Осень на верховинѣ
Курта лирична шкица Ивана Комлошия написана в збалансованом невтралном ключи, без перегнано страдалницкого тона. Припоминать она лѣпшы описы подкарпатской Верховины, котры находиме у А. Годинкы и А. Митрака.
Лѣто прошло. Осень наступила.
Веселы и теплы днѣ горячого лѣта минули ся. Лучѣ сонця не грѣють, не припѣкають на чоловѣка и не обпалюють его бѣлое тѣло до буроватого цвѣта. В рѣкахъ не куплють ся, не освѣжають ся, не прячуть ся од недающых покоя лучи. В лѣсах не видиме оддыхаючых туристох, не скрывають ся в тѣни лѣсох молоды любовны пары, и не спѣвать им на стрѣчу голосистый соловѣй...
На верховинѣ осень омного скорше наступать, як на широкых ровнинах. На высотѣ даколько сто, тысячи метрох в горах, ранше остатных краи, паде снѣг, настають холоды, и воцаряють ся, бѣснують ся по голых, осенных, горскых хребтах сѣверны вѣтры.
Ту осень настае зо зачатком септембра. Од септембра полонины постепенно пустѣють, пастухы опущають верхы гор, спущають ся в долины, згоняючи стада овець, коров, волох и пилують в села, обы, покля мож, умѣстити ся там и переждати холодну сѣверну зиму в селѣ, де болше тепла и утулного мѣста. Салашѣ, колибы пустѣють, лѣсы тратять пожовтѣлы листы и стоять голы, пусты, з высохлыми вѣтвами, крозь котры вѣтер проносить ся, несе ся и свистить, вые осенну пѣсню. Зелена, густа, як называють ю в пѣснях – «шовкова» трава на лугах, долинах и полонинах, под натиском вѣтра згынать ся ку землѣ и болше не вставать. Так она спочивать до ранной весны, коли, дякуючи сонѣчку, снѣг топить ся, ланцы холодной зимы перерывають ся, тогды она встане, обы ожити наново, до обратного прихода весны...
По ранах и вечерах стае по верховинѣ холодно, а валалы, села и верхы щезають в густой и прозрачной мряцѣ. Сонѣчко, котрое теперь поздно вставать, не мае только сил, обы могло своими, косыми и доста слабыми лучами пробити ся через тоту стѣну мрякы.
В нынѣшном часѣ осень зовсѣм оцарила ся на верховинѣ. Признак ей верховинцю добрѣ знакомый: легкый мороз, довгы ночѣ и мрякы.
Верховинцѣ – народ бѣдный, но богобойный и трудолюбивый – з настаньом первых осенных дни, заберають из гор, з поля вшитко то, што им там в ништожных розмѣрах уродило ся. Родять ся на верховинѣ болше всего кромплѣ. Ту-там засѣяный кус землѣ и кендерицев. Но она ту, на верховинѣ не дозрѣвать до своей пристиглости и не родить ся в такой колькости, як на долинѣ. Верховинцѣ зберають пилно урожай з поля, бо, кедь бы настали морозы, а за нима послѣдовав снѣг, та вся работа, весь лѣтный труд верховинця бы пропав, бо из замороженой горской землѣ нич не мож выбрати.
По горскых полях пусто, лем дѣти выгоняють коровы на опустѣлы поля, де и уважають на них. На полях розпалюють огнѣ, дым котрых мряков розносить ся до края околицѣ.
Характерным явом осени на верховинѣ являть ся так называное «бабино» лѣто, циже паучина, котру горскый вѣтер розносить по полях.
З настаньом осени верховинець спущать ся в долину, иде в город закупити найболше нужное для довгой и скучной зимы. Работы на полѣ нѣт, зато он иде в найближы лѣсы, обы заобезпечити ся дровами.
Так едноставно и доста скучно царствуе осень на верховинѣ.
Въедно з осенев наступать и скука для верховинця, котрый не любить зиму, бо она приносить ему холод, морозы, снѣг а часто и голод.
Жерело: Русскій календарь на годъ 1942.
Изданіе Общества Русскихъ Братствъ въ Соед. Штатахъ С.А.
https://rolandanderson.se/Pravda_Press/Kalendar1942/peakoffall.php