Пан Король
Типову рождественну тему помочи ближнему, сочуства, милосердия автор рѣшае через нестандардный психологичный портрет свого героя, елегантно и недокучливо добиваючи ся тым своей дидактичной цѣли.
Пан Король тягне ся попри стѣны низкых залишеных хыж на ходнику, котрый уже давно потребовав бы поправкы. Е вечер, день вечера Рождества Христового. Пан Король стремить ся к своей квартирѣ, котра находить ся у вонковых частях города. Пан Король не мае жоны, не мае дѣтей. Квартира у него ряндава, паскудна. Комнатка в дворѣ, благо, же не треба за ню много платити. Електричного освѣтленя и отопленя – дасть Бог, нашто они пану Королеви.
Все ж пан Король порядочный урядник з краснов платнев в едном из многочисленных департаментов державы. То, же он в легком осенном кабатѣ спѣшить в свою нетоплену комнату, причина та, же од пана Короля его шиковнѣйшы товарише его платню вымантять, выхоснують так, же ему ледва что остане ся. Лишь только, колько держава дозволяе сякым задовженым панам, а то немного.
Бо пан Король е дуже доброй натуры, дуже добрый чоловѣк. Коло послѣдных дней мѣсяця прийде к нему сей або той товариш з вексликом на болшу сумму.
«Пане Королю, – жалуе ся товариш – подпишѣть векслик! Лем для формы. Вам и так не треба платити нич. Знаете: жона, дѣти. Тым все треба штось, а из платнѣ не выстачить.»
Пан Король дивить ся на векслик. Сумма гет велика.
«Подписав ем векслик товаришу Леффлерови. Не платив, а мусѣв быв ем выплатити вмѣсто него. Ци выплатите вы?»
«Неодмѣнно, – говорить товариш. – Все се лиш для формы. Говорю вам, не треба буде вам платити, хыбай подписати.» Товариш божить ся на Бога и на всѣх святых. Пан Король еще сомнѣвае ся, але не довго. Подписуе вексель. Через три мѣсяцѣ товариш, хоть як божив ся, не платить вексель. И подписаный не дуже хоче. Най платить пан Король.
Жона пана товариша ходить в превосходных одежах, дѣти тоже красно одѣты. Квартира в серединѣ города, але платити не платить. Най платить пан Король, котрый и тото не знае, де мае подписати ся.
Шиковнѣйшы товарише и тото доведуть, же и из невеличкой платнѣ Короля знають стягнути якысь грошикы. Не много, бо того много не е, але все ж грошѣ.
Менша жура для пана Короля. Пан Король вечерами попод хижами вонковой четверти тягне ся дому.
Але тот, кто думае, же пан Король за се гнѣвный, або недовольный, дуже помыляе ся.
Пан Король, хоть платня его изза рочных вексликов мала, не мае жоны, не мае дѣтей и перебывае и в зимѣ в нетопленой комнатѣ, все же зовсѣм спокойный, зовсѣм довольный.
Пан Король и теперь довольный. Дома чекае его нетоплена комната, на передвечер Рождества не чекае его дарами никто, он сам для себе не купив нич, все же довольный и довольно цабае дому. Бо пан Король, як зложить перо в урядѣ, зачне фантазовати уже в дорозѣ до дому. Его платня, аж бы и остала ся цѣла, ништожна к тому доходку, што пан Король, добрый, честный пан Король, мае в своей головѣ. На зачатку платня его еще невелика, лиш така, обы мог выплатити довгы и помочи даколькым бѣдным, о котрых знае. Потом доходок его уболшае ся. Уже такый великый, же може всѣх бѣдных города выпомочи, най и они мають Рождество, свята. Най не бѣдують, як теперь.
Наколи дойде до дому, доходок его уже такый великый, же може заложити дом бѣдных, дати на фундации; не такы суммы, якы дае город своим бѣдным, але суммы, из котрых бѣдны люде можуть по панскы жити.
Дома запалить свѣчку и закутермае ногы свои в дѣравое покрывало, бо дома гет студено е. Сидить в комнатѣ и дивить ся на свѣчку. Претензии его ростуть и уже не в бѣдной комнатѣ е. Комната его росте, стане великов, свѣтлов, бо и свѣчка перемѣнить ся в електричны свѣтла, котры озарюють его палату, безконечный ряд комнат, прекрасны входы и выходы.
Грошей у него много, дуже много, як смѣтя. Уже миллионами рахуе. Заложуе болницѣ, заосмотрюе их фундациями, около него уже нѣт бѣдных людей. Але все еще не доста. Только бѣдных, нещастных людей е на свѣтѣ. Треба помочи всѣм, всѣм. Уже миллиардами рахуе, у него золоты копалнѣ, копалнѣ на диаманты. У него вынаходкы, котры приносять ему грошѣ лиш зато, обы помагав бѣдным и нещастным, а он жие скромно. Уже нѣт бѣдных товаришов, нѣт вексликов, котрѣ он мае выплатити. Он всѣх здѣлав щастливыми. Сяк фантазуе пан Король в своей бѣдной комнатѣ, и не утямить, яку бѣдну вечерю ѣсть. Всѣ, всѣ щастливѣ суть. Наконець закутермае себе в свое покрывало, не чуствуе голод и холод. Щастливый заспить: всѣм помог.
Ци не щастливый чоловѣк пан Король?
Ци е щастливѣйшый, як он?
Навѣрно, такого щастливця, як пан Король, не е нигде на свѣтѣ. Товарише му держать его дурным, але он в своем дуренствѣ видить красшое, славнѣйшое, як его мудры товарише.
Щастливый пан Король, и его щастя не може взяти од него никто и нигде, бо хотя ты и дурный, але зато добрый и честный. Такым здѣлали тебе Бог и Его ласка.
Жерело: Литературна Недѣля, 1942, ст. 160–161 (под псевдонимом И. Бростяник)