Осень на верховинѣ

Курта лирична шкица Ивана Комлошия написана в збалансованом невтралном клю­чи, без перегнано страдал­ницкого тона. Припоминать она лѣпшы описы под­кар­патской Верховины, котры находиме у А. Годинкы и А. Митрака.

Лѣто одышло. Осень настала.

Веселы и теплы днѣ горячого лѣта минули ся. Лучѣ сонця не грѣють, не при­пѣкають на чоловѣка и не обпалюють его бѣлое тѣло до буроватого. В рѣкахъ не куплють ся, не освѣжають ся, не прячуть ся од недающых покоя лучей. В лѣсах не видиме оддыхаючых туристох, не скрывають ся в тѣни лѣсной молоды любовны пары, и не спѣвать им на стрѣчу голосистый соловѣй...

На верховинѣ осень омного скорше наставать, як на широкых ровнинах. На высотѣ даколько сто, тысячи метрох в горах, скорше, як в остатку краю, паде снѣг, настають холоды, и воцаряють ся, бѣснують ся по голых, осенных, горскых хреб­тах сѣ­вер­ны вѣтры.

Ту осень наставать од зачатку септембра. Од септембра полонины постепенно пу­стѣють, пастухы лишають верхы гор, спущають ся в долины, згоняючи череды овець, коров, волох, пилують в села, обы, покля мож, умѣстити ся там и перебыти холодну сѣверну зиму в селѣ, в теплѣ и утулку. Салашѣ, колибы пустѣють, лѣсы тратять пожовтѣлы листы и стоять голы, пусты, з вы­сох­лы­ми вѣтвами, крозь котры вѣтер проносить ся, несе ся и свистить, вые осенну пѣсню. Зелена, густа, як называють ю в пѣснях – «шовкова» трава на лугах, до­ли­нах и полонинах, под натиском вѣтра згынать ся ку землѣ и болше не вставать. Так она спочивать до ранной весны, коли, дякуючи сонѣчку, снѣг топить ся, лан­цы холодной зимы перерывають ся, тогды она встане, обы ожити наново, до обратного прихода весны...

По ранах и вечерах стае по верховинѣ холодно, а валалы, села и верхы щезають в густой и прозрачной мряцѣ. Сонѣчко, котрое теперь поздно вставать, не мае то­ль­­ко сил, обы могло своими, косыми и доста слабыми лучами пробити ся через то­ту стѣну мрякы.

В нынѣшном часѣ осень зовсѣм оцарила ся на верховинѣ. Признак ей вер­хо­вин­цю добрѣ знакомый: легкый мороз, довгы ночѣ и мрякы.

Верховинцѣ – народ бѣдный, но богобойный и трудолюбивый – з настаньом пер­вых осенных дни, заберають из гор, з поля вшитко то, што им там в ништожных роз­мѣрах уродило ся. Родять ся на верховинѣ болше всего кромплѣ. Ту-там за­сѣ­я­ный кус землѣ и кендерицев. Но она ту, на верховинѣ не дозрѣвать до своей пристиглости и не родить ся в такой колькости, як на долинѣ. Верховинцѣ збе­рають пилно урожай з поля, бо, кедь бы настали морозы, а за нима по­слѣ­до­вав снѣг, та вся работа, весь лѣтный труд верховинця бы пропав, бо из замо­ро­же­ной горской землѣ нич не мож выбрати.

По горскых полях пусто, лем дѣти выгоняють коровы на опустѣлы поля, де и уважають на них. На полях розпалюють огнѣ, дым котрых мряков розносить ся до края околицѣ.

Характерным явом осени на верховинѣ являть ся так называное «бабино» лѣто, циже паучина, котру горскый вѣтер розносить по полях.

З настаньом осени верховинець спущать ся в долину, иде в город закупити най­болше нужное для довгой и скучной зимы. Работы на полѣ нѣт, зато он иде в найближы лѣсы, обы застачити ся дровами.

Так едноставно и доста скучно царствуе осень на верховинѣ.

Въедно з осенев наступать и скука для верховинця, котрый не любить зиму, бо она приносить ему холод, морозы, снѣг а часто и голод.

    Жерело: Русскій календарь на годъ 1942.
 Изданіе Общества Русскихъ Братствъ въ Соед. Штатахъ С.А.

https://rolandanderson.se/Pravda_Press/Kalendar1942/peakoffall.php