Римскы матроны
Никола Пуссен. Порываня сабинянок
В тых давных часах в подкарпатской русинской поезии переважна была патриотична и славянофилска тематика. Силвай, як и Павлович, богатством тем, поетиков и языком значно приближат ся ку народной поезии и выразно ся поднимат з той массы. Текст одомашненый.
В давны часы в свѣтлом Римѣ
Славный хлопчик был Папирий,
Славным стал ся, бо игриво
Учинил он смѣх и диво,
Смѣх до смерти, женску страсть,
Рим в основах ся затряс.
Дѣло в том: Папирий взят
Раз своим отцем в сенат,
Там о чем судил совѣт?
До того нам дѣла нѣт,
Не сушѣм на тому ум:
Был вопрос не женскых дум.
Дома любопытна мати
Од Папирья на возвратѣ
Звѣдовала о сенатѣ:
Что судили? что рѣшили?
О, открый, Папирий милый!
Твердый хлопчик был Папирий,
Молчалив в высокой мѣрѣ;
Як ни умоляла мати,
Ани словка о сенатѣ.
Послѣ многих просьб, як дѣло
Понад мѣру надоѣло,
Неохотно, поневолѣ
Лишил он свое безмолв’е, …
Посмотрѣл на матѣрь душка,
Пошептал он ей на ушко:
«Слыши, о любезна мати!
Мали днеська спор в сенатѣ,
Спор там был о благобытѣ,…
Як бы лѣпше учинити:
Ци двѣ жены треба мужу,
Вбы потѣшил свою душу?
Ци два мужѣ женѣ едной
Бы принесли щастя, покой?
Се о том был спор в сенатѣ,
Розсуди, любезна мати!»…
В многолюдном морѣ Рима
Вѣсточка, женам вѣстима,
Уж летит, як блискавиця,
Якбы тайный чародѣйця
В сердцях учинил пожар
Силою магичных чар.
Сходкы ся ставали гущы,
Полны площади, заглуш’я,
Тут матроны, там прислуга,
На лицах печать испуга, …
О, боги! что стало-сь им?
Загорѣл ся женскый Рим! …
В слѣдующый день в сенатѣ
Отцы вожди римской знати
Совѣщали ся солидно
Об империи всесвѣтной, …
Раз ся стрясло в домѣ вшитко,
На дворѣ тревога, битка,
Крик ся двигнул до небес,
Что-за чудо всѣх чудес!?
Дом сената окружен
Несозримым морем жен, …
Входит знать матрон в сенат,
Просят, вопиют, кричат:
«По двох мужей дайте нам!
Дайте правду нам, женам!»
Отцы при таком явленю
Без себе од удивленя;
Як дурны, смотрят на жены
(Зарыдали бы и стѣны!),
Як си они ламлют рукы,
На их слезы, вопль и мукы,…
Но Папирий ту по чину
Отворил им слез причину,
И як повѣл то — сей час
Од смѣха за женску страсть
Рим в основах ся затряс.
Уріил Метеор
Жерело: Листок. Унгвар. 1. іюля 1896, с. 147.
https://rusyns-library.org/