Пенкало

Пера писати у давнѣйшых часах были такы, што ся мачали до тинты. Вынаходник Едуард Славолюб Пенкала (*1871, †1922), родом з Липтовского Микулаша, автор  до 80 запатентованых вынаходок, придумав и року 1906 запатентовав на Корольском патентном урядѣ в Будапештѣ под назвов «пенкала» механичну церузу, а 1907, слѣдом за тым, – наливное перо, до котрого ся тинта натяговала, и не требало го мачати. Тоты церузы и пера выробляла фабрика Penkala-Mostero, од чого ся повела и назва выробку. Слово «пенкало» сохранило ся доднесь у Русинох Бачкы-Срѣма и Пряшовщины, але заслужить и на повсемѣстное росширѣня в память о своем вынаходнику.

Пенкала был сын польского Жыда (Pękała) и Данкы (Hannel), школу выходив в Микулашу, гимназию в Бельцах, высшу школу во Вѣдню (медицина) и Дре­з­дѣ (хемия). З его иншых патентох: двохмѣстовый аеро­план, термос, детергент (средство на райбаня), желѣзнична бремза, анодна батерия, лѣк на ревму, што ся выробляв под значков Radium Vinovica. Понеже Пенкала од року 1904 достав пост Корольского техничного инспек­то­ра министерии финансох Австро-Мадярщины в Загребу, прияв там собѣ горватское имя Славолюб и Горваты днесь честують го як свого. В Загребу доднесь фунгуе фабрика на выробу церуз, пенкал, фломайстерох, маркерох, фарб, тинт и тушох TOZ Penkala, Tvornica olovaka Zagreb.

Гротеска: Croatia Guide Book