Телеграфы. Електрика
Як и Александер Духнович, Павлович много раз писал о потребѣ школной наукы про русинскы дѣти. Тоты вершѣ вшиткы мают дидактичный характер. Но единственное мѣсто в русинской поезии занимат вершованый опис телеграфа и електрикы, великых новот свого часу. Се была вынаходка поезии Павловича, яков одповѣл великым вынаходкам наукы и техникы.
Про малых дѣтей
При дразѣ по столпах висят грубы дроты,
Люде телеграфом зовут столпы тоты.
Што же то телеграф? Кедь хочеме знати,
Нам о електрицѣ треба подумати.
Што то електрика, трудно похопити,
Хоть ей полно всягды, не мож ей видѣти.
Коло себе, в собѣ електрику маме.
Она в нашом тѣлѣ, мы з нею дыхаме.
Велика, чудесна електрикы сила,
Перед нашым оком она себе скрыла.
Електрикы свѣтло, мои любы дѣти,
Тогды, коли блискат, можете видѣти.
Кедь хмары ся сходят, гучит, гырмит, трѣскат,
Електрика в хмарах пречудесно блискат.
Мы ей так, як вѣтер, нигде не видиме,
Но тогды, кедь блискне, ей свѣтло зазриме.
Тота електрика рѣдка а прерѣдка,
Легка а прелегка, швыдка а прешвыдка,
Она в окамгнутю 100 миль переплыне
По дротах, котры мы по столпах видиме.
Люде електрикы знают наимати,
А з нев барз далеко письма посылати.
А як то ся дѣе, кто бы хотѣл знати,
О том учат книжкы, треба их читати.
Кто хочет мудрости собѣ назберати,
Мусит ся учити читати, писати.
Кто не знат читати, ани раховати,
Без наукы чловек все будет капати.
Вы, милы сынятка, книжочкы читайте,
Зо свѣтлом наукы розум озаряйте;
Наука поострит силы и схопностѣ,
Подаст вам выживность и чисты радостѣ.
Наука будет вам всягды помагати,
Бо наука нашой щастливости мати.
Там, де розум темный, де не е наукы,
Тяженько працуют, мозолят ся рукы.
Што ся дѣе в свѣтѣ, мы видиме, знаме,
Же неукых людей, кто хочет, та кламе.
Дѣточкы, учте ся читати, писати,
Планым людям себе не дайте кламати.
Жерело: Александр Павлович. Избранные произведения.
Под общ. ред. И. С. Шлепецкого. Пряшев 1955. 409–410.