы, котры сформовали Лемков. В часѣ довгого маршу прилучали ся все новы и новы фатеве. Без даякой специалной филтрации. Кшышько звѣдовал: Агов! Што сьте за едны? Свои! – так му одповѣдали. Та подьте з нами – додавал Кшышько. Но та ишли. На зачатку кажда група окреме. Вшыткы были честны, держали ся за рукы. Правда, по часѣ помѣшало ся. Дакотрый ишол позычити цукру и не вернул ся. Швед хопил за руку Румынку и уже не пустил. Гет помѣшало ся.
2. ЯЗЫК. Як ем уж споминал скорше, на Лемков ся склали найменше 95 груп. А кажда свой властный язык хосновала. Пак требало дашто из тов галибов зробити. По довжых розважанях досудили ся вшмарити вшыткы языкы до едного котла и замѣшати. Замѣшали файн. И так настало язычие. Циже Лемкове властного языка не мают. Мают 10000 слов албанскых, 30000 –румынскых, 23499 – японскых, 9999 – польскых, а дале не мам дякы числити.
Ту яло бы пояснити, скады ся бере назва Лемкове. Росшырена думка, же од слова «лем», што значит «lediglich». Тото нонсенс.
Направду, та Кшышько звыкл был гойкати: гей, гей! Лем же мал хыбу выгваряня и намѣсто «г» и «й» выходило му «л» и «м», та одты чуло ся: лем, лем! И з часом того фофлавого Кшышька и его громаду зачали называти Лемками. Хоть справнѣ бы было Гейками. Але так уж е, як е.
Кедь судиме о справности назвы, любил бых додати, же з колегами сьме зважовали, ци бы не назвати Лемков Зычаками, зачим такыма сут у сущности. Позычили кров, позычили язык, а як дале увидиме, та и ношу позычили. Но, раз даме собѣ з тым покой. А пак ся увидит.
3. НОША (СТРОЙ). Платя, у котром Кшышько и его парта рушили у путь, подерло ся им гет скоро. Подорога была довга и тяжка. Пак мусѣли в дорозѣ зычати. Раз боканчи, раз порткы. Вшытко, мусѣли были оддати, як ся будут вертати. Айбо вернути ся никто не вернул. И так то зостали. У позыченом. А вшелияк, то некрасно так, зычати и не оддавати.
4. ГРАНИЦѢ. Знаме, же границѣ сут або природны, або чинены. Кедь иде о Лемковину, та южна границя и западна ледвы ци збудит у дакого сомнѣв. Границя сѣверна… но, и на тоту могли бы сьме пристати. Но, а з границев восточнов, там уж е векша проблема. Зато, бо не знати, де е. Лемкове не поклали граничны стовпикы. А теперь не зостало им нич, лем чухати ся у потылицю.
5. ГРУПА ЦИ НАРОД? Кым сут Лемкове днесь? Занѣ одповѣм на тото звѣданя, любив бых усвѣдомити каждого, же кой у XIV. вѣку у маршу походовали найменше 95 груп, та днеська е их 3579. Ту счислю лем даколько важнѣйшых.
Уже в часѣ маршу выокремила ся група Закшышьков. Тота назва повела ся од их незмѣнных слоганов: За Кшышьком! Вшыткы за Кшышьком! Тота група мат силное чутя груповой окремѣшности, а з иншыма групами тримле зносины.
В осадѣ Конечна найдеме Лѣвоспачи. Они мают звычай спати на лѣвом боку, з того назва. Такой близь, у Ждыни, бывают Храпачи. Назва е од звычаю храпѣти под час сну. У тых груп силно розвитое чутя груповой окремѣшности, а зносины тримлют спорадично.
Интересну групу найдеме в осадѣ Прегонина. То сут Пупакы. Их обявил и назву им дал мой колега. В часѣ едной своей выправы замѣрил ся на штудированя генезы Лемков. Про то од каждого встрѣчного хлопа ся звѣдовал: Одкы сьте ся взяли? Еден найвецей резолутный респондент му на то повѣл: Од пупа здолы! (Фуй! – зазначка моя). Пупакы знают собѣ цѣну. Тримлют ся просто.
Кого бы ту щи змаповати? Но, правда ж, барз бы вартало Цицаков, Стояков, Темняков. Вшелияк, не иде о то, жебы всѣх до лабы счислити и описати. Значущым е, же Лемкове ся рознят. Тот факт нам годен помочи в одповѣди на звѣданя, покладеное на зачатку сего пункту. З увагы на то, послужу ся методом, што подля мого колегы е необычайно резултативным. Допустит прецизность до 0,001 секунды. Лице ци рубы? Лице – Лемкы сут народом, рубы – не сут. Мечу грошик. Летит, крутит ся. И я собѣ. Напятость росте. Грошик спаде, переверне ся. Фертик! Рубы… Roma locuta causa finita*.
*) Рим повѣл свое, и конець.
Жерело: Олена Дуць-Файфер (ред.). Ци то лем туга, ци надія.
Антолоґія повыселенчой лемківской літературы. 448–451.