Под облачком

17. юлия 2014 умер Семан Мадзелян. Зоставил Русинам свои прозовы и поетич­ны творы, з котрых выдвигат ся межи вершинскы дѣла ниже поданый верш. Ко­ли Семан Мадзелян написал тоту просту, таку «немодерну», але полну па­сии и емо­ций поезию, набизовно не думал, же з того постане спѣванка, котра буде би­ти вшиткы рекорды. Не знати, ци е така позната украинска спѣваюча целе­бри­та обоего пола, што бы тоту спѣванку собѣ не освоила, што вецей при том повѣ­да­ют, же то украинска народна спѣванка. Лем же мы знаме и не за­бу­деме, же тоты красны шорикы нам даровал Семан Мадзелян, а музыку до них ском­по­но­вал Ярослав Трохановскый.

Под облачком явор похыленый,
Спѣват на нем пташок премиленый.
Слухай мила, як тот пташок спѣват,
Же з любови нич добре не быват.

Ци то любов е од Бога дана,
Ци лем може дяблом подшептана?
Хоть бы-сь не хтѣл, та мусиш любити,
Хоть бы-сь по том прото мал терпѣти.

Мила, мила, ты покусо една,
Уж тя люблю, не рок, ани не два.
Ци-сь ми дала зѣля ся напити?
Не мож мила нияк без тя жити.

Ми Циганка давно ворожила,
Же мня здурит дѣвка чорнобрыва,
Же не буду видѣл за нев свѣта,
Аж проминут мои млады лѣта.

Под облачком явор зеленѣе —
Посмотр мила, як ним вѣтер хвѣе.
Може вырве его з корѣнями...
Мила, мила, што то буде з нами?

Юлия Дошна спѣват то правдиво по лемковскы Юлія Дошна - Під облачком (audiopoisk.com).mp3 (4435556)