Циган адвокатом
Векшу часть творов Алексѣя Фаринича зостала розсыпана по периодичных выданях, и примѣром такых е подавана ту гумореска. Подобны сужеты сут черпаны из фолклора, и находиме их у многых подкарпатскых авторов. Як то звычайно стават ся у фолклорѣ, простый нешколованый чоловѣк указуе ся мудрѣйшым од ученого пана.
У нас уже так изстара веде ся: до чужых ставили сьме ся по правдѣ, а чужакы до нас – по кривдѣ.
Внучка Михала Пустая передала ми велми характерный розсказ своего дѣда. Приказовал го на запѣчку, лежачи на кожушанцѣ и покурюючи пипку. Подам го вам по дѣдовскы, од думкы до думкы.
***
История сеся стала ся не инде, як у нашом селѣ. Газда Кот жил зо своих кони. Од своей хыжы держал путь и за двѣ милѣ. Словом, наш газда фурманил.
В чужом свѣтѣ газда Кот побратал ся з добрым Евреем. И де бы не был добрый Еврейчина! З морозу зайде Кот – бородата голова посилуе го паленков, голодный зайде – вже го стол застеленый чекат. Газда Кот перед врагома все защищал Авраама. Но доброта, як и правда, з двома концями.
Раз дал собѣ в корчмѣ зготовити ратоту-яичницю з двох яиць. Сара ратоту приготовила, а газда Кот не заплатил. Добрый Еврей и слова не повѣл. А бѣдный Русин и не стямил, же зостал должен. Поѣхал собѣ домов, тай имил ся роздумовати. «Нашто ми только свѣтом путовати, ни спочивку, ни сна не знаю. Продам гет свои конѣ и в радость пожию собѣ из сѣмейством.»
Восям лѣт жил без кони. Не в радость му были сѣ рокы. Увидит на торзѣ пару чорногривых – а нараз му душу стискне. Поѣхати бы в чужу даль, порозпозирати ся на инородны звыкы. Имил ся кум Кот тай зробил собѣ на вдяку: купил собѣ быстрых татоши, кормил их одборным зерном и в коч-колясочку запряговал. Радостным стал газда. Буде фиакровати!
Пошол раз на дорогу фурманку. Взял ся везти двох панов, за шѣсть миль. Паны грошѣ не шкодовали. Конѣ были шумны и горячы. Через день несли кочом, як пухом вѣтер. На другый день стали у знакомого нам Еврея Авраама.
– Чиѣ конѣ? – звѣдат Еврей.
– Конѣ и коч, – повѣдат Русин, – то вшитко мое!
– А дома-сь ци богатый?
– Маву добры поля, шумны двѣ хыжы и, што ми треба на газдовствѣ, вшитко маву!
– Были сьме добры побратимы, айбо учинил есь ми шкоду. Уже восям рокы я тобѣ изварил два яйця, а ты доднесь их не заплатил. Кедь был ем их тогды положил под курку, та был ем мал двѣ куры. Не рахуву ти дорого як побратимови, лем по 40 грайцари едну курку. Сам знаеш, же до рока тото не много. Една курка изнесе 30 яиць. То выходит 60 кур из двох яиць. Кажда по 40 грайцари. Я пораховал собѣ, колько того може быти за восям рокы у мене кур, та ми вышло вшиткой суммы на еден миллион. Заплати ми, побратиме, по доброму.
Честный Русин так ся перепудил, же и слова не знал повѣсти. Не знал, ци скочити му з коньми у пропасть, ци забити проклятого. Но Авраам продолжовал дале:
– Кедь не хочеш честно оддати хыжу и конѣ, з хыжы ся выбрати з дѣтми, найму на тя фишкариша.* Такой иду до адвоката.
Адвокат за право взял ся. Суд розказал од газды Кота конѣ и екипаж одобрати и до судовой розправы задержати их на аллашу.** Коням у стойлѣ, правда, добрѣ, айбо Котови стало обидно. З горя пустил ся у путь-дорогу пѣшо и подумал собѣ: «Пойду завѣшу ся, а з дѣтми най буде, што буде.»
Путем стрѣл Цигана. Чорный одозвал ся на его журу:
– Гей, што вам е? Вы у яком-сь страху?
– Через два яйця, – одвѣтил му Кот, – збыл ем ся всей добротицѣ. Теперь ся йду завѣсити.
– Чом так скоро? – зчудовал ся Циган. – Почекайте конець права. А пак дознаеме ся, ци пропадут ваши конѣ.
– Тадь бо Жид наяв фишкариша.
– Та наймѣт и вы!
– Та за што? Вез ем двох панов. Мал ем достати 20 золотых. Конѣ засеквестровали, паны собѣ другого фурмана наяли и пошли.
– А я буду ваш фишкариш. Дайте ми десять грайцарѣ…
Посѣдали. Циган взял ся го защищати. Нещастному было розказано зголосити ярашбирову,*** же наял адвоката. Паны ся зчудовали: одкы у хлопа только гроши.
Зачало ся розслѣдованя. Адвокат Авраамов вычислял, колько яиць нанесли бы куре и пѣтята. У сесь час вмѣсто адвоката зашол Циган. Всѣ паны попукати хотѣли од смѣху. Ярашбиров имил ся над ним наглумлевати:
– Пане адвокате, а де маете свое папѣря?
– Забыл ем дома, ваша высокость, бо был ем на полю посмотрѣти фазулю, бо я посадил горнець вареной фазулѣ…
– Ци посходила, Цигане?
– Ой, нѣт!
– Та де ты видѣл, жебы варена фазуля зелень пущала?
– А они, пане велможный ярашбиров, ци видѣли, або чули, жебы из вареных яиць дакто толькы куре выгодовал?
Кот тяжбу выиграл.
=======================
Административны арготизмы:
* fiskális (мад.) – адвокат
** állás (мад.) – постоянок
*** járásbiró (мад.) – окружный судя
Жерело: Русскій народный календарь на год 1937.
Изданіе Общества А.В.Духновича. Ужгород. 1936.
Взято по публикации: Отчий Храм. Выданя Ужгородськой горрайорганизаціи
Товаришества Карпатськых Русинов. Ужгород. Септембер 1991. Ст.4.
Оригинална назва: Розсказ Михала Пустая.