Тяжко жыти хлопу

Женити ся, ци ся не женити? Або иншак, з кым ся женити? Бо не знам, ци знате Петра. Добрый хлоп з него. Бабы повѣдают, же ничого собѣ. И пити, вельо не пие. Но и акурат Петро хотѣл ся женити. Нашол си дѣвку. Та чого, красне дѣвча. Передумал справу. И пошол до няня. Петро – то статочный хлопець. А няньо, як няньо. Зачали ся вывѣдовати, думати, а в конци йойчати. Повѣдали потом люде, же то дѣвка. Але не своя была. Я там не знам. Але Петро остал сам. А знате, як то самому хлопу.

Повѣдают няньо: Идь на Ватру. Буде добрѣ. Но и пошол Петрусь.

Вступ был кус дорогый. Але нич. Такый свѣт. Вшелияк, дѣвчат купа. Утѣшил ся Петро. Купил си пиво. И взял ся до роботы.

Повѣдали потом люде, же го тота Ватра змѣнила. Такый ся якыйсь зробил. Но, гибы дѣвчата найшол. Але што. Бесѣдуе з таков еднов. Час тратит. А гев ся вказуе, же то не своя. Так си приѣхала. Та оставай здрава, Мала.

Пошол си Петро. Иде. Смотрит!? Та е! Красавиця! Но, та давай! И вшытко в порядку. Родиче – як треба. Села – тоже ненайгоршы. Але што. Бесѣдовати не знат. Вшытко розумѣе. Може часом треба помалше повѣдати. Хоче ся учити. Та ся уч. Хто ти сперат? Я там ем школу скончил. Пошол си Петро.

Буде забава. А Петро – то первый танцош у селѣ. Скаче. Крутит ся. Пороху повно. Мало што видко. Але не для Петра. Он видит вшытко. Уж ей дозрил. Уж ей мае. Уж не пустит. И што?.. И што робиш? – звѣдуе ся она. А газдую си – повѣдат Петро. Мам кус поля. Пару коров. Пацятка. Та то таке. Видите сами.

И повѣм вам, не спал Петрусь той ночи сам. И вшытко было добрѣ, покля не зачала бесѣдовати. Не дал Петро рады.

Вернул домов. Замкнул ся в собѣ. Няньо смотрѣти не можут. Повѣдают: Ѣхай в горы. Буде добрѣ. Но и поѣхал Петро. Повѣдали потом люде, же го тоты горы змѣнили. Такый ся якыйсь зробил. Бо то знате. Чоловѣк иде в горы. Родна земля. Зелены Карпаты. А гентам што? А гентам паробок на паробку. Десь си якусь найшол. Але му повѣла, же газдынев то она не буде. Видите, якы бабы! Робити ся им не хоче. Рокы летят. А Петро си жые. Помалы. На Ватру уж не ѣздит. В горы – тоже нѣт. На забаву пойде, часом. Частѣйше – до корчмы. Люде повѣдают, же ся полюбил з погариком. Але вшыткы розумѣют. Нихто злого слова не повѣст. Петро добрый хлоп. Лем тяжко. Тяжко жыти хлопу. Та и треба си кус выпити. Часом. Днеськы тоже ся зыйдут. Хлопы. Котрым тяжко. Выпиют си кус. И буде им легше. Лем няньо дома часом си йойкнут.

Жерело: Олена Дуць-Файфер (ред.). Ци то лем туга, ци надія.
Антолоґія повыселенчой лемківской літературы. 451–452.