Бачи Дюра з Керестура – традицийный, конзервативный Руснак, котрый ся зоткнул з огромнов перемѣнов у остатных двох-трох десять­рочах у своем окруженю. За его молодости не было хемии у земледѣлствѣ, але ся хосновали мотыкы, вилы и хлѣвный гной; дѣвкы не мали курты сукенкы, найлонкы, высокы запяткы и голы пупы, але носили запасаны сукнѣ и баршонѣ; молоды не закончовали факултеты, жебы одышли до свѣта, але оставали дома. Косарькы, вязачкы и молотилкы замѣнили новы технологии и електротехничны чудеса…. Конфликт традицийного и сего­часного най­частѣйшое жерело гумору, свѣжого, добронамѣрного, при­смаченого з вельков дозов носталгии.

Автор выимочно добрѣ пануе русинсков народнов бесѣдов. Дяку­ючи тому, читателеви оможливено, жебы ся якбы з током часу перенесл до двадцятого вѣку. Автентичный выслов творит и автентичну атмосферу русинского валала з того периоду.

Др. Михайло Фейса

Здрава пожива

Слухам тоты днѣ, як держава спомагат продукцию здравой по­живы. Дават за тото аж и окремы субвенции. То значит, же нам держава платит лем жебы сьме не хосновали фабричны гнои, ани хемичны сред­ства. Платит нам щи и тото, же даяку землю зохабиме парлагом. Най­менше три рокы ся така земля, де ся пестуе здрава пожива, не смѣе ани гноити, ани брызгати. Найлѣпше ю ани не орати. Благодать! Такое нам треба.

Говорят, же так роблят и у Америцѣ, и у Европѣ, до котрой маеме войти колись. Красота! При­шли сьме на тото, же нам у поле­гос­по­дарствѣ знова будут у модѣ мотыкы, вилы и хлѣвный гной. Чорт з нев, из тов хемиов!

Говорят, же всягды у розвитом свѣтѣ на пяцу звычайно маете двѣ громады яблок – на едной велькы, красны, як намалеваны, а на другой – тоты черваковаты, хробачны. Тоты первы брызганы, а другы нѣт. Та тоты ниякы – дорожы, як антоты малеваны. И люде то уже знают, та купуют тоты доро­жы.

Мой шовгор Микола на вшытко тото говорит: „Шак кедь хробак у яблоку жие, та ачей лем е здоровое..."

Но, видите, яка нас чекат будучность у полегосподарствѣ. Черваковата! На здравля!

Жерело: Бачи Дюра з Керестура.
Правда иста, нїкому не гутор!
Валалски дожица. Нови Сад. 2013. Ст.6.

Чистота лем повздравя

Приповѣдат ми школный пайташ Михал, пензиста з варошу. Кот­рыйсь день нам пришли на дверѣ якысь дѣтиска, та понукают, же нам очистят ковер з новотнов машинов, и то задармо! Ищи сьме, гварят, годны 500 евр и заробити! Такой ем знал, же то не може быти чистое дѣло, але нас тоты на дверех барз молили, та моя Феброна гварит, же гайда, най видиме и тото чудо.

Не перешло ани повгодины, а до обыстя вошол хлопчиско з двома велькыма куфрами. Розложил ся насеред хыжы, поскладовал великый тяжкый высысач и зачал з ним сувати по коврови. Фурт на нем штоська мѣнял, указовал брудны филтры од пороху з ковра. Вшыток ся уфарад­ловал толкуючи нам, же то найлѣпша машина на свѣтѣ на тоту роботу. Цѣла «операция» держала коло двох годин. На концу ся нас челядник звѣдал, же ци ся нам любит. Любило ся нам, чом бы нѣт?

Молодый челядник тогды комуська зателефоновал. О куртый час пришла панѣ середных роков, ачей шефка. Сѣла и зачала нам понукати, же най купиме такый высысач. Гварит, не е дорогый, 2500 евр, але достанеме попуст 500 евр (то тоты, што сьме якбы заробили), та цѣлый высысач, зоз вшыткыма додатками, можеме достати за 2000 евр, на сплаткы.

