Писня бачваня – Пѣсня бачванска

Писня бачваня

Пѣсня бачванска

Єст дзешка морйо широке,

Як кед би було през краю -

А по нїм ладї зоз людзми

През дзень и през ноц плїваю -

Ширцом по морю плїваю!

А за тим морйом широким

Там дзешкаль єст Америка

Велька, богата, пенєжна,

А при фабрики фабрика -

Чарна, висока фабрика!

Ша лєм най себе там будзе

Гоч рай, а нє Америка!

Чи я ше на то народзел:

Же би ме жедла фабрика?

Страшна огняна фабрика!

Ша лєм най себе там будзе

Морйо широке, велїке -

Уж нє єдного прелїґло!

Оздаль и мнє да прелїґнє?

Да ме глїбоке прелїґнє?

Нет за мне швета як Бачка!

По єй широкей ровнїни

На красних коньох ше вожим,

А вшадзи стретам родзини -

Гоч кадзи скруцим -родзини!

Знам хто ту бива у хижох,

И хто у гробох спочива -

Жем ме ту трима и нєбо!

Кажда ше грудка озива -

Гу мне як мац ше озива!

Бачко! Кед влєце зародзиш

Па кед попатрим я на це,

шерцо ми трепе з радосци,

Як твойо клаше шущаце -

Клаше богате, шущаце!

Е деська море шыроке,

Як кебы было без краю -

А по нем лодѣ из людми

И вдень, и вночи плавают -

В морю шыроком плавают!

А за тым морем шырокым

Там деська е Америка

Велька, богата, пѣнязьна,

А при фабрицѣ фабрика -

Чорна, высока фабрика!

Та най лем там собѣ буде

Рай, а не лем Америка!

Ци я на то ся уродил:

Жебы ня зжерла фабрика?

Страшна огняна фабрика!

Та най лем там собѣ буде

Море шыроке, велике -

Што вже колькох пролыгнуло!

Пак и мене най пролыгне?

Най ня в утробу пролыгне?

Вшыток ми свѣт — моя Бачка!
По ей шырокой ровнинѣ
На красных конех ся вожу,
А всягды стрѣчам родину,
Де бых ни скрятав — родину!

Знам, кто ту быват у хыжох,
И кто у гробох спочиват —
Моя земля туй и небо!
Кажда ся грудка озыват —
Так, гикой мати идо мнѣ!

Бачко! Кой влѣтѣ зародиш,
А кой позирам на тебе,
Як ти колося габуе,
Серце ми скаче до неба!

Як то колося габуе!

* Адапт.С.С   **  Мальба Гелены Сивч.