Первы филологы
«И. Сильвай вошел в историю литературы как самый крупный закарпатский прозаик, но он оставил после себя и солидный сборник стихотворений» – писал уже в совѣтскы часы наш познатый литературознатель и збератель литературной творбы и фолклора П. Линтур. Не знати, ци ще вынорит ся даколи на очи читателя тот зборник, в рукопису трафившый до приватного архиву П. Линтура, але з недавно появеного в Ужгородѣ тома выбраных писань Сильвая подаеме еден красный верш, незначно одомашненый, з котрого видко, же и поетична творба И. Сильвая нияк не заслужуе оповерженя.
Есть ученых нынѣ много,
Знают много, у дакого
Ся обертат голова!
Вѣдь они всѣ дѣтми были
И нацабачкы ходили,
А лем знали слова два:
Знали мама, знали тата,
Их головка пелехата
Знала лем такый язык;
И донынѣ дѣтвачата
Так берут ся натворяти
Волапюкскых грамматик.
Так то было и в Едемѣ,
Же по сей ото системѣ
Нашы прародителѣ
Без профессоров, так, сами,
Знаком, мимиков, руками
На зачатку рѣчь вели…
Но, а як они ходили –
Тот вопрос нам не по силѣ –
Просто ходом на ногах?
А ци плазом? скоком? качков?
На колѣнах ци иначе?
Нѣт того в писаниях.
Все то шло любезно, мило,
Что у них происходило.
Но даколи молода
На Адама Ева мила
Язычок свой вывалила:
И – тогды была бѣда!
Праотець – бо муж над жену! –
Властнов руков, злый на Еву,
Мыкал ю за волосы.
Но а дале что бывало?
Слов творило ся немало!
Периоды! Образы!
Так они раз наединѣ
Нѣжили ся в древа тѣни.
Змѣй, лукавый супостат,
Яблоко зорвал зо древа
И понукнул: «Скуси, Ево,
Что за смак и аромат!»
Бе ци ме повѣла Ева
И вкусила плод од древа,
Соблазнил ся и Адам,
Рот роздойнял и еднако
Звѣдал: «А?» А Ева такой
На то одповѣла: «Дам!»
Як вкусил Адам невѣдый,
Зморщил ся од горькой снѣди,
Крутит ся му голова…
Ева смотрит – что за диво?
Звѣдат: «Е?» нетерпезливо.
Одповѣдат Адам: «Ва!»
Есть ученых нынѣ много,
Знают много, у дакого
Ся обертат голова!
А не знают, як помалы
Од зачатку дале, дале
Составили ся слова.
Жерело: И. А. Сильвай. Избранные произведения. Ужгород. 2014. 168–169.