Переправа

Неспѣшно, з достоинством несе свои воды польска рѣка. Зимно еще, ай­бо уже майже ярный воздух ятрит воякам душѣ. Он опоюе своёв чис­то­тов канонѣров, привыкшых вдыхати го инакым – щедро при­прав­ле­ным порохом, желѣзом тай огнём.

Через широку рѣку з едного берега на другый наведена трудо­лю­ба­ми-мостниками моцна переправа. Бог войны – артиллерия Четвертого Укра­инского фронта – йде по ней дале на запад въедно з другыми войс­ка­ми. Гучат, чадячи чорными дымами, танкы, самоходкы, терьховы моторы, ин­шака техника.

Тяжко ступаючи натружеными ногами идут пѣшакы, несучи на пле­чах свое оружие. Здалеку переправа видит ся мурянковов купинов, де каж­дый, ги та мурянка, мае свою роботу. По обох берегах рѣкы чатуют на не­бо зенитны каноны, сокотячи всё и всѣх.

Йде по переправѣ канонѣрскый полк цѣлёша Мигаля, Русина. Мае их батерия америцкы тягачѣ, что спереду корманюют ся двома колесами, а ззаду мают желѣзны гуселницѣ, оболляты гумием. Канонѣры сидят у нёму в ладѣ на лавицях; за тягачом тягнут ся прикапчаны ид нёму прицѣп из гранатами, за ним – зенитно-гавбичный канон 85-го калибра на четырёх колесах тай полёва кухня.  Четыри сякы «газдовства» складают батерию. Всё сесе продумано и учинено ипно.

Раз лиш на переправѣ всё замерло. Заглухша наглѣ старенька «полу­тор­ка»* сперла ход вшиткой техницѣ. Выскочившый з кабины шофер зачав скоро крутити стартовов ручков мотор, як на се надойшов виллис з офицерами.

– Шофере, ку мнѣ! – учув ся голосный розказ старшого з них, под­пол­ковника. Шофер мотора, молоденькый вояк, десь 18 годов, подбѣг до нё­го з рапортом: «Товариш подполковнику, возич, рядовик…», но не устиг до­говорити свое прозвище, як тот выхопив з пошвы пистолю. На очах у всѣх канонѣров нараз стрѣлив воякови в груди.

Од того выстрѣла нараз го вергло назад, подкосило ногы, а дале з усёго розмаху ударило лицём на настелены на переправѣ товсты дощкы.

– Машину в воду! – швакнув зацѣпенѣлых од узрѣтого вояков розказ. – Быстро, мать перемать вашу!

Минута, и прибѣгшы воякы, розгойдавши, звергли мотор у воду. Подполковник, спокойно и поважно, так гибы ся нич и не стало, сѣв у виллис и тот, хылячи ся з боку на бок, пошов по переправѣ на другый берег.

– СМЕРШ, котррозвѣдка, – зачуло ся в повной од страшной и незаконной екзекуции тишинѣ. Виллис тым часом уже выдрабав ся на берег тай зачав поднимати ся по дорозѣ дгорѣ, де недалечко виднѣло ся польске село, пройшовши од забитого нещастного вояка метров на тристо.

Не говорячи ани едно слово, лиш поникавши еден на другого, трое русскых вояков, ветеранов, противотанкистов мигом одкапчали од мотора свой любимый 76-миллиметровый канон ЗИС-3. Точными, тысячѣ раз в боях одшлифоваными ходами розвернули го, розвели станины. Миг – гра­на­та заперта у сподку люфы, еще еден миг – и канон цѣвков слѣ­дит за виллисом. Пару секунд наведеня в прицѣл, гром од выстрѣла и хмарка на тому мѣстови, де тот быв лиш секунду перед тым. Здуло го з дорогы так, гибы го нигда на ней и не было. Пак дале такой так мовчкы канон – в порядок, воякы – на мѣсто д моторови! и на свои мѣста в ладѣ авта.

Зревѣла техника и переправа опят ожила, несучи на своих плечах тонны и тонны желѣза тай людей. И нигда пак, до самого конця войны ани еден вояк не выказав никому за случай на переправѣ.

* русск. авто на повдруга тонны терьха

(2007)