Феброна мало не зомлѣла, а зо мнов ся земля заточила. За хвильку гварю: «Та де же сьте пришли до нас понукати таку дорогу рѣч? Шак мы собѣ з нашых пензий не можеме допустити такый луксуш!» Але панѣ была уперта. Великодушно понукла, же нам она позычит дас 100 евр на перву рату, лем най подпишеме контракт, же купиме высысач. Я ся уже зачал смѣяти. «Майте розум, панѣ! А з чого же будеме жити?»

Панѣ дакус нагнѣвано вышла вонка. О куртый час пришол якысь челядник, прибраный, у машлику. Хлопчиско гварил,  же то директор. Те­перь он нас зачал нагваряти, же най купиме высысач. «Ачей можете вы­дѣлити 50 або 100 евр мѣсячно!» Кедь ем му гварил, же нам правѣ толь­ко хыбит на лѣкы, вышол и он нагнѣваный. Пошол и хлопчиско зоз цѣлов машинериов.

Наконець, зазвонил нам на телефон главный директор. Тота иста предикация. Повѣл ем му дость голосно: «Дайте нам уж покой! Нам добрѣ и так!» А Фебронѣ ем повѣл потихы: «Шак чистота то лем повздравя!» И она ся з тым согласила. Лем шкодуеме тых молодых, што хочут дашто заробити, а сперву роблят на своих директоров.

Жерело: Бачи Дюра з Керестура.
Правда иста, нїкому не гутор!
Валалски дожица. Нови Сад. 2013. Ст.15–16.

Пропасть свѣта

На зачатку 2013. року сьме оддыхли – пережыли сьме и тот «чорный пяток». Того 21. децембра 2012. року, по календарю Майов, мал быти конець свѣта. Пропасть, апокалипса! А нич ся з того не збыло. Правда, велѣ ся у страху поскрывали до «мышачых дѣр». Повѣчме, у нас на гору Ртань у восточной Сербии. Даедны пришли и здалека. Нич ся не стало, лем добрѣ заробили тоты домашны, што выдавали бываня на день-два.

И кой вшытко перешло, озвали ся фахманы на тоту науку. Гварили же Майи мают добрый календарь, же добрѣ выраховали коли буде пропасть свѣта, лем же мы не знаеме прочитати тоты рахункы як треба.

Еден добралый державник гварил о том так: «Конець свѣта наистѣ буде, як Сонце загасне, дас о два и пов милиарды роков!» Другый, зась, твердил, же то буде о штыри милиарды роков. Та, кто дожые...

Зато лем ся дашто новое случило. Правѣ того датума пришла зима по календареви. Потом пришол Крачун (Рождество) тай Новый рок. Пак зась Крачун и старый Новый рок. И так по Богоявленя и Йоанна. Ищи и День Руснаков! Добрѣ, же сьме вытримали толькы свята...

Пришли и новы, розумѣе ся, векшы цѣны. Уже нам лем они хыбили на и так выпорожнены будиларѣ! Януар и на тот раз был найдолжый мѣсяць. Добрѣ, же фебруар дакус куртшый. А ищи гварят, же тот тринад­цятый рок урекливый. Кебы сьме го могли перескочити. Але же будучый, штырнастый, буде лѣпшый. Та пак: Щастливо! Дай Боже дочекати!

Жерело: Бачи Дюра з Керестура.
Правда иста, нїкому не гутор!
Валалски дожица. Нови Сад. 2013. Ст.24.

СТАНДАРД. Туристы з едной европейской земли, котры были у нас, як видѣли цѣны у нашых продавалнях, гварили, же маеме такый стандард, як у Европѣ.

Лем кебы закукли до нашых плат и пензий, видѣли бы, же сьме дагде у Африцѣ.

СѢЙБА. Гварят даедны земледѣлци, же им перед сѣйбов обычайно нич не знати.

Як бы нѣт? Тадь знати, же дорожы гнои, насѣня, дорожа нафта, защитны средства, резервны части... Лем не знати як буде жыто, кендериця, посонячник, бурак, соя... Але уже знати – же тото незнати.

Жерело: Бачи Дюра з Керестура.
Правда иста, нїкому не гутор!
Валалски дожица. Нови Сад. 2013. Ст.52–57.

Читати цѣлу книжку (в языку бачванскых Русинов):
issuu.com/rusnak/docs/bacidjura